Vwomakpotọ kẹ Ẹgba Usuon ri Jihova

1. Diesorọ a vwọ vwomakpotọ kẹ Jihova?

OFORI nẹ avwanre vwomakpotọb kẹ Jihova kidie ọyen ma avwanre. Ọtiọyena, ọyen vwo uturhi rọ vwọ vuẹ avwanre obo re che ru. (Ẹvwọ. 4:11) Ẹkẹvuọvo, orọnvwọn ofa rọ nẹrhẹ avwanre kerhọ rọyen kọna: Idjerhe ro suẹn wan yen me yovwin. Ihwo buebun sunre vwẹ ikuegbe rẹ ihworakpọ. Vwọ fẹnẹ ayen, Jihova yen Osun ro me vwo aghwanre, ẹguọnọ, erorokẹ, vẹ arodọnvwẹ.—Eyan. 34:6; Rom 16:27; 1 Jọn 4:8.

2. Diesorọ Hibru 12:9-11 vwọ tanẹ avwanre vwomakpotọ kẹ Jihova?

² Jihova guọnọre nẹ avwanre kerhọ rọyen ọ dia fikirẹ oshọ-ọ, ẹkẹvuọvo kidie avwanre vwo ẹguọnọ rọyen, avwanre ji no kerẹ ọsẹ avwanre. Vwẹ ileta ri Pọl si vwo rhe iniọvo rẹ Hibru, ọ tare nẹ avwanre “mu ọghọ kẹ Ọsẹ” na kidie ọyen yono avwanre “fiki rẹ erhuvwu rẹ avwanre.”—Se Hibru 12:9-11.

3. (a) Mavọ yen e se vwo djephia nẹ avwanre vwomakpotọ kẹ Jihova? (b) Enọ vọ yen a cha kpahenphiyọ?

³ Avwanre vwomakpotọ kẹ Jihova siẹrẹ a da davwẹngba vwọ kerhọ rọyen vwẹ kemu kemu re ruẹ, ji sẹn ẹwẹn ra vwọ vwẹroso omobọ rẹ avwanre. (Isẹ 3:5) Ọ cha lọhọ ra vwọ vwomakpotọ kẹ Jihova siẹrẹ e de yono kpahen iruemu iyoyovwin rọyen. Diesorọ? Kidie iruemu nana yen muo vwo ru kemu kemu ro ruẹ. (Une 145:9) Avwanre vwo yono kpahen Jihova phiyọ ye, jẹ ẹguọnọ rẹ avwanre vwo kpahọn ganphiyọ. Ẹguọnọ rẹ avwanre vwo kpahen Jihova da ganphiyọ re, a rha cha guọnọ irhi buebun kpahen obo re ru vẹ obo re jẹ ruo-o. Avwanre davwẹngba vwo yono obo re se vwo vwo iroro ri Jihova, je kẹnoma kẹ obo ri brare. (Une 97:10) Ọkiọvo ọ bẹn re vwo nyupho ri Jihova. Diesorọ ọ vwọ dia ọtiọyen? Die yen ekpako, esẹ vẹ ini se yono vwo nẹ udje rẹ Osun Nehemaya, Ovie Devid; vẹ Meri rọ dia oni ri Jesu? Uyono na cha kpahenphiyọ nana.

OBORESORỌ Ọ VWỌ BẸN RA VWỌ VWOMAKPOTỌ KẸ JIHOVA

4-5. Vwo nene Rom 7:21-23, diesorọ ọ vwọ bẹn ra vwọ vwomakpotọ kẹ Jihova?

⁴ Umwemwu ra riuku rọyen vẹ jẹgba ọyen iroro ọvo rọ nẹrhẹ ọ bẹn ra vwọ vwomakpotọ kẹ Jihova. Ọnana yen sorọ avwanre rhọnvwa kerhọ rẹ Ọghẹnẹ ọkieje-e. Ghwe vwo nẹ ọke Adam vẹ Ivi vwo gbevwọso Ọghẹnẹ ji re emamọ na, ayen da vwẹ iwan rẹ obọ rayen vwo mu. (Jẹn. 3:22) Nonẹna, ihwo buebun chukoku Jihova, ayen ọvo kọyen brorhiẹn rẹ obo ri yovwirin vẹ obo re brare.

⁵ Ọ je tobọ bẹn vwo kẹ ihwo re riẹn Jihova ji vwo ẹguọnọ rọyen ayen vwọ vwomakpotọ kẹ. Ọyinkọn Pọl hirharoku ẹdia nana. (Se Rom 7:21-23.) Kerẹ Pọl, avwanre guọnọ ru obo ri yovwirin vwẹ ẹro ri Jihova. Ẹkẹvuọvo, avwanre nene iroro echọchọ muabọ ọkieje.

6-7. Die yen iroro ọfa rọ nẹrhẹ ọ bẹn ra vwọ vwomakpotọ kẹ Jihova? Djudje ọvo.

⁶ Ẹkuruemu rẹ asan avwanre nurhe ọyen iroro ọfa rọ nẹrhẹ ọ bẹn ra vwọ vwomakpotọ kẹ Jihova. Iroro rẹ ihworakpọ buebun vwọso ọhọre ri Jihova. Ọtiọyena, ofori nẹ avwanre davwẹngba vwọ họnre vwọso iroro tiọyena ọkieje. Roro kpahen udje ọvo.

⁷ Ighene buebun hirharokuẹ ọnyẹ rẹ ayen vwọ reyọ vwọtua igho. Oniọvo aye ọvo re se Maryc hirharoku ọnyẹ tiọyena. Ọ ke rhe riẹn Jihova, ọvo usun rẹ isikuru ro me yovwin kparobọ vwẹ ẹkuotọ rọyen yen ọ rhare. Ihwo orua ri Mary davwẹngba ayen vwọ gba vwo ruiruo ra da cha hwa okposa kẹ. Iruo tiọyena ji je jovwo. Ẹkẹvuọvo, ro vwo yono kpahen Jihova nu, o de rhi vwo ẹguọnọ rọyen ji wene obo rọ vwọtua vwẹ akpeyeren. Dedena, ọ da ta: “Ọke evo, me mrẹ iruo ra da cha hwa okposa kẹ vwẹ, ẹkẹvuọvo, ọ che gbowọphiyọ ẹga mẹ. Fikirẹ obo ra yọnrọn ovwẹ wan, ọ bẹn me vwọ sẹn. Ke me rẹ Jihova nẹ ọ chọn vwẹ uko vwọ sẹn ọdavwini me vwọ rhiabọreyọ iruo ro che gbowọphiyọ ẹga me vwọ kẹ.”—Mat. 6:24.

8. Die yen a cha fuẹrẹn enẹna?

⁸ Avwanre mrẹ erere siẹrẹ a da vwomakpotọ kẹ Jihova. Ẹkẹvuọvo, ekpako, esẹ vẹ ini ri Jihova vwẹ ọgangan vwọ kẹ da vwomakpotọ kẹ Ọghẹnẹ, ayen ke sa chọn ihwo efa uko. E jẹ a fuẹrẹn idje ri Baibol evo ri che yono avwanre obo ra sa vwọ reyọ ọgangan tiọyena vwo ruiruo vwẹ idjerhe oma da vwerhen Jihova.

OBO EKPAKO SE YONO MIE NEHEMAYA

9. Egbabọse vọ yen Nehemaya hirharoku?

⁹ Jihova vwẹ oghwa ra vwọ vwẹrote igodẹ rọyen vwọ kẹ ekpako na. (1 Pita 5:2) Ekpako se yono erọnvwọn buebun vwo nẹ idjerhe ri Nehemaya vẹ ihwo ri Jihova yerin wan. Kerẹ osun ri Juda, Nehemaya vwo ogangan. (Neh. 1:11; 2:7, 8; 5:14) Vwẹro roro egbabọse evo ri Nehemaya hirharoku. Ọ mrẹvughe nẹ ihwo na gbe uwevwin ẹga na ẹgua, ayen rha je vwẹ itetoro vwọ kẹ ihwo ri Livae kirobo rẹ Urhi na tare-e. Ihwo ri Ju na rha yan nene urhi rẹ Ẹdẹ Urovwoma na-a, evo usun rẹ eshare na tobọ rọvwọn eya ri nẹ ẹgborho re ga Jihova-a rhe. Ofori nẹ Nehemaya rhuẹrẹ ebẹnbẹn nana phiyọ.—Neh. 13:4-30.

10. Mavọ yen Nehemaya sa vwọ rhuẹrẹ ẹdia ro hirharoku na phiyọ?

¹⁰ Nehemaya reyọ ogangan rọyen vwọ gba ihwo vwọ yan nene iroro romobọ rọye-en. Ukperẹ ọtiọyen, ọ guọnọ odjekẹ ri Jihova womarẹ ẹrhovwo, ji yono ihwo na kpahen Urhi ri Jihova. (Neh. 1:4-10; 13:1-3) Nehemaya ji vwomakpotọ nene iniọvo rọyen wiankugbe, ọ tobọ vwẹ ukẹcha kẹ ayen vwọ rhoma bọn igbẹhẹ ri Jerusalẹm.—Neh. 4:15.

11. Kirobo rẹ 1 Tẹsalonaika 2:7, 8 tare, mavọ yen ekpako nene iniọvo rehẹ ukoko na yerin wan?

¹¹ Ọ dia ọkieje yen ekpako che vwo hirharoku oka rẹ egbabọse ri Nehemaya hirharoku na-a, ẹkẹvuọvo, ayen sa vwẹrokere vwẹ idjerhe buebun. Kerẹ udje, ayen wian gangan fikirẹ erhuvwu rẹ iniọvo na. Ayen ji no oma rayen gegerege fikirẹ ogangan ro rhe ayen na-a. Ukperẹ ọtiọyen, ayen nabọ vwẹrote iniọvo rehẹ ukoko na. (Se 1 Tẹsalonaika 2:7, 8.) Ẹguọnọ okokodo vẹ omaevwokpotọ rayen djobọte oborẹ ayen ta ota kẹ ihwo efa wan. Andrew rọ dia ọkpako rọ ga krẹre, da ta: “Mi rhi mrẹvughe nẹ ọkpako da ta ota kẹ iniọvo na vwẹ idjerhe ẹguọnọ, uchebro na ko se te ubiudu rẹ iniọvo na. Uruemu nana nẹrhẹ iniọvo na yan nene odjekẹ rẹ ekpako na.” Ọkpako ọfa re se Tony rọ ga krẹre, da ta: “Me davwẹngba vwọ yan nene uchebro rọhẹ Filipae 2:3, ji ni ihwo efa nẹ ayen yovwin nọ ovwẹ. Ọnana chọn vwẹ uko vwọ kẹnoma kẹ a vwọ gba ihwo efa vwo ru obo ri mi tare.”

12. Diesorọ ọ vwọ ghanre ekpako vwọ dia ihwo ri vwomakpotọ?

¹² Ofori nẹ ekpako vwomakpotọ, kirobo ri Jihova vwomakpotọ. Dede nẹ, Jihova yen Osun Romevwẹgba vwẹ akpọneje, ọ “nẹ otọ” rere ọ sa vwọ “kpara ovwiogbere nẹ iwurhie.” (Une 18:35; 113:6, 7) Baibol na tobọ tanẹ Jihova vwo utuoma kpahen ihwo ri phuoma.—Isẹ 16:5.

13. Diesorọ o vwo fo nẹ ọkpako “sẹro rẹ ẹrevwe” rọyen?

¹³ Ofori nẹ ọkpako rọ vwomakpotọ kẹ Jihova “sẹro rẹ ẹrevwe” rọyen. Ọ rha dia ọtiọye-en, ọ sa ta eta ri je fo siẹrẹ e rhe muọghọ kẹ-ẹ. (Jems 1:26; Gal. 5:14, 15) Andrew re djunute siẹvure, da ta: “Ọke evo, kọ ghwa họhọ nẹ me van ku iniọvo ri muọghọ kẹ vwẹ kerẹ ọkpako-o. Ẹkẹvuọvo, me nabọ roro kokodo kpahen idje rẹ eshare ri fuevun rehẹ Baibol na, ọyena da vwẹ ukẹcha kẹ vwẹ vwọ mrẹ ọghanrovwẹ rẹ uruemu rẹ omaevwokpotọ vẹ dẹndẹn.” Ekpako djephia nẹ ayen vwomakpotọ kẹ Jihova siẹrẹ ayen de nene iniọvo na vẹ ekpako efa rehẹ ukoko na ta ota kuẹgbe vwẹ idjerhe ẹguọnọ.—Kọl. 4:6.

OBO ESẸ SE YONO VWO MIE OVIE DEVID

14. Oghwa vọ yen Jihova vwọ kẹ esẹ, kẹ die yen ọ guọnọ mie ayen?

¹⁴ Jihova reyọ ọsẹ vwo mu ọgbuyovwin rẹ orua, ọ je guọnọ nẹ ọ yono emọ rọyen je ghwọku ayen. (1 Kọr. 11:3; Ẹfe. 6:4) Ẹkẹvuọvo, o vwo asan rẹ ogangan rọyen bare. Ọ cha niyẹnrẹn kẹ Jihova, rọ dia ohwo rọ ton ọrhuẹrẹphiyọ rẹ orua na phiyọ. (Ẹfe. 3:14, 15) Esẹ djephia nẹ ayen vwomakpotọ kẹ Jihova siẹrẹ ayen da reyọ ogangan rayen vwo ruiruo vwẹ idjerhe oma da vwerhen Jihova. Ayen se yono emu buebun vwo nẹ udje Ovie Devid.

15. Diesorọ Ovie Devid vwọ dia omamọ rẹ udje rẹ esẹ sa vwẹrokeri?

¹⁵ Jihova vwẹ Ovie Devid vwo mu ọgbuyovwin rẹ orua rọyen kugbe ọ rẹ ẹgborho rẹ Izrẹl ejobi. Kerẹ ovie, Devid vwo ẹgba mamọ. Ọkievo, ọ reyọ ẹgba vwo ruiruo vwẹ idjerhe ro je fo, ọ da nẹrhẹ o ru chọ. (2 Sam. 11:14, 15) Ẹkẹvuọvo, o djerephia nẹ ọyen vwomakpotọ kẹ Jihova ro vwo rhiabọreyọ ọghwọku. Ọ nẹrhovwo ro nẹ otọ rẹ ubiudu rhe vwọ kẹ Jihova. Ọ je davwẹngba rọyen eje vwo kerhọ rẹ uchebro ri Jihova. (Une 51:1-4) Vwọba, ọ vwomakpotọ rhiabọreyọ uchebro esiri mie eshare, eriyin ji te eya dede. (1 Sam. 19:11, 12; 25:32, 33) Devid yono vwo nẹ echobọ rọyen, ji tẹnrovi ẹga ri Jihova.

16. Die yen esẹ se yono vwo mie Devid?

¹⁶ Roro kpahen erọnvwọn evo esẹ se yono vwo mie Ovie Devid: Wọ reyọ ọgangan ri Jihova vwọ kẹ wẹ na vwo ruiruo vwẹ idjerhe rọ chọre-e. Rhọnvwe echobọ wẹn, wo rhiabọreyọ uchebro ri Baibol rẹ ihwo efa vwọ kẹ wẹ. Wo de ru ọtiọyen, orua wẹn che muọghọ kẹ wẹ fikirẹ omaevwokpotọ wẹn. Wẹ vẹ orua wẹn da nẹrhovwo kuẹgbe, ta obo rehẹ ẹwẹn wẹn kẹ Jihova, jẹ ayen riẹn nẹ wọ vwẹrosuọ mamọ. Marho kparobọ, reyọ ẹga ri Jihova vwọ kobaro vwẹ akpeyeren wẹn. (Urhi 6:6-9) Omamọ rẹ udje wẹn ọyen ọvo usun rẹ okẹ rọ ma ghanre ru wọ sa vwọ kẹ orua wẹn.

OBO INI SE YONO VWO MIE MERI

17. Iruo vọ yen Jihova vwọ kẹ ini?

¹⁷ Jihova vwẹ iruo ọghanghanre vwọ kẹ ini vwevunrẹ orua, ọ je vwẹ ọgangan kẹ vwẹ enu rẹ emọ rọyen. (Isẹ 6:20) Vwọrẹ uyota, oborẹ oni ruẹ je ta se djobọte akpeyeren rẹ emọ rọyen. (Isẹ 22:6) Vwo oniso rẹ oborẹ ini se yono vwo mie Meri rọ dia oni ri Jesu.

18-19. Die yen ini se yono vwo nẹ udje ri Meri?

¹⁸ Meri nabọ riẹn Isiesi Ọfuanfon na dẹn. Ọ muọghọ okokodo kẹ Jihova, ọ vẹ ọyen ji vwo oyerinkugbe ọkpẹkpẹkpẹ. Ọ choma rọ vwọ yan nene odjekẹ ri Jihova, ọ da tobọ dianẹ ọ cha nẹrhẹ akpeyeren rọyen wene kare kare.—Luk 1:35-38, 46-55.

¹⁹ Ini, ovwan sa vwẹrokere Meri vwẹ idjerhe buebun. Mavọ wo se ru ọtiọyen? Ẹsosuọ, sẹro rẹ oyerinkugbe wẹn vẹ Jihova womarẹ uyono ri Baibol romobọ kugbe ẹrhovwo. Ọrivẹ, vwo owenvwe wo vwo ru ewene vwẹ akpeyeren wẹn rere oma vwọ vwerhen Jihova. Kerẹ udje, ọ sa dianẹ uwevwin ra da ta eta gbagbagba yen a da yọnrọn owẹ ghwanre. Ọtiọyena, wọ se no nẹ idjerhe tiọyena yen ofori nẹ a vwọ yọnrọn emọ. Wọ vwọ tobọ yono kpahen iruemu ri Jihova nure na, ọ je sa bẹn wọ vwọ fọ ji chirakon rẹ emọ wẹn, marho siẹrẹ ayen de muẹruẹ vwẹ ọke oma da rhọ wẹ. (Ẹfe. 4:31) Ọke tiọyena, yen o vwo fo nẹ wọ vwẹroso Jihova womarẹ ẹrhovwo vrẹ obo ri jovwo. Oni ọvo re se Lydia da ta: “Ọkievo, me nẹrhovwo gangan me vwọ jẹ eta ri gbaegbae ẹta ọke rẹ ọmọshare mẹ rha rhọnvwe kerhọ mẹ-ẹ. O vwo ọke me vwọ dunuji, ji nẹrhovwo rhe Jihova vwọ kẹ ukẹcha rọyen. Ẹrhovwo nẹrhẹ udu mẹ dia dọe.”—Une 37:5.

20. Egbabọse vọ yen ini hirharokuẹ, kẹ mavọ yen ayen se vwo phio kparobọ?

²⁰ Egbabọse ọfa ini evo hirharokuẹ ọyen ayen vwo djephia nẹ ayen vwo ẹguọnọ rẹ emọ rayen. (Taitọs 2:3, 4) A yọnrọn ini buebun tiọyena ghwanre vwẹ uwevwin re de jẹ ẹguọnọ edjephia vwọ kẹ emọ. Ọ da dia ọtiọyen kẹ wẹ, o rhe fo nẹ wọ vwanriẹn echobọ rẹ ọsẹ vẹ oni wẹn na-a. Oni rọ vwomakpotọ kẹ Jihova che yono obo ro se vwo dje ẹguọnọ phia kẹ emọ rọyen. Ọ sa dia bẹnbẹn ro vwo wene iroro vẹ uruemu rọyen. Ẹkẹvuọvo, o se ruo, kidie ewene tiọyena cha ghwa erere bro rhe vẹ orua rọyen.

VWOMAKPOTỌ KẸ JIHOVA ỌKIEJE

21-22. Vwo nene Aizaya 65:13, 14, erere vọ yen herọ siẹrẹ a da vwomakpotọ kẹ Jihova?

²¹ Ovie Devid riẹn ọghanrovwẹ ra vwọ vwomakpotọ kẹ Jihova. Ọ da ta: “Irhi rẹ Ọrovwohwo na shehọ, ọ vwẹ omavwerhe vwọ kẹ udu; iji rẹ Ọrovwohwo na emamọ, ọ nẹrhẹ ẹro rhie; Ma rho, e vwẹ uchebro kẹ odibo wẹn a da yọnrọn ayen gba ughwẹ rode na herọ.” (Une 19:8, 11) Nonẹna, avwanre sa mrẹ ofẹnẹ rọhe uvwre ihwo ri vwomakpotọ kẹ Jihova vẹ i ri sen uchebro rọyen. Otu ri vwomakpotọ kẹ Jihova “cha so ine fiki rẹ aghọghọ rọ hẹ udu rayen.”—Se Aizaya 65:13, 14.

²² Siẹrẹ ekpako, esẹ vẹ ini da ghini vwomakpotọ kẹ Jihova, akpeyeren rayen che yovwinphiyọ, omavwerhovwẹn cha dia evunrẹ orua rayen, oyerinkugbe rọhẹ ukoko na kọ cha ganphiyọ. Marho, kẹ ayen che ru ubiudu ri Jihova ghọghọ. (Isẹ 27:11) Ọnana yen omavwerhovwẹn rọ marho kparobọ!