Karophiyọ Ihwo re Kobaro Vwẹ Uvwre rẹ Ovwan

A SA je fan eta rẹ ọyinkọn Pọl rehẹ Hibru 13:7 na vwẹ idjerhe nana: “Karohọ isun rẹ ovwan.” Vwo nẹ Pẹntikọst 33 C.E. yen iyinkọn ri Jesu Kristi vwo ruiruo nana kerẹ ẹko rọvwẹrote, rọ vwẹ odjekẹ vwọ kẹ ukoko rẹ Inenikristi re vwo mu obọ na. (Iruo 6:2-4) Vwẹ omarẹ ukpe rẹ 49 C.E., a da vwẹ ihwo efa vwọba iyinkọn na. Ọke re vwo brorhiẹn rẹ ota ro shekpahen oyanvwe, “iyinkọn vẹ ekpako na” yehẹ evunrẹ ẹko rọvwẹrote na vwẹ “obi Jerusalẹm.” (Iruo 15:1, 2) Ayen yen vwo oghwa rẹ ayen vwọ fuẹrẹn eta ri shekpahen Inenikristi eje vwẹ kasan kasan. Ayen si ileta vẹ odjekẹ vwọ bọn ikoko na gan je nẹrhẹ idibo na vwo iroro vẹ uruemu vuọvo. Ikoko na kerhọ je vwomakpotọ kẹ odjekẹ rẹ ẹko rọvwẹrote na, ọnana da nẹrhẹ ayen mrẹ ebruphiyọ ri Jihova ji bunphiyọ.—Iruo 8:1, 14, 15; 15:22-31; 16:4, 5; Hib. 13:17.

² Iyinkọn na vwo ghwu nu, ihwo ri she nẹ ukoko na da ton ẹvwọsuọ phiyọ. (2 Tẹsa. 2:3-12) Kirobo rẹ Jesu tare vwẹ itẹ rẹ ego vẹ irosu na, a cha kọn ego na (Inenikristi rẹ efian) phiyọ uvwre rẹ irosu na (Inenikristi ra jẹreyọ). Vwẹ ikpe buebun re wanre na, a vwẹ uphẹn kẹ ẹko ivẹ nana nẹ ayen djẹ kugbe re te ọke rẹ orhọ na, rọ dia “oba rẹ akpọ na.” (Mat. 13:24-30, 36-43) Inenikristi ra jẹreyọ ọvuọvo nabọ mrẹ ebruphiyọ ri Jesu vwẹ ọke yena, ẹkẹvuọvo ẹko rọvwẹrote herọ-ọ, o vwo ugbo rẹ Jesu wan vwẹ odjekẹ vwọ kẹ ihwo rọyen rehẹ otọrakpọ na vwẹ ọke yena-a. (Mat. 28:20) Dedena, ọ tarọ phiyotọ nẹ ewene cha dia vwẹ ọke rẹ orhọ na.

³ “Ono hẹ omamọ rẹ odibo esiri na?” Jesu vwẹ onọ yena vwọ ton itẹ, yẹrẹ udje ọvo phiyọ, rọ dia ẹbẹre ọvo rẹ “oka” re che rhiẹromrẹ vwẹ “oba rẹ akpọ na.” (Mat. 24:3, 42-47) Jesu tare nẹ odibo rọ fuevun na che muomaphiyọ ẹghẹrẹ rẹ ihwo rẹ Ọghẹnẹ “vwẹ ọke” ro fori. Kirobo rẹ Jesu reyọ ẹko eshare ukperẹ ohwo ọvo vwọ vwẹrote ihwo rọyen vwẹ ẹgbukpe ujorin rẹsosuọ na, odibo rọ fuevun na rẹ Jesu vwo ruiruo vwẹ oba rẹ eyeren nana je dia ohwo ọvo-o.

ONO YEN “ODIBO ESIRI NA”?

⁴ Ono yen Jesu vwo mu nẹ ọ ghẹrẹ idibo rọyen? Kirobo ro ghwe fo, Inenikristi ra jẹreyọ rehẹ otọrakpọ na yen o che vwo ruo. Baibol na tare nẹ ayen “uvwiẹ rẹ irherẹn” ra vwẹ owian kẹ nẹ i re ghwoghwo “iruo rẹ igbunu rẹ ohwo ro se [ayen] nẹ ebri rhe vwo kpo urhukpẹ rẹ igbunu rode na.” (1 Pita 2:9; Mal. 2:7; Ẹvwọ. 12:17) Inenikristi ra jẹreyọ eje rehẹ otọrakpọ na yen odibo rọ fuevun na? Ẹjo. Ọke rẹ Jesu vwọ vwẹ idjerhe igbunu vwọ ghẹre eshare ri te omarẹ 5,000, kugbe eya vẹ emọ buebun, idibọ rọyen yen ọ ka vwẹ emu na kẹ, idibo na da rha vwọ kẹ otu na. (Mat. 14:19) Jesu vwẹ ihwo tutuno vwọ ghẹre ihwo buebun. Idjerhe tiọyena yen ọ je vwọ ghẹrẹ avwanre nonẹna.

⁵ Ọtiọyena, “odibo rẹ esiri rọ ghwanre na,” eyen ẹmẹko rẹ eshare ra jẹreyọ ri muegbe rẹ evuẹ vẹ eta re vwo yono idibo ri Jesu vwẹ ọke rẹ ọrhire rọyen na. (Luk 12:42) Vwẹ ọke rẹ oba nana, eshare nana ra jẹreyọ re dia “odibo esiri na” ga kuẹgbe vwẹ esiri ukoko. Nonẹna, eshare nana yen Ẹko Rọvwẹrote Iruo rẹ Iseri ri Jihova.

⁶ Jesu reyọ ẹko rọvwẹrote na vwọ vwẹ ovuẹ vwọphia kpahen orugba rẹ aroẹmrẹ ri Baibol sansan, ayen je vwẹ uchebro ro fo aruọke vwọphia kpahen obo ra sa vwọ reyọ odjekẹ ri Baibol vwo ruiruo vwẹ akpeyeren. A vwẹ evuẹ nana vwọphia womarẹ ikoko rẹ Iseri ri Jihova. (Aiz. 43:10; Gal. 6:16) Vwẹ ọke awanre, odibo ra sa vwẹroso yen vwẹrote uwevwin. Vwẹ idjerhe vuọvo na, odibo rọ fuevun rọ je ghwanre na ji vwo oghwa rọ vwọ vwẹrote evwruwevwin rẹ esegbuyota na. Ọtiọyena, odibo rọ fuevun na yen vwẹrote igho vẹ ekuakua rẹ ukoko na, iruo aghwoghwo na, ọrhuẹrẹphiyotọ rẹ isikoko vẹ eghwẹkoko, evwomuẹ rẹ iniruo re ga vwẹ ẹdia sansan vwẹ ukoko na, kugbe ẹteyọn rẹ ẹbe rẹ ukoko na, enana eje ghwa erere vwo rhe ihwo rehẹ “uwevwi” rẹ Ọghẹnẹ.—Mat. 24:45.

⁷ Amono keyen ihwo rehẹ “uwevwi” rẹ Ọghẹnẹ na? Enana yen ihwo ra ghẹrẹ na. Vwẹ ẹsosuọ, ihwo ra jẹreyọ na ọvo yen ihwo rehẹ evwruwevwin rẹ Ọghẹnẹ na. Ọke vwọ yanran na, otu gbidigbidi rẹ “igodẹ efa” na da je rhe dia usun rẹ ihwo rehẹ evwruwevwin rẹ Ọghẹnẹ na. (Jọn 10:16) Ẹko ivẹ na yen riavwerhen rẹ iyono rẹ odibo rọ fuevun na vwọphia.

⁸ Jesu da rhe rhe ghwọrọ eyeren umwemwu nana vwẹ ọke rẹ ukpokpogho rode na, kọ cha vwẹ odibo rọ fuevun na vwo mu “olori vwẹ enu rẹ emu [ro] vwori ejobi.” (Mat. 24:46, 47) Ihwo re dia odibo rọ fuevun na ki che rhiabọreyọ osa rayen vwẹ odjuvwu. Ayen vẹ ihwo 144,000 ri chekọ na kugbe Jesu ki che sun vwẹ odjuvwu. Dede nẹ odibo esiri vuọvo rha cha dia evunrẹ akpọ na-a, Jihova vẹ Jesu cha vwẹ odjekẹ kẹ ihwo rehẹ otọ Usuon ri Mesaya na womarẹ ihwo re che vwo mu “isun.”—Une 45:16.

DIESORỌ A VWỌ KAROPHIYỌ IHWO RE KOBARO NA?

⁹ Avwanre vwo erọnvwọn buebun re sorọ a vwọ karophiyọ ihwo re kobaro vwẹ uvwre rẹ avwanre ji muọghọ kẹ ayen. Erere vọ yen ọ cha ghwa rhe avwanre? Ọyinkọn Pọl da ta: “Ayen re vwẹrote ovwan, ayen je cha niyẹnrẹn kpahen ovwan, rere ayen se vwo ruo vẹ aghọghọ ukperẹ unuẹfiọn, kidie ọyena che fi erere kẹ ovwa-an.” (Hib. 13:17) Ofori nẹ e muọghọ je vwomakpotọ yan nene odjekẹ rẹ ihwo re kobaro kẹ avwanre vwọphia, kidie ayen yen sẹro rẹ avwanre vwo nẹ obo ri se miovwo oyerinkugbe avwanre vẹ Jihova.

¹⁰ Kirobo re siro phiyọ 1 Kọrẹnt 16:14, Pọl da ta: “Kemu kemu ru we ruẹ ejobi we ru ayen vwẹ ẹguọnọ.” Ẹguọnọ yen e muẹ orhiẹn-ebro eje ri shekpahen ihwo rẹ Ọghẹnẹ kpahan. Vwọ kpahen ẹguọnọ, 1 Kọrẹnt 13:4-8 da ta: “Ẹguọnọ vwo odiri kugbe aruẹdọ; ẹguọnọ rioma-a eyẹ ọ yan eya-an; o phuoma-a eyẹ o vwo udu-u. Ẹguọnọ ghwe churu obọ muẹ ọrọye ọvo-o; ophu fobọ muo-o eyẹ emu fobọ da-a; ọ ghọghọ gbe obo re chọre-e, ẹkẹvuọvo ọ ghọghọ gbe obo ri yovwiri. Ẹguọnọ chiri emu ejobi, o se emu ejobi gbuyota, o phierohọ emu ejobi, o chirẹ emu ejobi. Ẹguọnọ vwo oba-a.” Avwanre sa nabọ nene odjekẹ ra vwọ kẹ avwanre, kidie korhiẹn korhiẹn re bruru fikirẹ erhuvwu rẹ idibo rẹ Ọghẹnẹ eje, ẹguọnọ yen e muẹ ayen kpahan. Vwọba, ọnana ghwa odjephia rẹ ẹguọnọ ri Jihova.

¹¹ Kirobo rọ hepha vwẹ ẹgbukpe ujorin rẹsosuọ, ihwo ri jẹgba yen Jihova vwọ vwẹrote ihwo rọyen. Vwọrẹ uyota, Jihova reyọ ihwo ri jẹgba vwẹ ọke awanre vwo ru ọhọre rọyen. Noa bọn okọ ji ghwoghwo ovuẹ rẹ oghwọrọ rọ cha phia vwẹ ọke yena. (Jẹn. 6:13, 14, 22; 2 Pita 2:5) A vwẹ Mosis vwo mu ohwo ro che sun ihwo ri Jihova nẹ Ijipt. (Eyan. 3:10) Ihwo ri jẹgba yen ẹwẹn ọfuanfon mu vwo si Baibol na. (2 Tim. 3:16; 2 Pita 1:21) Dede nẹ Jihova reyọ eshare ri jẹgba vwo sun iruo rẹ aghwoghwo na nonẹna, ẹroẹvwọsuọ rẹ avwanre kpahen ukoko rọyen che se shekpotọ-ọ. Ukperẹ ọtiọyen, esegbuyota rẹ avwanre rhoma ganphiyọ kidie a riẹnre nẹ ababọ rẹ ukẹcha ri Jihova, ukoko na che se ru erọnvwọn eje ro ruẹ na-a. Oborẹ odibo rọ fuevun na rhiẹromrẹ re, tobọ vwẹ ọke rẹ ọgangan, djerephia nẹ ẹwẹn ọfuanfon na yen sun ayen. Nonẹna, ukoko ri Jihova rọhẹ otọrakpọ na mrẹ ebruphiyọ buebun re. Ọtiọyena, ofori nẹ a vwẹ ubiudu avwanre eje vwo bicha je vwẹrosuọ.

OBO RE SE VWO DJE ẸROẸVWỌSUỌ RẸ AVWANRE PHIA

¹² Idjerhe ọvo rẹ ihwo re vwo mu ẹdia vwẹ ukoko na vwo dje ẹroẹvwọsuọ rayen phia, ọyen ayen vwo rhiabọreyọ iruo ra vwọ kẹ ayen, ayen mi ji fuevun ruo gba. (Iruo 20:28) Kerẹ ighwoghwota rẹ Uvie na, avwanre nabọ vwobọ vwẹ aghwoghwo ri nẹ uwevwin kpo uwevwin, orhivwinbrura, ji yono ihwo Baibol na. (Mat. 24:14; 28:19, 20) Ofori nẹ e muegbe ji kpo uyono, isikoko vẹ eghwẹkoko rere a sa vwọ mrẹ erere vwo nẹ iyono sansan rẹ odibo rọ fuevun na vwọphia. Avwanre mrẹ erere gbidiki vwo nẹ eta rẹ ọbọngan ra vẹ iniọvo na ta kuẹgbe ọke re de siomakoko vwẹ emẹvwa.—Hib. 10:24, 25.

¹³ A da vwẹ oborẹ avwanre vwori vwo bicha ukoko na jẹ avwanre djephia nẹ a vwẹrosuọ. (Isẹ 3:9, 10) Avwanre da mrẹvughe nẹ iniọvo avwanre guọnọ ukẹcha, avwanre vwọphia kpakpata. (Gal. 6:10; 1 Tim. 6:18) Ẹguọnọ yen mu avwanre vwo ruo, kidie avwanre choma re vwo dje kẹ Jihova vẹ ukoko rọyen nẹ e vwo ọdavwaro kpahen emu esiri ro ru kẹ avwanre.—Jọn 13:35.

¹⁴ Avwanre ji djephia nẹ a vwẹroso ukoko na siẹrẹ e de biẹcha orhiẹn-ebro rọyen. Ọnana churobọ si a vwọ vwomakpotọ yan nene odjekẹ rẹ ihwo re vwo mu vwẹ ukoko na, kerẹ iniruo okinriariẹ vẹ ekpako na. Iniọvo nana je hẹ evo usun rẹ “isun” rẹ avwanre, ro fori nẹ e muọghọ kẹ je vwomakpotọ kẹ. (Hib. 13:7, 17) Ọ da tobọ dianẹ avwanre ghwe vwo ẹruọ rẹ oboresorọ ayen vwo brorhiẹn evo-o, avwanre riẹnre nẹ a da yan nene ayen, o che fierere kẹ avwanre. Ukuotọ rọyen, Jihova ko che bruba kẹ avwanre siẹrẹ avwanre da kerhọ rẹ Ota rọyen vẹ ukoko na. Vwẹ idjerhe tiọyena, ke se djephia nẹ avwanre vwomakpotọ kẹ Onini avwanre, Jesu Kri sti.

¹⁵ Avwanre ghini vwo oboresorọ ra vwọ vwẹroso odibo rọ fuevun na. Eshu rọ dia ọghẹnẹ rẹ akpọ na, davwẹngba rọyen eje ro vwo miovwo odẹ ri Jihova vẹ ukoko rọyen. (2 Kọr. 4:4) Wọ ro ufi rẹ Idẹbono-o! (2 Kọr. 2:11) Ọ riẹnre nẹ ọke ro chekọ e ki muo phiyọ ukpotọ ro jẹ oba evwo na “pha krẹkrẹ,” kọ davwẹngba rọyen eje ro vwo si idibo ri Jihova buebun vwo nẹ ẹbẹre rẹ Ọghẹnẹ. (Ẹvwọ. 12:12) Jẹ, ẹgbaẹdavwọn rẹ Eshu vwọ ganphiyọ na, e jẹ avwanre sikẹrẹ Jihova phiyọ. E jẹ a vwẹroso Jihova vẹ ugbo rọ wan vwọ ghẹrẹ ihwo rọyen nonẹna. E de ru ọtiọyen, oyerinkugbe avwanre vẹ iniọvo na kọ cha ganphiyọ.