Diesorọ Ọghẹnẹ Vwo jẹ Ẹrhovwo Evo Ẹkpahọnphiyọ?

Jihova Ọghẹnẹ rọ dia Ọsẹ avwanre rọhẹ odjuvwu vwo owenvwe ro vwo nyo ẹrhovwo avwanre. Ẹkẹvuọvo, o vwo erọnvwọn evo re sa nẹrhẹ o jẹ ẹrhovwo avwanre ẹkpahọnphiyọ. Die yen erọnvwọn nana, kẹ die yen ofori nẹ a kọnphiyọ ẹwẹn siẹrẹ a da nẹrhovwo? E jẹ a fuẹrẹn uchebro ri Baibol evo.

Ihwo rehẹ ishọshi ri se ẹrhovwo vwo nẹ ọbe rẹ ẹrhovwo.

“Ovwan da nẹ ẹrhovwo, wa ta ota ọvo asiava-a.”—Matiu 6:7.

Jihova guọnọre nẹ avwanre vwanriẹn ẹrhovwo ra riẹn kuyovwi-in, yẹrẹ e se nẹ ọbe cha-a. Ukperẹ ọtiọyen, ọ guọnọre nẹ ẹrhovwo rẹ avwanre nẹ ubiudu rhe. Mavọ yen oma che ru we siẹrẹ ugbeyan wẹn da vuẹ wẹ ota vuọvo kẹdẹ kẹdẹ? Omamọ rẹ igbeyan ta ota kuẹgbe vwo nẹ ẹwẹn cha. Avwanre da vwẹ eta romobọ avwanre vwọ nẹrhovwo rhe Ọghẹnẹ, jẹ avwanre reyọ kerẹ ugbeyan rẹ avwanre.

Ọshare ro nẹ enu jẹ ọ guọnọ rhie itikẹti rẹ ilọtri.

“Ovwan nọ, yẹ ovwan mrẹ-ẹ, fikiridie ovwan nọ chọ.”—Jems 4:3.

Ọghẹnẹ cha sa kpahenphiyọ ẹrhovwo avwanre siẹrẹ a da nọ kpahen orọnvwọn rọ guọnọre nẹ avwanre ru-u yẹrẹ avwanre vwo-o. Kerẹ udje, Jihova cha kpahenphiyọ ẹrhovwo rẹ ohwo ro phi idjogba jẹ o si avwanre orhọ kpahen urhuru evwo vẹ re vwo vwo imuẹro kpahen urhiẹvwe? (Aizaya 65:11; Luk 12:15) Jihova cha sa kpahenphiyọ ẹrhovwo tiọye-en! Ọghẹnẹ ke sa kpahenphiyọ ẹrhovwo avwanre, ofori nẹ oyare avwanre shephiyọ vẹ obo rọ vuẹ avwanre vwẹ Baibol na.

Olori rẹ ẹga rọ nẹrhovwo vwọ kẹ ẹko rẹ isodje.

“Ohwo ro ku erhọn kufia kẹ urhi enyo, ẹrhovwo ẹnẹ dede kẹ ẹgua kẹ.”—Isẹ 28:9.

Vwẹ Baibol na, Ọghẹnẹ kpahenphiyọ ẹrhovwo rẹ ihwo ri chukoku irhi rọye-en. (Aizaya 1:15, 16) Ọghẹnẹ ji rhi wene-e. (Malakae 3:6) Avwanre da guọnọ nẹ Ọghẹnẹ kpahenphiyọ ẹrhovwo avwanre, ofori nẹ a davwẹngba vwọ yọnrọn irhi rọyen. Kẹ ọ da rha dianẹ avwanre ru erọnvwọn re chọre vwẹ ọke ri jovwo vwo? Kẹ ọnana mudiaphiyọ nẹ Jihova rha cha kerhọ rẹ avwanre kakaka-a? Ẹjo! Ọghẹnẹ che vwo ghovwo avwanre siẹrẹ e de kurhẹriẹ je davwẹngba vwo ru obo ri je.—Iruo Rẹ Iyinkọn Na 3:19.

“Ohwo kohwo rọ tanẹ ọye si kẹre Ọghẹnẹ mi segbuyota nẹ ọ herọ nẹ ọye re hwa osa kẹ ayen otu re guọnerọ.”—Hibru 11:6.

Ẹrhovwo ghwa dia obo re ruẹ ẹwẹn rẹ ohwo vwo totọ siẹrẹ ofu de dje ohwo-o. Ọyena odjephia rẹ esegbuyota rẹ avwanre, ọ ke rha je dia ẹbẹre ọvo rẹ ẹga rẹ avwanre vwọ kẹ Ọghẹnẹ. Odibo Jems tare nẹ ohwo rọ nọre vwo “esegbuyota kpahe obo rọ nọre na,” ọ rha dia ọtiọye-en, e “jẹ ohwo yena roro nẹ ọye cha mrẹ emuọvo reyọ vwẹ obọ rẹ Ọrovwohwo-o.” (Jems 1:6, 7) Avwanre da guọnọ nẹ esegbuyota rẹ avwanre vwo kpahen Ọghẹnẹ ganphiyọ, ko fori nẹ a davwẹngba je ghwọrọ ọke vwo yono kpahọn womarẹ Baibol na. Ọyena cha nẹrhẹ a riẹn ọhọre rọyen, je nẹrhovwo vẹ imuẹro.