• Wọ Sa Dia Ugbeyan ri Jihova
    Vwo Omavwerhovwẹn Bẹdẹ!—Ọbe re Vwo Yono Baibol Na

    • Wọ Sa Dia Ugbeyan ri Jihova

      Jihova guọnọre nẹ wọ nabọ riẹn ọyen. Diesorọ? Ọ riẹnre nẹ wo de yono kpahen iruemu, idjerhe, vẹ ọhọre rọyen, ku wo che vwo ẹwẹn wọ vwọ dia ugbeyan rọyen. Wọ sa ghene dia ugbeyan rẹ Ọghẹnẹ? (Se Une Rẹ Ejiro 25:14.) Die wo se ru vwọ dia ugbeyan rọyen? Baibol na kpahenphiyọ enọ nana, o ji dje oboresorọ ọ vwọ dia obo re ma ghanre kparobọ ra vwọ dia ugbeyan ri Jihova.

      1. Die yen Jihova durhie uwe nẹ wo ru?

      “Si kẹrẹ Ọghẹnẹ, rere o si kẹrẹ owẹ.” (Jems 4:8) Die yen ọnana mudiaphiyọ? Jihova durhie uwe nẹ wọ rhe dia ugbeyan rọyen. Ihwo evo mrẹ bẹnbẹn rẹ ayen vwo roro nẹ ayen sa dia ugbeyan rẹ ohwo rẹ ayen mrẹ-ẹ, siẹvo kẹ Ọghẹnẹ komobọ. Vwẹ Baibol na, Jihova vuẹ avwanre kemu kemu ro fori nẹ a riẹn kpahen iruemu rọyen e se vwo sikẹrẹ. E de se ovuẹ rẹ Ọghẹnẹ rọhẹ Baibol na, oyerinkugbe avwanre vẹ ọ rọyen kọ cha ganphiyọ dede nẹ avwanre je mrẹ dẹvo-o.

      2. Diesorọ Jihova vwọ dia ugbeyan ro me yovwin wo se vwo?

      O vwo ohwo vuọvo ro vwo ẹguọnọ wẹn vwọ vrẹ Jihova-a. Ọ guọnọre nẹ oma vwerhen owẹ, wọ me je ta ota kẹ ọke wọ da guọnọ ukẹcha. Wọ sa vwẹ “ẹnwan wẹn ejobi vwọ ya, kidie ọye re vwẹ ẹro te we.” (1 Pita 5:7) Jihova muegbe ro vwo bicha igbeyan rọyen, bru ayen uche, je kerhọ rayen.—Se Une Rẹ Ejiro 94:18, 19.

      3. Die yen Jihova guọnọ mie igbeyan rọyen?

      Jihova vwo ẹguọnọ rẹ ihwo eje, “ẹkẹvuọvo ọ vwẹ ẹro sua ohwo rọ dia ọvwata.” (Isẹ 3:32) Jihova guọnọre nẹ igbeyan rọyen ru erọnvwọn ro niri nẹ i yovwirin, ayen me je kẹnoma kẹ obo ro niri nẹ e brare. Ihwo evo se no nẹ ayen che se ru ọtiọye-en. Ẹkẹvuọvo, Jihova vọnre vẹ arodọnvwẹ. O rhiabọreyọ ihwo ri ghini vwo ẹguọnọ rọyen re je davwẹngba rayen eje vwo ru obo ri je.—Une Rẹ Ejiro 147:11; Iruo Rẹ Iyinkọn Na 10:34, 35.

      HIẸ KODO

      Yono kpobarophiyọ kpahen obo wọ sa vwọ dia ugbeyan ri Jihova vẹ oboresorọ ọ vwọ dia ugbeyan ro me yovwin ru wo se vwo.

      4. Ebraham, ọyen ugbeyan ri Jihova

      Ikuegbe rẹ Ebraham (re ji se Ebram) rọhẹ Baibol na ghwe dje obo ro mudiaphiyọ ra vwọ dia ugbeyan rẹ Ọghẹnẹ. Se kpahen Ebraham vwẹ Jẹnẹsis 12:1-4. Ovwan ta ota kpahen enọ nana:

      • Die yen Jihova vuẹ Ebraham nẹ o ru?

      • Die yen Jihova ve kẹ?

      • Die yen Ebraham ru kpahen odjekẹ rẹ Jihova vwọ kẹ?

      5. Oborẹ Jihova guọnọ mie igbeyan rọyen

      O vwo erọnvwọn evo rẹ avwanre guọnọ mie igbeyan rẹ avwanre.

      • Die yen erọnvwọn evo wọ guọnọ mie igbeyan wẹn?

      Se 1 Jọn 5:3, ovwan ta ota kpahen onọ nana:

      • Die yen Jihova guọnọ mie avwanre?

      E ki se nyupho ri Jihova, ofori nẹ avwanre wene iruemu avwanre. Se Aizaya 48:17, 18, ovwan ta ota kpahen onọ nana:

      • Diesorọ Jihova vwọ guọnọ nẹ igbeyan rọyen ru ewene?

      Ohwo ro ruiruo rẹ ebanbọn vwẹ hẹmẹti vwọ kẹ ọrivẹ rọyen.

      Omamọ ugbeyan cha vuẹ avwanre kpahen erọnvwọn ri se fierere je sẹro rẹ avwanre. Ọtiọyen Jihova ruẹ kẹ igbeyan rọyen

      6. Oborẹ Jihova ruẹ kẹ igbeyan rọyen

      Jihova chọn igbeyan rọyen uko vwo chirakon rẹ ebẹnbẹn. Hworo IVIDIO na, ovwan ta ota kpahen onọ ro nenire.

      IVIDIO: Jihova Chọn Vwẹ Uko Mamọ Re (3:20)

      • Mavọ yen Jihova vwọ vwẹ ukẹcha kẹ aye rọhẹ ividio na vwo yerin ghene iroro rẹ obo re phia kẹ?

      Se Aizaya 41:10, 13, ovwan ta ota kpahen enọ nana:

      • Die yen Jihova veri nẹ o che ru vwọ kẹ igbeyan rọyen eje?

      • Wo rorori nẹ Jihova cha dia omamọ rẹ ugbeyan? Kẹ, diesorọ?

      Ihoho: Igbeyan re vwẹ ukẹcha kẹ ohwohwo. 1. Ọshare ọvo ro nene ọshare ọfa mu imẹjẹ. 2. Aye ọvo ro rhievun ta ota kẹ aye ọfa. 3. Ọshare ọvo rọ vwẹ ukẹcha kẹ ọshare ọfa rọ vwẹ urhe vwọ yan.

      Omamọ igbeyan chọn wẹ uko vwẹ ọke ofori. Jihova je cha chọn wẹ uko

      7. A vwọ dia ugbeyan ri Jihova, ofori nẹ e nene ta ota kugbe

      Otaẹtakuẹgbe siẹ igbeyan ivẹ kẹrẹ ohwohwo mamọ. Se Une Rẹ Ejiro 86:6, 11, ovwan ta ota kpahen enọ nana:

      • Mavọ yen a sa vwọ ta ota kẹ Jihova?

      • Mavọ yen Jihova vwọ ta ota kẹ avwanre?

      Ihoho: 1. Aye rọ nẹrhovwo. Oka ro nẹ enu. 2. Aye ro se Baibol na. Oka ro nẹ otọ.

      Avwanre ta ota kẹ Jihova womarẹ ẹrhovwo; kọ rha ta ota kẹ avwanre womarẹ Baibol na

      IHWO EVO TA: “E che se sikẹrẹ Ọghẹnẹ-ẹ.”

      • Ẹkpo ri Baibol vọ yen wo se vwo djephia nẹ a sa dia ugbeyan ri Jihova?

      ỌDJẸKOKO

      Jihova guọnọre nẹ wọ dia ugbeyan rọyen, ọ cha chọn wẹ uko vwo sikẹrẹ.

      Ẹrhomafuẹrẹn

      • Idjerhe vọ yen Jihova vwọ chọn igbeyan rọyen uko?

      • Diesorọ Jihova vwọ vuẹ igbeyan rọyen nẹ ayen ru ewene?

      • Wo rorori nẹ oborẹ Jihova guọnọ mie igbeyan rọyen gan nọ? Kẹ, diesorọ?

      Obo Wo Se Ru

      HIẸ GUỌNỌ

      Mavọ yen ugbeyan wẹn vẹ ọ ri Jihova se vwo wene akpeyeren wẹn?

      “Jihova Ọyen Ọghẹnẹ ro Fo Ẹriẹn” (Uwevwin Orhẹrẹ ri February 15, 2003)

      Yono obo wọ sa vwọ dia ugbeyan rẹ Ọghẹnẹ.

      “Mavọ Me sa Vwọ Dia Ugbeyan rẹ Ọghẹnẹ?” (Questions Young People Ask—Answers That Work, Ukori 2, uyovwinrota 35)

      Mrẹ oboresorọ aye ọvo vwo no nẹ akpeyeren rọyen rhi yovwinphiyọ kidie ọ vẹ Jihova ugbeyan.

      “Me Guọnọ Ghwu-u!” (Uwevwin Orhẹrẹ Ukeri 1 2017)

      Kerhọ rẹ oborẹ ighene ta kpahen Jihova.

      Die Yen O Mudiaphiyọ Ra Vwọ Dia Ugbeyan ri Jihova? (1:46)