A Vwọ Dia Omamọ rẹ Ohwo sa Nẹrhẹ E Yeren Akpọ rẹ Ofuvwegbe?

Vwẹ ikpe ujorin evo rhire na, ihwo buebun rorori nẹ a vwọ dia omamọ rẹ ohwo ji vwo omamọ rẹ uruemu yen sa nẹrhẹ ohwo yeren akpọ rẹ ofuvwegbe. Kerẹ udje, ihwo buebun vwẹ Asia rhọvwenphiyọ oborẹ ọgbaghwanre ọvo ra riẹn phiyọ Confucius (551-479 B.C.E.) tare: “Oborẹ wọ guọnọre nẹ e ru kẹ wẹ-ẹ, wo ruo kẹ ihwo efa-a.”a

OBORẸ IHWO BUEBUN RUẸ

Ihwo buebun ji vwo imuẹro nẹ omamọ rẹ uruemu yen sa nẹrhẹ e yeren akpọ rẹ ofuvwegbe. Ọnana kọ nẹrhẹ ayen davwẹngba vwo muọghọ, dje omamọ uruemu phia, riẹn ẹdia ro te ohwo vuọvo vwẹ akpeyeren je sẹro rẹ omamọ ẹwẹn obrorhiẹn. Aye ọvo re se Linh ohwo ri Vietnam da ta: “Mi vwo imuẹro nẹ me da fuevun je dia ohwo rẹ uyota, mi che yeren omamọ akpọ.”

Aye vuọvo na jẹ emu vwọ kẹ igbere vẹ ihwo ri jẹ uwevwin evwo.

Ihwo evo ru obo ri yovwirin fikirẹ obo re yono ayen vwẹ ẹga rayen. Ọshare ọvo re se Hsu-Yun rọ dia Taiwan da ta: “E yono uvwe nẹ siẹrẹ mi de ru obo ri yovwirin mi de ghwu ki mi kpo odjuvwu, mi de rhe ru obo re brare, ki mi kpo erhanre ra rioja.”

DIE YEN NURO RHE?

Oma bru aye na ku, ofu ji dje vwẹ oba rẹ ẹdẹ na jọ gbane oma rọyen mu oma.

Ghine uyota nẹ avwanre mrẹ erhuvwu siẹrẹ e de ru obo ri yovwirin vwọ kẹ ihwo efa. Ẹkẹvuọvo ihwo buebun re davwẹngba ayen vwo ru emu esiri vwọ kẹ ihwo efa, de rhi noso nẹ ọ dia ọkieje yen oborẹ ayen ruru na vwọ ghwa erhuvwu cha-a. Aye ọvo re se Shiu Ping rọ dia Hong Kong da ta: “Obo re phia kẹ vwẹ nẹrhẹ me mrẹvughe nẹ ọ dia ọkieje yen ihwo vwọ kpẹvwẹ ẹse rẹ wo ruru-u. Me davwẹngba mẹ eje vwọ vwẹrote orua mẹ ji ru obo ri yovwirin. Ẹkẹvuọvo, orọnvwe mẹ da rhe hra, ọshare mẹ da yanjẹ uvwe vẹ ọmọ mẹ vwo.”

Ihwo buebun re mrẹvughe nẹ ọ dia ihwo eje re tare nẹ ayen ga Ọghẹnẹ yen omamọ rẹ ihwo-o. Aye ọvo re se Etsuko rọ dia Japan da ta: “Me vwomaba ẹga ọvo, me da rhe dia ohwo ro sun ọrhuẹrẹphiyotọ rẹ ighene. O gbevwunu me vwọ mrẹ iruemu rẹ ọfanrhiẹn, re vwo sivwin ọrho kugbe re vwo mu igho rẹ ishọshi muẹ ghwọrọ.”

“Me davwẹngba mẹ eje vwọ vwẹrote orua mẹ ji ru obo ri yovwirin. Ẹkẹvuọvo, orọnvwe mẹ da rhe hra, ọshare mẹ da yanjẹ uvwe vẹ ọmọ mẹ vwo.”—SHIU PING, HONG KONG

Ọ da ihwo evo re nabọ muomaphiyọ ẹga rayen ji ru obo ri yovwirin kidie obo re brare ji te ayen oma. Ọnana yen obo re phia vwọ kẹ aye ọvo re se Van ohwo ri Vietnam, ọ da ta: “Kẹdẹ kẹdẹ yen me vwọ dẹ emamọ, idodo kugbe emuọre, me me reyọ ayen vwo ze vwọ kẹ esẹ mẹ ride ri ghwure vẹ ẹwẹn nẹ me cha mrẹ ebruba vwẹ obaro na. Dede nẹ mi ru erọnvwọn nana eje vwẹ ikpe buebun, ọshare mẹ ji shero ọga. Vwọba, ọmọtẹ mẹ rọhẹ ẹgbukpe 20 ro kpo isikuru vwẹ ẹkuọtọ ọfa de rhe ghwu.”

A VWỌ DIA OMAMỌ OHWO TERI-I

A vwọ dia omamọ ohwo ọyen obo re ghanre, ẹkẹvuọvo, ọyena ọvo cha sa nẹrhẹ e yeren akpọ rẹ ofuvwegbe-e. Diesorọ? Roro kpahen obo ri Baibol na tare.

Ọ DIA IHWO EJE YEN RU OBO RI YOVWIRI-IN

“Oruimwemwu ọvo guọghọ emu esiri buebun.”—AGHWOGHWO 9:18.

Ọ da tobọ dianẹ wọ davwẹngba wọ vwọ dia omamọ ohwo, iruemu ebrabra rẹ ihwo efa sa so okpetu kẹ wẹ. Kerẹ udje, wo nene odjekẹ sansan rẹ ihwo ri suẹn vwọphia uvwre ọke rẹ ọga ri COVID-19 vwọ hẹ otọ na, ọnana da nẹrhẹ wọ kẹnoma rere wo vwo jẹ ihwo efa esiẹkẹrẹ gan nọ. Jẹ, ọ da rha dianẹ ihwo efa rhọvwen nene odjekẹ na-a vwo? Iruemu rẹ ayen djephia sa so ọga kẹ ihwo efa re guọnọ ru obo ri yovwirin.

OROROCHỌ SA NẸRHẸ OBO RE DIA ERHUVWU YẸRẸ UMIOVWO REGHE OHWO

“Idjerhe ọvo herọ rọ pha yoyovwi vwẹ aro rẹ ohwo, ẹkẹvuọvo oba rọye kẹ idjerhe rẹ ughwu.”—ISẸ 14:12.

O vwo erọnvwọn buebun rẹ ihwo rure rẹ ayen rorori nẹ e gbare, ukuotọ rọyen dakẹ e chọre. Ọ da tobọ dianẹ ohwo vwo omamọ ẹwẹn, ọ da jẹ ojẹ rọ chọre, ọ cha rioja rẹ obo ri che nẹ obuko rọyen rhe.

AKPỌ BẸN ENO

“Yọ riẹn obo re cha phia vwẹ odẹ rọ cha na-a.”—JEMS 4:14.

Otoro oborẹ ohwo yovwin te-e, o ji se ghwu kpregede. Kerẹ udje, uvwre ọke rẹ ọga ri COVID-19 na, ihwo buebun yin ghwure ọke rẹ ayen vwọ davwẹngba vwọ chọn ihwo efa uko. Roro kpahen udje aye ọvo re se Liting vwẹ China rẹ ọsẹ rọyen ghwuru vwẹ asidẹnti. Ọ da ta: “Me riẹn oboresorọ ohwo vẹ arodọnvwẹ ọtiọyena vwo ghwu-u. Ọsẹ mẹ ọgbowian, ohwo rọ vwomakpotọ kugbe ohwo rẹ uyota. Ọyen ọvo yen ghwu vwẹ imoto na.”

Ọ da dianẹ ọ dia a vwọ dia omamọ ohwo ọvo yen cha nẹrhẹ e yeren omamọ akpọ-ọ, kẹ die? A sa vwọ kpahenphiyọ onọ yena, a guọnọ odjekẹ ra sa vwẹroso, kọyen obodẹn rẹ ovuẹ rọ sa kpahenphiyọ enọ avwanre ji dje idjerhe rẹ obo ra sa vwọ mrẹ akpọ rẹ ofuvwegbe. Tivọ yen a da sa mrẹ odjekẹ yena?

a Wọ da guọnọ evuẹ efa kpahen oborẹ Confucius yonori, gbe kpo ọbe na Mankind’s Search for God vwẹ uyovwinrota 7, ẹkoreta 31-35, rẹ Iseri ri Jihova teyenre, wọ je sa mrẹ vwẹ www.jw.org.