UYONO 46
Diesorọ A Vwọ Vwomakpahotọ ji Bromaphiyame?
Wọ vwomakpahotọ kẹ Jihova womarẹ wo vwo ve kẹ vwẹ ẹrhovwo nẹ ọyen ọvo wọ cha ga, ọhọre rọyen yen wọ cha vwọ kobaro vwẹ akpeyeren. (Une Rẹ Ejiro 40:8) Ukuotọ rọyen, wo de bromaphiyame. Ọnana ghwa odjephia nẹ wọ vwomakpahotọ kẹ Jihova nure. Omaẹvwọkpahotọ yen orhiẹn rọ ma ghanre rẹ ohwo se bru. Die yen se mu ohwo vwo brorhiẹn ọghanghanre yena ro wene akpeyeren rẹ ohwo?
1. Die yen mu ohwo vwọ vwomakpahotọ?
Ẹguọnọ yen mu ohwo vwọ vwomakpahotọ kẹ Jihova. (1 Jọn 4:10, 19) Baibol na da ta: “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe ogangan wẹn ejobi.” (Mak 12:30) Avwanre djephia nẹ e vwo ẹguọnọ rẹ Ọghẹnẹ womarẹ obo ra ta vẹ obo re ruẹ. Kirobo rẹ ọmọtẹ vẹ ọmọshare ri vwo ẹguọnọ rẹ ohwohwo rọvwọn ye, o ji fo nẹ ẹguọnọ ri Jihova mu avwanre vwọ vwomakpahotọ kẹ ji bromaphiyame.
2. Ebruphiyọ vọ yen Jihova vwọ kẹ Iseri rọyen ri bromaphiyame re?
Wo de bromaphiyame nu, wọ cha rhe dia ẹbẹre ọvo rẹ orua ri Jihova rẹ oma vwerhan. Wo che rhiẹromrẹ ẹguọnọ rọyen vwẹ idjerhe buebun, wo mi ji sikẹrẹ phiyọ. (Se Malakae 3:16-18.) Vwọba Jihova wo vwo ru Ọsẹ wẹn, wo che vwo orua rẹ iniọvo buebun vwẹ akpọneje ri vwo ẹguọnọ wẹn vẹ Jihova. (Se Mak 10:29, 30.) Vwọrẹ uyota, wọ cha jowọ evo tavwen wo ki bromaphiyame. Ofori nẹ wo yono kpahen Jihova, vwo ẹguọnọ rọyen, ji se Ọmọ rọyen gbuyota. Ukuotọ rọyen, kẹ wọ cha vwomakpahotọ kẹ Jihova. Wọ da jowọ nana nure, kẹ wo che bromaphiyame. Ọnana cha nẹrhẹ wọ dia idjerhe rọ cha kẹ wẹ omavwerhovwẹn bẹdẹ. Baibol na da ta: “[“Omaebrophiyame,” NW] sivwẹ ovwan vwẹ asakiephana.”—1 Pita 3:21.
HIẸ KODO
Roro kpahen oboresorọ ọ vwọ ghanre wọ vwọ vwomakpahotọ kẹ Jihova ji bromaphiyame.
3. Avwanre che brorhiẹn rẹ ohwo ra cha ga
Vwẹ Izrẹl awanre, ihwo rẹ Ọghẹnẹ rorori nẹ ayen sa ga Jihova vẹ Baal kugbe. Ẹkẹvuọvo, Jihova de ji ọmraro Ilaija yanran ra kpọ iroro rayen vi. Se 1 Ivie 18:21, ovwan ta ota kpahen onọ nana:
Orhiẹn vọ yen ihwo rẹ Izrẹl che bru?
Kerẹ ihwo rẹ Izrẹl, ofori nẹ avwanre brorhiẹn rẹ ohwo ra cha ga. Se Luk 16:13, ovwan ta ota kpahen enọ nana:
Diesorọ a cha sa ga Jihova vẹ ohwo yẹrẹ orọnvwọn ọfa kugbe-e?
Mavọ yen e se vwo dje kẹ Jihova nẹ ọyen e brorhiẹn ra vwọ ga?
4. Roro kokodo kpahen ẹguọnọ rẹ Jihova vwo kpahen owẹ
Jihova ruẹse buebun kẹ avwanre re. Die yen a sa vwọ kẹ? Hworo IVIDIO na.
Ọrhọ yen idjerhe evo rẹ Jihova vwo dje ẹguọnọ kẹ wẹ re? Se Une Rẹ Ejiro 104:14, 15 kugbe 1 Jọn 4:9, 10, ovwan ta ota kpahen enọ nana:
Ọvọ vwẹ usun rẹ okẹ rẹ Jihova vwọ kẹ wẹ yen ma nẹrhẹ wọ kpẹvwẹ?
Mavọ yen okẹ nana nẹrhẹ oma ru we kpahen Jihova?
A da kẹ wẹ okẹ rọ da wẹ aro mamọ, o muẹro nẹ wo che jẹ ohwo na riẹn nẹ okẹ na da wẹ aro. Se Urhi Rivẹ 16:17, ovwan ta ota kpahen enọ nana:
Wo de roro kpahen erọnvwọn eje rẹ Jihova ru kẹ wẹ re, die yen wọ guọnọ vwọ kẹ?
5. Omaẹvwọkpahotọ ghwa ebruphiyọ buebun cha
Ihwo buebun vwo imuẹro nẹ efe, omamọ rẹ iruo, yẹrẹ igho yen sa kẹ ohwo aghọghọ. Ọyena uyota? Hworo IVIDIO na, ovwan ta ota kpahen onọ ro nenire.
Dede nẹ ọshare rọhẹ ividio na vwo ẹguọnọ rẹ ibọrọ ẹfa, ẹdia vọ yen ọ da mrẹ oma rọyen?
O brorhiẹn rọ vwọ vwomakpahotọ kẹ Jihova, ọ dia ibọrọ na-a. Wo rorori nẹ omamọ rẹ orhiẹn yen o bruru na? Kẹ, diesorọ?
Bẹsiẹ ọyinkọn Pọl ke dia Onenikristi, ọ vwọtua iruo rode. O yono kpahen urhi rẹ ihwo ri Ju vwẹ otọ rẹ oyono ro titiri mamọ. Ẹkẹvuọvo, ọ kpairoro vrẹ ọyena rere ọ sa vwọ dia Onenikristi. Pọl viẹ idiekpọvwẹ? Se Filipae 3:8, ovwan ta ota kpahen enọ nana:
Diesorọ Pọl vwọ tanẹ oborẹ ọyen ruru tavwen ọ ke dia Onenikristi ọyen “isọn” yẹrẹ erhurhu?
Erere vọ yen ọ mrẹre vwẹ ukuotọ rọyen?
Mavọ yen wo ni ẹga ri Jihova phiyọ, wọ da vwọ vwanvwe erọnvwọn efa vwo rure vwẹ akpeyeren?
Ọke rẹ Pọl vwọ dia Onenikristi, ebruphiyọ rọ mrẹre vrẹ obo ro vwo ze
IHWO EVO TA: “Ọhọ herọ a vwọ vwẹ arhọ ohwo kpahotọ kẹ Ọghẹnẹ-ẹ.”
Diesorọ wo vwo roro nẹ ọhọ herọ a vwọ vwomakpahotọ vwọ kẹ Jihova?
ỌDJẸKOKO
Ẹguọnọ mu avwanre vwọ vwomakpahotọ vwọ kẹ Jihova ji bromaphiyame.
Ẹrhomafuẹrẹn
Diesorọ Jihova vwo fo ohwo re vwo ẹguọnọ okokodo kpahen je ga?
Mavọ yen Jihova vwọ hwosa kẹ idibo rọyen ri bromaphiyame re?
Wọ guọnọ vwomakpahotọ kẹ Jihova?
HIẸ GUỌNỌ
Mrẹ oboresorọ ọbuine ọvo vẹ ọdjonẹ ọvo vwọ vwomakpahotọ kẹ Jihova.
Enọ rẹ Ighene Nọ—Die Me Cha Vwẹ Akpeyeren Mẹ Vwo Ru?—Orhiẹn rẹ Ayen Bruru (6:54)
Roro kpahen erọnvwọn efa re sa nẹrhẹ wọ vwomakpahotọ
“Diesorọ Wọ Vwọ Vwomakpahotọ kẹ Jihova?” (Uwevwin Orhẹrẹ ri January 15, 2010)
Vwẹ uhworo rẹ ividio nana, mrẹ aghọghọ re se vwo siẹrẹ a da vwomakpahotọ kẹ Jihova.
Vwẹ ikuegbe rẹ “Ikpe Buebun Yen Mi Vwo Roro, ‘Diesorọ Akpeyeren Vwọ Dia Ọtiọna?’” vwo oniso rẹ obo ri mu aye ọvo vwọ fuẹrẹn obo rọ vwọ kobaro vwẹ akpeyeren.