UYONO 44
Erẹ Ejobi Yen Vwerhen Ọghẹnẹ Oma?
Jihova guọnọre nẹ avwanre riavwerhen rẹ akpeyeren ji re orẹ ọke evo. Ẹkẹvuọvo, erẹ vẹ omaerovwon eje yen vwerhọn oma? Mavọ yen e se vwo djephia nẹ e vwo ẹguọnọ ri Jihova vwẹ ẹdia nana?
1. Diesorọ erẹ buebun vwo tuẹ Jihova oma?
O se gbevwunu wọ vwọ riẹn nẹ erẹ buebun rẹ ihwo ruẹ hẹ Baibol na-a, ọ dia obọ rẹ Ọghẹnẹ yen erẹ na ji nurhe-e. Erẹ tiọyena se churobọ si ẹga efian yẹrẹ uruemu orhan. Ọke evo, e mu ayen kpahen uyono rẹ erhi ro ghwẹ-ẹ. E mu erẹ evo kpahen esia yẹrẹ imuẹro re vwo kpahen obo re tan rhe. (Aizaya 65:11) Jihova vwẹ orhọ-esio kẹ idibo rọyen: “Hẹriẹ oma nẹ ayen, . . . Wọ vwẹ obọ te emu ogbegbe-e.”—2 Kọrẹnt 6:17.a
2. Mavọ yen oma ru Jihova kpahen erẹ re vwo muọghọ rọ vrẹka vwọ kẹ ihworakpọ?
Jihova si avwanre orhọ nẹ e shufi rẹ iroro ra vwọ “vwẹ ẹro so ohwo rẹ akpọ” ghevweghe-e. (Se Jerimaya 17:5.) A vwẹ ọke rẹ omaerovwon evo vwo muọghọ kẹ isun yẹrẹ isodje. Efa re orẹ vwọ kẹ oka rẹ ẹkuotọ yẹrẹ ọke rẹ ẹkuotọ vwo vwo ugbomọphẹ. (1 Jọn 5:21) Ihwo efa titi oseghe usuon yẹrẹ oyan rayen. Mavọ yen oma che ru Jihova siẹrẹ avwanre de muọghọ rọ vrẹka vwọ kẹ ihworakpọ yẹrẹ ukoko ọvo, ma rho kẹ i ri titi iroro re fẹnẹ erọyen?
3. Iruemu vọ yen nẹrhẹ erẹ evo tuẹ Ọghẹnẹ oma?
Baibol na gha ‘udi ẹda vroma, ipati rọ vrẹka, kugbe ihwo rẹ idi muẹ.’ (1 Pita 4:3) Vwẹ erẹ evo, ihwo evo se suẹn oma raye-en, ayen ji gbe ọfanrhiẹn. A sa vwọ dia ugbeyan rẹ Ọghẹnẹ, ofori nẹ a kẹnoma kẹ iruemu ri jẹfuọn.
HIẸ KODO
Mrẹ oborẹ omamọ rẹ orhiẹn ru wo brẹ kpahen omaerovwon vẹ erẹ sa vwọ nẹrhẹ wo ru ọhọre ri Jihova.
4. Kẹnoma kẹ erẹ ri muọghọ vwọ kẹ Jihova-a?
Se Ẹfesọs 5:10, ovwan ta ota kpahen enọ nana:
Die yen ofori nẹ a riẹn ọke re de brorhiẹn rẹ orẹ re che vwobọ vwọ?
Erẹ vọ yen titiri vwẹ ekogho wẹn?
Wo rorori nẹ erẹ nana vwerhen Jihova oma?
Kerẹ udje, wo roro kpahen ẹro rẹ Ọghẹnẹ vwo ni orẹ rẹ ẹkarophiyọ rẹ ẹdẹ re vwiẹ ohwo jovwo re? O vwo ọke vuọvo rẹ Baibol na vwo djunute idibo ri Jihova ri ru orẹ rẹ ẹdẹ re vwiẹ ohwo-o, ẹkẹvuọvo ọ ta ota kpahen ihwo ivẹ re ga Jihova-a ri ru orẹ rẹ ẹkarophiyọ rẹ ẹdẹ re vwiẹ ohwo. Se Jẹnẹsis 40:20-22 kugbe Matiu 14:6-10. Ovwan ta ota kpahen enọ nana:
Mavọ yen orẹ rẹ ẹdẹ re vwiẹ ohwo ivẹ na vwọ họhọ ohwohwo?
Vwo nene ikuegbe na, ẹro vọ yen Jihova vwo ni orẹ rẹ ẹdẹ re vwiẹ ohwo?
Dedena, wo se roro, ‘O fiemu kẹ Jihova siẹrẹ mi de vwobọ vwẹ orẹ rẹ ẹdẹ re vwiẹ ohwo yẹrẹ erẹ efa ri Baibol na senre?’ Se Eyanno 32:1-8. Hworo IVIDIO na ovwan ta ota kpahen enọ ri nenire.
Diesorọ avwanre vwọ riẹn obo ri je Jihova?
Mavọ yen e se vwo ru ọtiọyen?
Obo ra sa vwọ riẹn sẹ orẹ na tuẹ Jihova oma
Iyono ri nẹ Baibol na rhe-e yen e muro kpahen? Wọ vwọ riẹn ẹkpahọnphiyọ na, fuẹrẹn otọ rọyen.
O muọghọ rọ vrẹka vwọ kẹ ihworakpọ, ukoko yẹrẹ oka rẹ ẹkuotọ? Avwanre muọghọ kẹ Jihova vrẹ kemu kemu, ọyen avwanre je vwẹroso nẹ ọ cha rhuẹrẹ ebẹnbẹn rẹ akpọ na phiyọ.
Irueru rọyen vwọso iwan ri Baibol? Ofori nẹ avwanre dia fuanfon ọkieje.
5. Chọn ihwo efa uko vwo muọghọ kẹ esegbuyota wẹn
Ọ sa bẹn ra vwọ sen ọke rẹ ihwo efa da tanẹ a vwomaba ayen vwo ru erẹ ri tuẹ Jihova oma. Nabọ dje orhiẹn-ebro wẹn kẹ ayen vwẹ idjerhe ona vẹ ọghọ. Wọ vwọ mrẹ obo wo se vwo ru ọtiọyen, hworo IVIDIO na.
Se Matiu 7:12, ovwan ta ota kpahen enọ nana:
Vwo nene ẹkpo ri Baibol na, ofori nẹ wọ vuẹ ihwo rẹ orua wẹn rehẹ ukoko na-a nẹ ayen kpairoro vrẹ orẹ ọvo?
Die yen wo se ru vwo phiuduphiyọ ihwo rẹ orua wẹn awọ nẹ dede nẹ wọ cha vwomaba ayen vwo ru orẹ na-a, wo ji vwo ẹguọnọ vẹ ọdavwẹ rayen?
6. Jihova guọnọ nẹ e vwo omavwerhovwẹn
Jihova guọnọre nẹ a vẹ ihwo rẹ orua kugbe igbeyan ghwọrọ ọke kugbe. Se Aghwoghwo 8:15, ovwan ta ota kpahen onọ nana:
Mavọ yen ẹkpo ri Baibol nana vwo djephia nẹ Jihova guọnọ nẹ e vwo omavwerhovwẹn?
Jihova guọnọ nẹ ihwo rọyen riakpọ je ghwọrọ ọke kugbe. Hworo IVIDIO na wọ vwọ mrẹ orugba rẹ eta nana vwẹ ọghwẹkoko rẹ akpọeje rẹ avwanre.
Se Galesha 6:10, ovwan ta ota kpahen enọ nana:
Ofori nẹ e ru orẹ ri titiri e ki se “ru emu esiri” kẹ ihwo efa?
Oka rẹ ẹse-eruo vọ yen che me je we, ọ ra gba wẹ ru vwẹ ẹdẹ orẹ gbanẹ ọ rẹ wo ruru ghwologhwolo?
Ọke evo, Iseri ri Jihova ru emu oghẹresan kẹ emọ rayen yẹrẹ tobọ ruẹse rẹ ayen rhẹro rọye-en kẹ ayen. Wo de vwo emọ, ọrhọ yen emu oghẹresan evo wo se ru kẹ ayen?
IHWO EVO TA: “Oborẹ orẹ na wan tonphiyọ torori-i. Obo re ma ghanre yen a vẹ igbeyan vẹ ihwo orua vwọ ghwọrọ ọke kugbe.”
Die yen wọ cha ta?
ỌDJẸKOKO
Jihova guọnọre nẹ a vẹ ihwo rẹ orua vẹ igbeyan ghwọrọ ọke kugbe. Dedena, ọ je guọnọ nẹ a kẹnoma kẹ erẹ ri tuoma.
Ẹrhomafuẹrẹn
Enọ vọ yen a sa nọ vwọ riẹn sẹ orẹ na tuẹ Jihova oma?
Mavọ yen a sa vwọ chọn igbeyan vẹ ihwo rẹ orua avwanre uko vwọ riẹn oboresorọ avwanre ruẹ erẹ na-a?
Mavọ yen wọ vwọ riẹn nẹ Jihova guọnọre nẹ e vwo omavwerhovwẹn je riakpọ kuoma?
HIẸ GUỌNỌ
Roro kpahen erẹ evo kiriguo rẹ Inenikristi ruẹ-ẹ.
“Diesorọ Iseri ri Jihova Ruẹ Erẹ Evo-o?” (Uyovwinrota rọhẹ jw.org)
Mrẹ erọnvwọn ẹne re nẹrhẹ e vwo imuẹro nẹ orẹ rẹ ẹkarophiyọ rẹ ẹdẹ re vwiẹ ohwo tuẹ Ọghẹnẹ oma.
“Diesorọ Iseri ri Jihova Ruẹ Orẹ rẹ Ẹdẹ re Vwiẹ Ohwo-o?” (Uyovwinrota rọhẹ jw.org)
Mrẹ oborẹ emọ ri vwo ẹguọnọ ri Jihova se vwo ru obo re vwerhọn oma vwẹ ọke rẹ omaerovwo.
Reyọ Ona Vwo Phi Ehwẹjẹ Kparobọ (11:35)
Inenikristi buebun brorhiẹn nẹ ayen che ru Ikrismasi-i. Mavọ yen oma ru ayen kpahen orhiẹn-ebro rayen na?
“Ayen Mrẹ Obo ri me Yovwin” (Uwevwin Orhẹrẹ ri December 1, 2012)
a Ni Eta rẹ Odjefiotọ 5 wọ mrẹ obo wo ru siẹrẹ ihwo efa da re orẹ.