• Uyono rẹ eghẹnẹ erha ri kuomagbe dia ọvo: Omarẹ ikpe 300 re vwo si Baibol na eje nu, ohwo ọvo ro vwo imuẹro kpahen uyono nana de si eta nana vwọba eta rehẹ 1 Jọn 5:7, “vwẹ odjuvwu, Ọsẹ na, Ota na, vẹ Erhi Ọfuanfon na: ayen erha na ọvo.” Ota nana hẹ evunrẹ Baibol rẹsosuọ na kakaka-a. Ohwo ro yono Baibol na kodo re se Bruce Metzger, da tanẹ, “Vwo nẹ ẹgbukpe ujorin esan rhe, a mrẹ eta nana mamọ vwẹ imanuskripti rẹ Old Latin vẹ [Latin] Vulgate.”

Ọrivẹ, imanuskripti buebun re herọ nonẹna chọn ihwo ri yono kpahen Baibol na uko vwọ mrẹ echobọ re herọ. Kerẹ udje, ilori ẹga yono ihwo nẹ Baibol rẹ ejajẹ rẹ Latin na vwo eta rehẹ Baibol ẹsosuọ na. Dedena, ayen phi eta re djunute vwẹ obenu na vwọba ọbe rẹ 1 Jọn 5:7. Osichọ nana je shọrọ ro King James Version! Kẹ die yen a mrẹre vwẹ imanuskripti efa? Bruce Metzger de si: “Eta ra vwọba [1 Jọn 5:7] tobọ hẹ evunrẹ Baibol rẹsosuọ na kakaka-a (Syriac, Coptic, Armenian, Ethiopic, Arabic, Slavonic), jokpanẹ ọ rẹ Latin na.” Kọyen nẹrhẹ King James Version ra rhoma si ukuko na vẹ Baibol efa vwo si eta nana no.