UYONO 6

Ẹkpo rẹ Baibol ra Nabọ Djefiotọ

Jọn 10:33-36

ỌDJẸKOKO: Wo ghwe se ẹkpo rẹ Baibol nẹ, wọ yan jovwo-o. Vwo imuẹro nẹ ihwo wọ ta ota kẹ na mrẹ oborẹ ẹkpo rẹ Baibol na vwo churobọ si obo wọ ta ota kpahan.

OBO RE CHE RUO WAN:

Jokaphiyọ eta evo. Wo de se ẹkpo rẹ Baibol nu, kanrunumu eta ri shekpahen obo wọ ta ota kpahan na. Wo se ru ọnana womarẹ wọ vwọ vwanriẹn eta yẹrẹ wọ vwọ nọ enọ re sa nẹrhẹ ihwo wọ ta ota kẹ na mrẹ ẹkpo na vughe.

Ọ da tobọ dianẹ wọ reyọ eta efa vwọ vwanriẹn ọhọ rẹ asan na, ji vwo imuẹro nẹ ihwo wọ ta ota kẹ na mrẹ oborẹ eta rẹ Baibol na vwo churobo si obo wọ ta na.
Kanrunumu ẹkpo na. Wọ da guọnọ se ẹkpo rẹ Baibol jẹ wọ guọnọ djunute oboresorọ wo che vwo se, gbe dje oborẹ eta rẹ asan na vwo churobọ si oboresorọ wo vwo se.

Jẹ Baibol wẹn rhiephiyọ ọke wọ da ta ota kpahen ẹkpo na. Ọnana cha nẹrhẹ ihwo na mrẹ oborẹ eta wẹn vwo churobo si asan wo seri na.
Djefiotọ lọlọhọ. Wo djunute eta efa ri churobọ si ẹkpo na-a. Vwo nene oborẹ ihwo na riẹn kpahen uyovwinrota na jovwo, gbe brorhiẹn rẹ evuẹ re cha nẹrhẹ ẹkpo na fiotọ, e se vwo vwo ẹruọ rọyen.