ENỌ RẸ IGHENE NỌ
E Vwo Vwo Igbeyan Buebun Vwẹ Intanẹti Ghanre?
Eghene aye re se Elaine da ta: “Ọke me da mrẹ emọ rẹ isikuru mẹ ri vwo igbeyan buebun vwẹ intanẹti, ki mi roro, ‘Ghwo—ayen titiriọ-ọ!’ Ẹkẹvuọvo, a vwọ ta uyota, me rioma kpahen ayen emerha.”
Oma ru we ọtiọyen jovwore? Ọ da dia ọtiọyen, uyovwinrota nana cha chọn wẹ uko vwọ kẹnoma kẹ ofudjevwe ro no cha siẹrẹ a da guọnọ titẹ vwẹ intanẹti.
Erhọ yen imuoshọ na?
Baibol na tare vwẹ Isẹ 22:1 nẹ, “odẹ esiri yovwi nọ efe buebu.” Ọtiọyena, e vwo vwo omamọ odẹ yẹrẹ ihwo efa vwo vwo ẹguọnọ wẹn dia obo re brare-e.
Ẹkẹvuọvo, urhurusivwe yena rẹ ihwo vwo vwo ẹguọnọ wẹn sa rhe gan tẹdia oma gbe cha vwerhen owẹ-ẹ, jokpa nẹ ku wo titiri. Imuoshọ se norhe? Onya rọhẹ ẹgbukpe 16 cha rhọvwenphiyọ:
“Me mrẹ ihwo ri ruẹ erọnvwọn ri se phi arhọ rayen phiyọ ẹdia rẹ imuoshọ—kerẹ e vwo pho nẹ ovakpo rẹ egenege vwẹ isikuru rẹ avwanre—kidie nẹ ayen guọnọ titi.”
Ihwo evo tobọ vidio rẹ oma rayen rẹ ayen vwo ruẹ erọnvwọn evo ri fori-i kidie nẹ ayen guọnọre nẹ edjedje rayen ni ayen so. Kerẹ udje, ighene buebun phi ividio rẹ ọke rẹ ayen vwọ re odja ra vwọ fọnrhọn emwa phiyọ evunrẹ intanẹti—orọnvwọn ro fori nẹ ohwo ru-u!
Baibol na da ta: “Ovwan vwẹ . . . omaẹkparọ vwo ruẹ emu vuọvo-o.”—Filipae 2:3, Good News Translation.
Obo re roro kpahen:
Mavọ yen e vwo titi vwẹ intanẹti ghanre te kẹ wẹ?
Wo che phi arhọ wẹn yẹrẹ omakpokpọ wẹn phiyọ ẹdia rẹ imuoshọ kidie nẹ wọ guọnọre nẹ igbeyan wẹn ni we so ji rhiabọreyọ owẹ?
“Ophiẹnvwe rẹ otitivwe”
Ọ dia ọkieje yen ihwo vwo ruẹ erọnvwọn ri se phi arhọ rayen phiyọ ẹdia rẹ imuoshọ kidie nẹ ayen guọnọ titi-i. Erica rọhẹ ẹgbukpe 22 vwo oniso rẹ ona ọfa ihwo evo vwo ruiruo:
“Ihwo buebun phi ifoto rẹ akpeyeren rayen eje phiyọ intanẹti, ayen mi ruo vwẹ idjerhe ọ da họhọ nẹ ayen vwo igbeyan ibuebun rẹ ayen nene ghwọrọ ọke kuẹgbe ọkieje. Ọnana kọ nẹrhẹ ihwo buebun roro nẹ ayen titiri mamọ.”
Cara rọhẹ ẹgbukpe 15 tare nẹ ihwo evo womarẹ efian rẹ ayen guẹn vwọ phiẹn ihwo vwevunrẹ intanẹti:
“Me mrẹ ihwo re reyọ ifoto re, ayen mi ruo kerẹsiẹ a da mrẹ nẹ ayen kpo ipati, jẹ evunrẹ uwevwin yen ayen hepha.”
Matthew rọhẹ ẹgbukpe 22 rhọnvwere nẹ ọyen ji ru emu tiọyen re:
“Mi phi ifoto phiyọ evunrẹ intanẹti, me da tanẹ Mount Everest ọyen me hepha jẹ mi ji tobọ te Asia dẹvo-o!”
Baibol na da ta: “Ruẹ emu rẹ ọghọ vwi kemu kemu ejobi.”—Hibru 13:18.
Obo re roro kpahen:
Wọ da reyọ sosha midia vwo ruiruo, wo guẹn efian rere wo se vwo titi?
Ifoto ru wo phiẹ phiyọ intanẹti vẹ oborẹ wo siẹ kpahan ayen dje oborẹ wo segbuyota vẹ oka rẹ ohwo ru wọ hepha phia?
Mavọ yen ihwo ri nene uwe vwẹ intanẹti vẹ i ri vwo ẹguọnọ oborẹ wo phiẹ phiyọ intanẹti ghanre te?
Ihwo buebun vwo imuẹro nẹ emuọvo rọ nẹrhẹ ohwo se titẹ vwẹ intanẹti, ọyen o vwo vwo ihwo buebun ri che nene, ọtiọyen ji te ihwo ri vwo ẹguọnọ obo ro phiẹ phiyọ intanẹti na. Matthew ra ta ota kpahen jovwore rhọnvwere nẹ o ji no ọtiọyen jovwo:
“Ke me nọ ihwo, ‘Bro ihwo yen nene uwe?’ yẹrẹ ‘Mavọ yen ihwo ri vwo ẹguọnọ oborẹ wo phiẹ phiyọ intanẹti bun te?’ Kidie nẹ me guọnọre nẹ ihwo ri nene uvwe vwẹ intanẹti bun, ki mi nene ihwo sansan vẹ ẹwẹn nẹ ayen che nene uvwe rhivwin. Mi de rhi vwo ubiurhuru mi vwo titi, sosha midia da nẹrhẹ ọ rhoma ganphiyọ.”
Re vwo titẹ vwẹ intanẹti pha kerẹ ibiskiti yẹrẹ iswiti rọ vwerhan jẹ ọ vọn evu-un
Maria rọhẹ ẹgbukpe 25 niroso nẹ ihwo evo nẹ oma rayen kueku yẹrẹ ghanghanre vwo nene uchihwo rẹ ayen vwori ri nene ayen vwẹ intanẹti vẹ i ri vwo ẹguọnọ oborẹ ayen phiẹ phiyọ:
“Siẹrẹ ọmọte de phi ifoto phiyọ intanẹti, ihwo buebun rhe vwo ẹguọnọ obo ro phi phiyọ-ọ, ko roro nẹ ọyen vwo erhuvwu-u. Ọyena ororochọ, jẹ a vwọ ta uyota, ihwo buebun ji che vwo oka rẹ iroro tiọyen siẹrẹ ayen da mrẹ oma rayen vwẹ ẹdia yena. Ọtiọyena, a sa tanẹ ayen shenyẹ oma rayen.”
Baibol na da ta: “E jẹ avwanre kparoma-a, e nene ohwohwo vwanvwa oma-a, a rioma kpahen ohwohwo-o.”—Galesha 5:26.
Obo re roro kpahen:
Wọ da reyọ sosha midia vwo ruiruo, wo niroso jovwore nẹ ọ nẹrhẹ wọ vwẹ oma wẹn vwọ vwanvwa ihwo efa?
Ichihwo ri nene uwe vwẹ intanẹti yen ma ghanre kẹ wẹ gbanẹ uvi rẹ oyerinkugbe vẹ ihwo ri ghini vwo ọdavwẹ wẹn?