Jẹ “Ogidi Erhanre” ri Jihova na Rha la Phiyọ

1. Mavọ yen Baibol na djisẹ rẹ uvi rẹ ẹguọnọ?

ẸGUỌNỌ “muẹ la kerẹ erhanre, ogidi erhanre rode gangan [ri Jihova]. Urhie rẹ ame se furhie ẹguọnọ-ọ, eye oghwe se sio divwẹ-ẹ.”b (Sol 8:​6, 7) Enana omamọ eta e vwo djisẹ rẹ uvi rẹ ẹguọnọ! Eta nana sa dia ọbọngan vwọ kẹ ihwo re rọvwọn re: Ovwan se vwo uvi rẹ ẹguọnọ kẹ ohwohwo.

2. Die yen ofori nẹ aye gbe ọshare ru rere ẹguọnọ rẹ ayen vwo kẹ ohwohwo vwo jẹ e djiro?

² Ọ guọnọ ẹgbaẹdavwọn ihwo re rọvwọn re se vwo vwo ẹguọnọ rẹ ohwohwo rhi duvwẹ ọke rẹ ayen cha dia akpọ kri te. Kerẹ udje, erhanre sa rha la ganphiyọ ọ da dianẹ e koko irhe phiyọ, e rhe ru ọtiọye-en erhanre na che fu. Ẹguọnọ rẹ aye vẹ ọshare vwo kẹ ohwohwo sa dia rhirin rhirin ọ da dianẹ ayen bọn oyerinkugbe rẹ ayen gan. Ọkievo, aye gbẹ ọshare se no nẹ ẹguọnọ rayen vwo kẹ ohwohwo djiro, marho ọ da dianẹ ayen hirharoku uweren ọgangan, jẹ oma ọkpokpọ evwo, yẹrẹ ebẹnbẹn ra vwọ ghẹrẹ emọ. Ọtiọyena ọ da dianẹ wọ rọvwọn re, mavọ wo se vwo ruo rere “ogidi erhanre” ri Jihova vwọ rha la phiyọ vwevunrẹ orọnvwe wẹn? Vwẹ uyono nana, a cha ta ota kpahen idjerhe erha wọ sa vwọ bọn oyerinkugbe wẹn gan je riavwerhen rẹ orọnvwe wẹn.c

BỌN OYERINKUGBE WẸN VẸ JIHOVA GANPHIYỌ ỌKIEJE

3. Mavọ yen oyerinkugbe ọkpẹkpẹkpẹ ra vẹ Jihova vwori sa vwọ chọn ihwo re rọvwọnre uko vwo vwo ẹguọnọ rẹ ohwohwo? (Aghwoghwo 4:12) (Ni uhoho na.)

³ Rere “ogidi erhanre” ri Jihova sa vwọ la phiyọ, aye gbẹ ọshare cha davwẹngba vwo ru oyerinkugbe rẹ ayen vẹ Jihova ganphiyọ. Mavọ yen oyerinkugbe nana sa vwọ chọn ayen uko vwevunrẹ orọnvwe rẹ ayen? Siẹrẹ aye gbẹ ọshare da vwẹ ẹro ọghanghanre vwo ni oyerinkugbe rẹ ayen vẹ ọsẹ rayen rọhẹ odjuvwu vwori, je reyọ odjekẹ rọyen vwo ruiruo, ọnana cha chọn ayen uko vwọ kẹnoma ji phi ebẹnbẹn rọ sa nẹrhẹ ẹguọnọ rayen djiro kparobọ. (Se Aghwoghwo 4:12.) Ihwo ri vwo oshọẹdjẹ ri Jihova cha davwẹngba vwọ vwẹrokere ji dje uruemu ri rhe re phia kerẹ uruemuesiri, edirin, kugbe evwoghovwo. (Ẹf 4:32–5:1) Aye gbẹ ọshare de vwẹ oka rẹ iruemu nana ọ cha nẹrhẹ ẹguọnọ rẹ ayen vwo kpahen ohwohwo ganphiyọ. Oniọvo aye re se Lena, rọ rọvwọnre vwẹ ikpe re vrẹ 25 re da ta: “Ọ pha lọlọhọ re vwo vwo ẹguọnọ ji muọghọ kẹ ohwo ro vwẹ oshọẹdjẹ ri Jihova.”

4. Diesorọ Jihova vwo sane Josẹf vẹ Meri nẹ e dia ọsẹ vẹ oni ri Mesaya na?

⁴ Roro kpahen udje ri Baibol ọvo. Ọke ri Jihova vwọ sane aye gbe ọshare re cha dia ọsẹ vẹ oni ri Mesaya na, Ọ da jẹ Josẹf vẹ Meri vwo nẹ ohri rẹ ihwo ri nẹ uvwiẹ ri Devid rhe. Diesorọ? Ayen ọvuọvo vwẹ oyerinkugbe ọkpẹkpẹkpẹ vẹ Jihova, Jihova je riẹn nẹ ayen cha vwẹ ọyen ka obaro vwẹ orọnvwe rayen. Ihwo re rọvwọn re, die yen ovwan se yono nẹ udje ri Josẹf vẹ Meri rhe?

5. Die yen eshare se yono mie Josẹf?

⁵ Ọkieje yen Josẹf vwọ yan nene odjekẹ ri Jihova, ọnana da nẹrhẹ ọ dia omamọ ọshare. Ọ da hanvwe abọ erha, yen Ọghẹnẹ reyọ odjekẹ ro shekpahen orua rọyen vwọ kẹ. Vwẹ ẹdia nana eje, o ru obo ri Jihova vuẹrẹ o toro obo rọ gan te-e. (Mt 1:​20, 24; 2:​13-15, 19-21) Kidie nẹ Josẹf nene odjekẹ rẹ Ọghẹnẹ, kọ sa chochọ ri Meri, bicha, je vwẹrote. Vwẹ ẹwẹn roro obo ri Meri che vwo ẹguọnọ ji muọghọ kẹ Josẹf te fikirẹ uruemu rọyen na! Eshare, ovwan sa vwẹrokere Josẹf womarẹ ovwan vwọ guọnọ odjekẹ ri Baibol ri shekpahen oborẹ ovwan sa vwọ vwẹrote orua rẹ ovwan.d Wọ da reyọ uchebro nana vwo ruiruo, o da tobọ dianẹ asan evo herọ ro fori nẹ wo de ru ewene, jẹ wo djephia nẹ wo vwo ẹguọnọ rẹ aye wẹn, wọ je guọnọ bọn oyerinkugbe rẹ ovwan gan. Oniọvo aye ọvo rọ dia Vanuatu, rọ rọvwọnre ikpe re vrẹ 20 re da ta: “Siẹrẹ ọshare mẹ de nene je reyọ odjekẹ rẹ Jihova vwo ruiruo, ọghọ mẹ vwọ kẹ kọ ganphiyọ. Ẹwẹn mẹ ko totọ kidie me vwẹroso orhiẹnbro rọyen.”

6. Die yen eya se yono mie Meri?

⁶ Meri vwo oyerinkugbe romobọ rọyen vẹ Jihova; ọ vwẹ esegbuyota rọyen vwọ ya Josẹfu-u. Ọ nabọ riẹn Isiesi Ọfuanfon na dẹn. Ọ je rhuẹrẹ ọke phiyọ ro vwo roro kpahen Isiesi Ọfuanfon na. (Lu 2:​19, 51) Aphro herọ-ọ, oyerinkugbe rọ vẹ Jihova gbe vwo yen nẹrhẹ ọ dia omamọ rẹ aye. Nonẹna, eya buebun davwẹngba ayen vwọ vwẹrokere Meri. Kere udje, oniọvo aye re se Emiko da ta: “Tavwen me ke rọvwọn, mi vwo ọke mi vwo ru uyono romobọ. Ẹkẹvuọvo me vwọ rọvwọn nu, kidie nẹ ọshare mẹ yen sun avwanre vwẹ ẹrhovwo je vwẹrote ẹga rẹ orua rẹ avwanre, ọnana da nẹrhẹ me vwẹ esegbuyota mẹ vwọ ya. Ke me rhe mrẹ nẹ ofori nẹ mẹvwẹ komobọ davwẹngba vwo ru oyerinkugbe mẹ vẹ Jihova ganphiyọ. Enẹna me rhuẹrẹ ọke phiyọ me vẹ Ọghẹnẹ vwo ta ota kuẹgbe womarẹ​—ẹrhovwo, isese ri Baibol, ji roro kpahen obo ri mi seri na.” (Ga 6:5) Eya, ovwan vwọ davwẹngba vwo ru oyerinkugbe rẹ ovwan vẹ Jihova ganphiyọ ye, ọshare wẹn ko che jiri uwe ji vwo ẹguọnọ wẹ vrẹ obo ri jovwo.​—Isẹ 31:30.

7. Die yen aye gbe ọshare se yono vwo nẹ uruemu ri Meri vẹ Josẹf vwọ ga Jihova kuẹgbe?

⁷ Josẹf vẹ Meri je wian kugbe ayen se vwo ru oyerinkugbe rẹ ayen vẹ Jihova ganphiyọ. Ayen riẹn obo rọ ghanre te ayen vwọ ga Jihova kugbe kerẹ orua. (Lu 2:​22-24, 41; 4:16) Ọnana sa dia bẹnbẹn kẹ ayen, marho orua na vwo rhuaphiyọ na, ẹkẹvuọvo ayen ji ruo ghene. Ọnana uvi rẹ udje vwọ kẹ ihwo re rọvwọnre nonẹna! Ọ da dianẹ wo vwẹ emọ, kerẹ Josẹf vẹ Meri, ọ sa bẹn kẹ wẹ wo vwo kpo uyono yẹrẹ rhuẹrẹ ọke phiyọ vwọ kẹ ega rẹ orua. Ọ sa dia bẹnbẹn vrẹ obo ri jovwo ovwan vwọ mrẹ ọke vwo ru uyono yẹrẹ nẹrhovwo kugbe kerẹ orua. Ẹkẹvuọvo, ovwan karophiyọ nẹ siẹrẹ ovwan da ga Jihova kuẹgbe, ovwan che sikẹrẹ ohwohwo phiyọ, oyerinkugbe rẹ ovwan vẹ Jihova kọ je cha ganphiyọ. Ọtiọyena we phi ẹga ri Jihova phiyọ ẹdia rẹsosuọ vwẹ akpeyeren.

8. Die yen aye gbe ọshare rẹ obẹnbẹn hẹ orọnvwe rayen se ru ayen vwọ mrẹ erere vọnvọn vwo nẹ ẹga rẹ orua rayen rhe?

⁸ Kọ da rha dianẹ ebẹnbẹn hẹ evunrẹ orọnvwe wẹn vwo? Ọ cha bẹn we vwo kuomakugbe vwo ru ẹga rẹ orua. Ọ da dia ọtiọyen, we gbe roro kpahen orọnvwọn ovwan ihwo ivẹ sa ta ota kpahen rọ je cha ghwe omavwerhovwẹn rhe. Ọnana sa nẹrhẹ ovwan vwo ẹguọnọ rẹ ohwohwo phiyọ ji vwo owenvwe ovwan vwọ ga Jihova kugbe.

GHWỌRỌ ỌKE KUGBE

9. Diesorọ o vwo fo nẹ aye gbe ọshare ghwọrọ ọke kugbe?

⁹ Ihwo re rọvwọnre, ovwan ji se ru ẹguọnọ rẹ ovwan ganphiyọ womarẹ ovwan vwọ ghwọrọ ọke kuẹgbe. Ovwan de ru ọtiọyen, ku wọ cha riẹn oborẹ ọrivẹ wẹn roro ji vwo ẹruọ rẹ ohwohwo phiyọ. (Jẹ 2:24) Vwo oniso rẹ obo ri Lilia vẹ Ruslan rhe mrẹvughe ọke rẹ ayen ghwa vwọ rọvwọn nu, omarẹ ẹgbukpe 15 re wanre. Ọ da ta: “Kẹ avwanre rhe mrẹvughe nẹ avwanre rha sa ghwọrọ ọke kuẹgbe kirobo rẹ avwanre ruẹ jovwo-o. Emọ rẹ avwanre, ewian rẹ uwevwin vẹ iruo keyen reyọ ọke rẹ avwanre eje. Avwanre rhe mrẹvughe nẹ a rha ghwọrọ ọke kugbe kerẹ aye gbe ọshare-e, ọ sa nẹrhẹ oyerinkugbe rẹ avwanre dogho.”

10. Mavọ yen ihwo re rọvwọnre sa vwọ reyọ odjekẹ rọhẹ Ẹfesọs 5:​15, 16 vwo ruiruo?

¹⁰ Die yen aye gbe ọshare se ru ayen vwọ ghwọrọ ọke kugbe? Ovwan sa rhuẹrẹ ọke phiyọ vwo ru ọtiọyen. (Se Ẹfesọs 5:​15, 16.) Oniọvo ọshare ọvo rọ dia Nigeria re se Uzondu da ta: “Mi de ru ọrhuẹrẹphiyotọ rẹ obo ri mi che ru, me rhuẹrẹ ọke phiyọ mẹvwẹ vẹ aye mẹ cha ghwọrọ kugbe, me je vwẹ uphẹn kẹ emu vuọvo nẹ o gbowọphiyọ-ọ.” (Flm 1:10) Roro kpahen oborẹ aye rẹ oniruo okinriariẹ ọvo re se Anastasia vwẹ Moldova, reyọ ọke rọyen vwo ruiruo vwẹ idjerhe ro fori. Ọ da ta: “Me davwẹngba vwọ wian owian rẹ uwevwin na siẹrẹ ọshare mẹ da wian owian rẹ ukoko. Ọtiọyena, kẹ avwanre sa ghwọrọ ọke kuẹgbe siẹrẹ avwanre de ru nu.” Kọ da rha dianẹ ọrhuẹrẹphiyotọ ovwan nẹrhẹ ọ bẹn ovwan vwọ ghwọrọ ọke kugbe vwo?

11. Ewian vọ yen Akuila vẹ Prisila ru kugbe?

¹¹ Ihwo re rọvwọn re se yono nẹ udje rẹ aye gbe ọshare re se Akuila vẹ Prisila, rẹ Inenikristi buebun vwẹ ẹgbukpe ujorin rẹsosuọ muọghọ kẹ. (Ro 16:​3, 4) Dede nẹ Baibol na ghwa vuẹ avwanre eta buebun kpahen orọnvwe raye-en, jẹ o djephia nẹ ayen ihwo ivẹ na wianre, ghwoghwo, ji kuomagbe vwẹ ukẹcha kẹ ihwo efa. (Iru 18:​2, 3, 24-26) Vwọrẹ uyota, kasan kasan ri Baibol na de djunute Akuila vẹ Prisila, e se odẹ rayen ihwo ivẹ kuẹgbe.

12. Die yen aye vẹ ọshare se ru rere ayen sa vwọ ghwọrọ ọke kugbe vrẹ obo ri jovwo? (Ni uhoho na.)

¹² Mavọ yen ihwo re rọvwọnre sa vwọ vwẹrokere Akuila vẹ Prisila? Roro kpahen erọnvwọn buebun ro fori nẹ wẹ vẹ ọrivẹ wẹn ru. Ovwan se ru erọnvwọn nana kugbe kerẹ aye gbe ọshare ukperẹ ohwo ọvo vwo ruo? Kerẹ udje, Aquila vẹ Priscilla ghwoghwota kugbe. Ovwan vwẹ ọrhuẹrẹphiyotọ ovwan vwo ru ọtiọyen ọkieje? Akuila vẹ Prisila je wian kugbe. Ọ sa dianẹ ọ dia iruo vuọvo yen owẹ vẹ ọrivẹ wẹn ruẹ-ẹ, jẹ ovwan sa wian owian rẹ uwevwin rẹ ovwan kugbe? (Agh 4:9) Ovwan da chọn ohwohwo uko vwọ wian owian, kẹ ovwan sa wian kugbe kerẹ orua ji vwo uphẹn ovwan vwọ ta ota kugbe. Ọ vrẹ ikpe 50 yen Robert vẹ Linda rọvwọn re. Ọ da ta: “Vwọrẹ uyota, avwanre ghwa mrẹ ọke vwọ heha kuẹgbe-e. Ẹkẹvuọvo siẹrẹ me da hworẹ imize jẹ aye mẹ riẹn ayen yẹrẹ me da gbodin vwẹ otafe ọ da rhe vwomaba vwẹ, ọ nẹrhẹ omavwerhovwẹn mamọ. Avwanre siẹkẹrẹ ohwohwo phiyọ siẹrẹ a da wian owian kuẹgbe. Ẹguọnọ rẹ avwanre kọ je ganphiyọ.”

13. Die yen ofori nẹ aye gbe ọshare ru rere oyerinkugbe rayen sa vwọ kpẹkpẹ phiyọ?

¹³ Karophiyọ nẹ, ọ dia aye gbẹ ọshare vwọ dia kugbe ọvo yen cha nẹrhẹ ayen sikẹrẹ ohwohwo phiyọ-ọ. Aye ọvo rọ dia Brazil da ta: “Nonẹna, erọnvwọn buebun ri se mu ẹwẹn ohwo reyọ sa nẹrhẹ e roro nẹ a ghwa vwọ hẹ uwevwin vuọvo na a ghwọrọ ọke kuẹgbe. Me rhe mrẹvughe nẹ a vwọ ghwọrọ ọke kugbe ọyen ẹbẹre ọvo. Ofa, o ji fo nẹ me davwerhọ rẹ ọshare mẹ.” Jokaphiyọ obo ri Bruno vẹ aye rọyen Tays ruru ayen vwọ davwerhọ rẹ ohwohwo. Ọ da ta: “Uphẹn rẹ avwanre vwọ ghwọrọ ọke kugbe da herọ, avwanre ki phi ifonu rẹ avwanre phiyọ akọkọ, rere avwanre sa vwọ ta ota kugbe.”

14. Die yen aye gbe ọshare se ru ọ da dianẹ ayen sa nabọ ghwọrọ ọke kuẹgbe-e?

¹⁴ Ẹkẹvuọvo, kọ da rha dianẹ wẹ vẹ ọrivẹ wẹ sa nabọ ghwọrọ ọke kuẹgbe vwo-o? Ọ sa dianẹ obo re kẹ ovwan omavwerhovwẹn fẹnẹre, yẹrẹ oborẹ ọrivẹ wẹn ruẹ tu we oma. Die yen wo se ru? Roro kpahen erhanre ra ta ota kpahen siẹvure. E de koko phiyọ ọ dia siẹvuọvo yen ọ ghwa vwo la ga-an. E vwo phi irhe phiyọ ememerha ye, kọ cha rhe la ganphiyọ. Vwẹ idjerhe vuọvo na, diesorọ ovwan rha ghwọrọ ọmọke kuẹgbe kẹdẹ kẹdẹ-ẹ? Ovwan davwẹngba vwo ru orọnvwọn rọ kẹ ovwan omavwerhovwẹn, ọ dia orọnvwọn rọ cha ghwa ẹghwọ rhe-e. (Jem 3:18) Ovwan vwo ruẹ ọnana ye, ẹguọnọ rẹ ovwan kọ cha rhoma ganphiyọ.

OVWAN BRỌGHỌ PHIYỌ OHWOHWO OMA

15. Diesorọ ọghọemuo vwọ dia obo re ghanre, siẹrẹ ihwo ivẹ re rọvwọnre da guọnọ nẹ ẹguọnọ rayen ganphiyọ?

¹⁵ Ọghọemu ghanre vwevunrẹ orọnvwe. Ọ pha kerẹ odju rọ nẹrhẹ erhanre nabọ la. Odju rha herọ-ọ, erhanre na kọ fobọ fuẹ. Vwẹ idjerhe vuọvo na, ọghọ rha herọ-ọ ẹguọnọ rẹ aye gbe ọshare kọ fobọ djiro. Jẹ, ẹguọnọ rẹ aye gbe ọshare cha ganphiyọ siẹrẹ ayen da davwẹngba vwo muọghọ kẹ ohwohwo. Karophiyọ nẹ ọ diẹ wo di vwo roro nẹ wo muọghọ kẹ ọrivẹ wẹn yen ota na-a, ẹkẹvuọvo ọrivẹ wẹn riẹnre nẹ wo ghini muọghọ vwọ kẹ? Ọ vrẹ ikpe 25 Penny vẹ Aret rọvwọn re. O da ta: “Kidie nẹ avwanre muọghọ kẹ ohwohwo ẹguọnọ da rhe dia uwevwin rẹ avwanre. Avwanre sa ta ota kẹ ohwohwo odedede kidie avwanre nẹ eta rẹ ohwohwo ghanghanre.” Ọtiọyena, die wo se ru ọrivẹ wẹn vwọ riẹn nẹ wo ghini muọghọ kẹ? Roro kpahen udje rẹ Ebraham vẹ Sera.

16. Die yen eshare se yono vwo nẹ udje rẹ Ebraham? (1Pita 3:7) (Ni uhoho na.)

¹⁶ Ebraham brọghọ phiyọ Sera oma. Ọ nabọ dje erorokẹ phia je kerhọ vwọ kẹ. Vwẹ ẹdẹ ọvo, ofu dje Sera, o da vuẹ Ebraham oborẹ oma ruo je vuẹ nẹ ọyen sorọ. Ophu mu Ebraham ọ da van kuo? Ẹjo. Ọ riẹnre nẹ Sera ọyen aye rọ vwẹ oma kpotọ ro ji biẹcha ọyen. Ebraham kerhọ vwọ kẹ Sera je davwẹngba vwọ rhuẹrẹ ebẹnbẹn na phiyọ. (Jẹ 16:​5, 6) Die yen ọnana yono avwanre? Eshare, ovwan vwẹ uturhi ovwan vwo brorhiẹn kẹ orua ovwan. (1Kọ 11:3) Jẹ, ọyen obo ri fori wo vwo nyo mie tavwen wo ki brorhiẹn, marho ọ da dianẹ orhiẹnbro na shekpahen aye wẹn. (1Kọ 13:​4, 5) Ọkiọvo, oma se bru aye wẹ ku, ọ me guọnọ vuẹ wẹ oborẹ oma ruo. Wọ nabọ vwẹ oma kpotọ kerhọ siẹrẹ ọ da ta ọdavwẹ rọyen? (Se 1Pita 3:7.) O dino te ẹgbukpe 30 yen Angela vẹ Dmitry rọvwọn re. O dje oborẹ ọshare rọyen brọghọ phiyọ ọyen oma wan: “Dmitry kerhọ kẹ vwẹ ọkieje ọ da dianẹ ophu mu vwe yẹrẹ me guọnọ ohwo me cha ta ota kẹ. O vwo edirin ọ da tobọ dianẹ eta mẹ na pha gbaigbai.”

17. Die yen eya se yono vwo nẹ udje ri Sera? (1Pita 3:​5, 6)

¹⁷ Sera muọghọ vwọ ke Ebraham womarẹ o vwo bicha orhiẹn rọyen. (Jẹ 12:5) Vwẹ ẹdẹ ọvo, Ebraham de brorhiẹn rọ vwọ ghọ erhorha rẹ ayen rhẹro rọye-en. Ọ vuẹ Sera nẹ ọ yanjẹ oborẹ ro ruẹ vwo rere ọ ra kake ikara buebun. (Jẹ 18:6) Kpatakpata Sera da ghwa yanran re ru oborẹ Ebraham vuẹrẹ nẹ o ru na. Eya, ovwan sa vwẹrokere Sera siẹrẹ ovwan de biẹcha orhiẹn rẹ eshare ovwan. Wo de ru ọtiọyen, jẹ wọ bọn orọnvwe wẹn gan. (Se 1Pita 3:​5, 6.) Dmitry, ra ta ota kpahen vwẹ ẹkorota re ghwe se nu na, dje oborẹ aye rọyen muọghọ kẹ wan. Ọ da ta: “Mi vwo ọdavwaro kpahen ẹgbaẹdavwọn rẹ Angela vwo biẹcha orhiẹnbro mẹ, ọ da tobọ dianẹ iroroẹjẹ avwanre rhọnvwe phiyọ ohwohwo-o. Erọnvwọn rhe shephiyọ dede-e, ọ reyọ ovwẹ vwo guẹdjọ-ọ.” Ọ pha lọlọhọ re vwo vwo ẹguọnọ rẹ ohwo ro muọghọ kẹ wẹ.

18. Erere vọ yen che norhe siẹrẹ ihwo ivẹ re rọvwọnre da wian kuẹgbe rere ẹguọnọ rayen vwọ ganphiyọ?

¹⁸ Nonẹna, Eshu guọnọre nẹ ẹguọnọ rọhẹ orọnvwe rẹ Inenikristi djiro. Ọ riẹnre nẹ ihwo ivẹ re rọvwọnre rhe vwo ẹguọnọ rẹ ohwohwo-o, ememerha na oyerinkugbe rayen vẹ Jihova ko che dogho. Ẹkẹvuọvo, uvi rẹ ẹguọnọ che se djiro-o! Ọtiọyena, e jẹ ẹguọnọ rọhẹ orọnvwe ovwan dia kerẹ o re djisẹ rọyen vwẹ Une ri Solomọn. Davwẹngba vwo phi Jihova phiyọ ẹdia rẹsosuọ vwẹ orọnvwe rẹ ovwan, ghwọrọ ọke kugbe, ji muọghọ kẹ ọdavwẹ rẹ ohwohwo. Wo de ru ọtiọyen, orọnvwe wẹ kọ cha ghwa ujiri rhe Jihova rọ dia Esiri rẹ uvi rẹ ẹguọnọ, kerẹ erharhe ra nabọ koko phiyọ, ẹguọnọ rẹ ovwan kọ cha ganphiyọ rhirin bẹdẹ.