Vhaefesa

5 Nga zwenezwo, ivhani vha edzisaho Mudzimu, sa vhana vha funwaho, 2 ni bvele phanḓa ni tshi tshimbila nga lufuno, vhunga na Kristo o ni funa a ḓikumedza sa tshiṱhavhelo tshi nukhelelaho phanḓa ha Mudzimu.

3 Vhupombwe na vhuyaḓa ha mifuda yoṱhe kana vhupangwa zwi songo vhuya zwa bulwa vhukati haṋu, ngauri hezwi zwithu a zwo ngo tea vhakhethwa; 4 vhuḓifari vhu shonisaho na u amba zwithu zwa vhutsilu kana miswaswo ya vhuḓabaḓaba ndi zwithu zwi songo teaho, fhedzi nṱhani hazwo ni livhuhe Mudzimu. 5 Ngauri ni a zwi ḓivha na u zwi ṱhogomela inwi vhaṋe, uri a hu na phombwe, kana mudzia-vhuyaḓa, kana mudzia-vhupangwa—zwine zwa amba u gwadamela midzimu ya zwifanyiso—ane a ḓo ḽa ifa ḽa muvhuso wa Kristo na wa Mudzimu.

6 Hu songo vha na muthu ane a ni fhura nga mafhungo a siho, ngauri zwenezwo zwithu ndi zwone zwine zwa ḓo ita uri mbiti dza Mudzimu dzi ḓele vha sa thetshelesi. 7 Ngauralo, ni songo ṱanganela navho; 8 ngauri u thomani no vha ni swiswini, fhedzi zwino ni tshedzani Murenani. Bvelani phanḓa ni tshi tshimbila sa vhana vha tshedza, 9 ngauri tshiaṋwiwa tsha tshedza tshi na mifuda yoṱhe ya vhuthu, u luga na ngoho. 10 Dzulani ni tshi ita vhungoho ha uri ndi zwifhio zwine Murena a zwi ṱanganedza; 11 ni litshe u ṱanganela kha mishumo i sa vhuyedzi ya swiswi, tshaṋu nga hu vhe u zwi bvisela khagala. 12 Ngauri zwithu zwine vha zwi ita tshiphirini zwi a shonisa na u tou zwi amba. 13 Huno zwithu zwoṱhe zwine zwa khou bviselwa khagala zwi vhonala tshedzani, ngauri tshiṅwe na tshiṅwe tshine tsha bviselwa khagala tshi vha tshedza. 14 Ndi ngazwo hu tshi pfi: “Karuwa, iwe wo eḓelaho, vuwa vhafuni, ndi hone Kristo a tshi ḓo u vhonetshela.”

15 Dzulani no fhaṱuwa uri ni si tshimbile sa matsilu, fhedzi ni tshimbile sa vhathu vho ṱalifhaho, 16 ni shumise tshifhinga tshaṋu nga vhuṱali, ngauri maḓuvha ndi mavhi. 17 Nga nṱhani ha zwenezwi, litshani u vha vhathu vha si na ṱhalukanyo, fhedzi bvelani phanḓa ni tshi pfesesa zwine Yehova a zwi funa. 18 Zwiṅwe hafhu, ni songo kambiwa nga waini ngauri i ḓo ita uri ni ḓifare nga nḓila i songo kunaho, fhedzi bvelani phanḓa ni tshi ḓadzwa nga muya mukhethwa. 19 Imbelani Mudzimu dzipsalme, ni mu rende na nga nyimbo dza lwa muya, ni tshi imbela Yehova mbiluni dzaṋu, 20 ni dzule ni tshi livhuha Mudzimu ane a vha Khotsi ashu kha zwoṱhe, dzinani ḽa Murena washu Yesu Kristo.

21 Muṅwe na muṅwe a ḓiite muṱuku kha muṅwe vhunga ni tshi ofha Kristo. 22 Vhafumakadzi nga vha ḓiṱukufhadzele vhanna vhavho vhunga vha tshi ḓiṱukufhadzela Murena, 23 ngauri munna ndi ṱhoho ya mufumakadzi wawe samusi Kristo e ṱhoho ya tshivhidzo, ndi ene ane a vha mutshidzi wa muvhili wonoyo. 24 Zwi re zwone ndi uri samusi tshivhidzo tshi tshi ḓiṱukufhadzela Kristo, na vhafumakadzi vha fanela u ḓiṱukufhadzela vhanna vhavho kha zwithu zwoṱhe. 25 Vhanna bvelani phanḓa ni tshi funa vhafumakadzi vhaṋu, samusi na Kristo o funa tshivhidzo nahone a ḓikumedzela tshone, 26 a tshi ita tshikhethwa a tshi kunakisa nga maḓi a ipfi ḽa Mudzimu, 27 a ita uri tshivhidzo tshi vhe tsho nakaho phanḓa hawe, tshi vhe tshi si na tshilavhi kana vhukhakhi kana zwithu zwo raloho, fhedzi tshi fanela uri tshi vhe tshikhethwa na tshi sa solei.

28 Nga yeneyi nḓila vhanna vha fanela u funa vhasadzi vhavho u fana na nḓila ine vha funa ngayo mivhili yavho. Ane a funa musadzi wawe u a ḓifuna ene muṋe, 29 ngauri a hu na muthu we a vhuya a vhenga muvhili wawe; fhedzi u a u kanzwa na u u ṱhogomela, u fana na zwine Kristo a zwi ita kha tshivhidzo, 30 ngauri ri miraḓo ya muvhili wawe. 31 “Ndi ngazwo munna a tshi ḓo ṱutshela khotsi awe na mme awe a nambatela musadzi wawe, nahone vhuvhili havho vha vha ṋama nthihi.” 32 Tshenetshi tshiphiri tshikhethwa ndi tshihulwane. Huno ndi khou ambela kha Kristo na tshivhidzo. 33 Naho zwo ralo, muṅwe na muṅwe waṋu a fune musadzi wawe samusi a tshi ḓifuna; kha ḽiṅwe sia, musadzi u fanela u ṱhonifha munna wawe nga ho dzikaho.