1 Yohane

4 Vhafunwa, ni songo tenda mulaedza muṅwe na muṅwe une wa nga wo hevhedzwa, fhedzi ni ṱolisise yeneyo milaedza ine ya nga yo hevhedzwa uri ni vhone arali i tshi bva ha Mudzimu zwa vhukuma, ngauri ho bvelela vhaporofita vhanzhi vha mazwifhi shangoni.

2 Mulaedza wo hevhedzwaho u bvaho ha Mudzimu ni ḓo u ḓivha nga heyi nḓila: Mulaedza muṅwe na muṅwe wo hevhedzwaho u ambaho nga ha uri Yesu Kristo o ḓa nga lwa ṋama u bva ha Mudzimu. 3 Fhedzi mulaedza muṅwe na muṅwe wo hevhedzwaho une u si ambe nga ha Yesu a u bvi ha Mudzimu. Zwiṅwe hafhu, ndi mulaedza wo hevhedzwaho wa mulwa-na-Kristo, we na pfa uri u ḓo vha hone, huno zwino wonoyo mulaedza wo no vha shangoni.

4 Vhana’nga, ni bva ha Mudzimu, nahone no kunda vhenevho vhathu, ngauri ane a vha na vhuthihi na inwi u fhira ane a vha na vhuthihi na shango. 5 Vha bva shangoni, ndi ngazwo vha tshi amba zwine zwa bva shangoni nahone shango ḽi a vha thetshelesa. 6 Ri bva ha Mudzimu. Ane a ḓivha Mudzimu u a ri thetshelesa; a sa bvi ha Mudzimu ha ri thetshelesi. Nga yeneyi nḓila ri a kona u ṱalula mulaedza wo hevhedzwaho wa ngoho kha mulaedza wo hevhedzwaho wo khakheaho.

7 Vhafunwa, kha ri bvele phanḓa ri tshi funana, ngauri lufuno lu bva ha Mudzimu, muṅwe na muṅwe ane a vha na lufuno o bebwa nga Mudzimu nahone u ḓivha Mudzimu. 8 A si na lufuno ha ḓivhi Mudzimu, ngauri Mudzimu ndi lufuno. 9 Ro dzumbululelwa lufuno lwa Mudzimu nga yeneyi nḓila, ngauri Mudzimu o ruma Murwa wawe mubebwa e eṱhe shangoni uri ri kone u wana vhutshilo ngae. 10 Lufuno lu nga heyi nḓila, a si riṋe vhe ra funa Mudzimu, fhedzi ndi ene we a ri funa, a rumela Murwa wawe uri a vhe tshiṱhavhelo tshi pfumelelaho zwivhi zwashu.

11 Vhafunwa, arali Mudzimu o ri funa nga yeneyi nḓila, na riṋe ri a kombetshedzea uri ri funane. 12 Haho we a vhuya a vhona Mudzimu naho hu lini. Arali ra bvela phanḓa ri tshi funana, Mudzimu u ḓo dzula e kha riṋe nahone lufuno lwawe lu ḓo itwa lwo fhelelaho kha riṋe. 13 Ri a zwi ḓivha uri ri dzula ri na vhuthihi nae na ene u dzula e na vhuthihi na riṋe, ngauri o ri ṋea muya wawe. 14 Zwiṅwe hafhu, riṋe ro vhona na u ṱanziela uri Khotsi o ruma Murwa wawe sa Mutshidzi wa shango. 15 Naho e nnyi ane a amba uri Yesu Kristo ndi Murwa wa Mudzimu, Mudzimu u dzula e na vhuthihi na muthu o raloho na onoyo muthu u vha na vhuthihi na Mudzimu. 16 Riṋe ri a zwi ḓivha na u tenda uri Mudzimu u a ri funa.

Mudzimu ndi lufuno, ane a dzula lufunoni u na vhuthihi na Mudzimu, na Mudzimu u na vhuthihi nae. 17 Nga yeneyo nḓila, lufuno lwo itwa uri lu vhe lwo fhelelaho kha riṋe, uri ri vhe na mbofholowo ya u amba nga ḓuvha ḽa khaṱulo, ngauri riṋe fhano shangoni ri nga onoyo. 18 A re na lufuno ha ofhi, fhedzi lufuno lwo fhelelaho lu pandela nyofho, ngauri nyofho dzi a ri thivhela. Vhukuma, ane a ofha ho ngo itwa o fhelelaho nga lufuno. 19 Ri a funa, ngauri ndi ene o thomaho u ri funa.

20 Arali muthu a tshi ri: “Ndi funa Mudzimu,” ngeno a tshi vhenga wahawe, ndi muzwifhi. Ngauri ane a si fune wahawe, ane a kona u mu vhona, a nga si fune Mudzimu ane a si kone u mu vhona. 21 Nahone yeneyi ndaela ro i wana khae, ya uri ane a funa Mudzimu u fanela uri a fune wahawe.