Dotoronomio

8 “U tevhedze nga vhuronwane ndaela dzoṱhe dzine nda khou u ṋea dzone ṋamusi uri u bvele phanḓa u tshi tshila,+ u ande u kone u dzhena u dzhie shango ḽe Yehova a anela vhomakhulukuku wau.+ 2 U humbule lwendo lulapfu lwe Yehova Mudzimu wau a ita uri u lu tshimbile miṅwaha ya 40 sogani,+ a tshi itela uri u ḓiṱukufhadze na u u linga+ u itela u ḓivha zwi re mbiluni yau,+ uri a vhone arali u tshi ḓo tevhedza ndaela dzawe kana u sa ḓo dzi tevhedza. 3 O u ṱukufhadza a ita uri u farwe nga nḓala,+ a u ṋea mana+ ye iwe na vhokhotsi au na vha ni sa i ḓivhi, uri ni ḓivhe uri muthu ha tshili nga zwiḽiwa* fhedzi, u tshila na nga maipfi oṱhe a bvaho mulomoni wa Yehova.+ 4 Zwiambaro zwau a zwo ngo ṱahala, na milenzhe yau a yo ngo zwimba miṅwahani yeneyo ya 40.+ 5 U a zwi ḓivha zwavhuḓi mbiluni yau uri Yehova Mudzimu wau o vha a tshi khou u khakhulula, samusi muthu a tshi khakhulula ṅwana wawe.+

6 “U vhulunge ndaela dza Yehova Mudzimu wau nga u tshimbila nḓilani dzawe na nga u mu ofha. 7 Ngauri Yehova Mudzimu wau u ḓo u isa shangoni ḽavhuḓi,+ shango ḽi re na milambwana* na zwisima zwi elelaho zwi tshi ya govhani na dzinguni ḽa dzithavhani, 8 shango ḽi re na goroi, baḽi, minḓirivhe, mihuyu na maphomagraneithi,+ shango ḽi re na miṱwari ya u ita mapfura na ḽi re na mutoli,+ 9 shango ḽo ḓalaho zwiḽiwa ḽine na sa ḓo shaya tshithu, shango ḽi re na matombo a u ita tsimbi na thavha dzaḽo dzine wa ḓo bwa koporo khadzo.

10 “Musi wo no ḽa wa fura, u rende Yehova Mudzimu wau we a u ṋea shango ḽavhuḓi.+ 11 U ṱhogomele uri u si hangwe Yehova Mudzimu wau, wa litsha u tevhedza ndaela dzawe, mahaṱulele awe na maitele awe zwine nda khou u ṋea zwone ṋamusi. 12 Musi wo no ḽa wa fura, wa fhaṱa nnḓu dzavhuḓi wa dzula khadzo,+ 13 musi kholomo dzau na nngu dzau dzi tshi anda na siḽiva na musuku zwau zwi tshi engedzea, wo ḓalelwa nga zwithu zwoṱhe, 14 u songo ḓikukumusa+ wa hangwa Yehova Mudzimu wau, we a u bvisa shangoni ḽa Egipita, nḓuni ya vhupuli,+ 15 we a ita uri u tshimbile sogani ḽihulu ḽi ofhisaho,+ ḽi re na ṋowa dzi re na vhuṱungu na dziphame na shango ḽo omaho. A ita uri maḓi a bve kha tombo+ 16 a u ṋea mana+ ngei sogani, ye iwe na vhokhotsi au na vha ni sa i ḓivhi, uri u ḓiṱukufhadze+ na u u linga uri u vhuyelwe tshifhingani tshi ḓaho.+ 17 Arali wa amba mbiluni yau wa ri: ‘Lupfumo holwu lwanga ndo lu wana nga maanḓa anga na nungo dzanga,’+ 18 u humbule uri ndi Yehova Mudzimu wau we a u ṋea maanḓa a uri u pfume+ uri a vhulunge mulanga wawe we a u anela vhomakhulukuku wau, samusi ni tshi khou zwi vhona ṋamusi.+

19 “Arali na vhuya na hangwa Yehova Mudzimu waṋu, na tevhela miṅwe midzimu na i shumela na u i gwadamela, ndi a ni vhudza ṋamusi uri ni ḓo fheliswa.+ 20 U fana na tshaka dze Yehova a dzi fhelisa ni tshi zwi vhona, na inwi ni ḓo fheliswa nga u ralo, ngauri a no ngo thetshelesa ipfi ḽa Yehova Mudzimu waṋu.+