Mishumo Ya Vhaapostola

16 A ya Derebe na Lisitara.+ Henefho ho vha hu na muṅwe mufunziwa we a vha a tshi pfi Timotheo,+ murwa wa mufumakadzi wa Muyuda wa mutendi, fhedzi khotsi awe o vha e Mugerika, 2 o vha a tshi ambiwa zwavhuḓi nga vhahawe vha Lisitara na Ikonio. 3 Paulo o vha a tshi ṱoḓa u tshimbila na Timotheo, a mu dzhia a mu fumbisa ngauri Vhayuda vhoṱhe vha henefho+ vho vha vha tshi zwi ḓivha uri khotsi awe ndi Mugerika. 4 Musi vha tshi khou tshimbila na yeneyo miḓi, vho vhudza vhatendi uri vha tevhedze mulayo we wa vhewa nga vhaapostola na vhahulwane ngei Yerusalema.+ 5 Zwivhidzo zwa ḓi bvela phanḓa zwi tshi khwaṱhiswa lutendoni na u engedzea ḓuvha ḽiṅwe na ḽiṅwe.

6 Vha pfuka nga Firigia na Galata,+ ngauri muya mukhethwa wo vha thivhela u amba ipfi ḽa Mudzimu vunduni ḽa Asia. 7 Musi vha tshi swika Misia, vha lingedza u dzhena Bithinia,+ fhedzi Yesu a vha thivhela a tshi shumisa muya mukhethwa. 8 Vha fhira* nga Misia, vha swika Tiroasi. 9 Paulo a vhona bono vhusiku, a vhona munna wa Makedonia o ima henefho a tshi khou mu humbela a tshi ri: “Iḓa ngeno Makedonia u ri thuse.” 10 Musi Paulo a tshi kha ḓi tou bva u vhona ḽeneḽo bono, ra lingedza u dzhena Makedonia, nge ra vhona uri Mudzimu u khou ri ruma henefho u itela u vha ḓivhadza mafhungo maḓifha.

11 Ra ṱuwa Tiroasi nga tshikepe ra ya Samotirake, fhedzi nga ḓuvha ḽi tevhelaho ra ya Neapoli; 12 u bva henefho ra ya Filipi,+ muḓini wa Roma,* une wa vha muḓi muhulu wa tshiṱiriki tsha Makedonia. Ra fhedza tshifhinga ri kha wonoyo muḓi. 13 Nga ḓuvha ḽa Savhatha ra bvela nnḓa ha muḓi ra ya tsini na mulambo, he ra vha ri tshi humbula uri ri ḓo wana fhethu hune ha rabelwa hone, ra dzula fhasi ra amba na vhafumakadzi vho kuvhanganaho henefho. 14 Muṅwe mufumakadzi ane a pfi Lidia, we a vha e murengisi wa zwiambaro zwa phephulu, we a vha a tshi dzula muḓini wa Thiathira+ na we a vha a tshi gwadamela Mudzimu, o vha o thetshelesa, Yehova* a vula mbilu yawe uri a pfe zwe Paulo a vha a tshi khou zwi amba. 15 Musi ene na vha muṱa wawe vho no lovhedzwa,+ a ri humbela a ri: “Arali no vhona uri ndi a fhulufhedzea kha Yehova,* iḓani ni dzule nḓuni yanga.” A ri luvhelela ra vhuya ra ya.

16 Ha ri ḽiṅwe ḓuvha ri tshi khou ya hune ha rabelwa hone, ra ṱangana na muṅwe mushumeli wa mufumakadzi we a vha e na dimoni ḽa u bvumba.+ O vha a tshi itela vhaṋe vhawe tshelede nga u bvumba. 17 Onoyo mufumakadzi o vha a tshi dzula a tshi tevhela Paulo na riṋe a tshi vhidzelela a tshi ri: “Havha vhanna ndi vhalanda vha Mudzimu Wa-Ṱaḓulu-ṱaḓulu,+ vha khou ni ḓivhadza nḓila ya u tshidzwa.” 18 O fhedza maḓuvha manzhi a tshi khou ita zwenezwo. Paulo a fheleledza o neta, a rembuluwa a amba na ḽeneḽo dimoni a ri: “Ndi ri ibva khae nga dzina ḽa Yesu Kristo.” Ḽeneḽo dimoni ḽa bva nga tshenetsho tshifhinga.+

19 Musi vhaṋe vhawe vha tshi vhona uri a hu tshee na iṅwe nḓila ya u wana tshelede,+ vha fara Paulo na Silasi vha vha kokodzela makete kha vhavhusi.+ 20 Vha vha isa kha vhomadzhisiṱaraṱa, vha swika vha ri: “Havha vhanna vha khou vusa bonyongo ḽihulu muḓini washu.+ Ndi Vhayuda, 21 vha khou funza milayo ine riṋe ri si fanele u i ṱanganedza kana u i tevhedza, nga nṱhani ha uri ri Vharoma.” 22 Vhathu vha vha sinyutshela, vhomadzhisiṱaraṱa vha kherula zwiambaro zwavho, vha amba uri vha rwiwe nga ṱhamu.+ 23 Musi vho no vha rwesa, vha vha isa dzhele, vha vhudza mulindi wa dzhele uri a vha linde vha si shavhe.+ 24 Nge a vha o laedzwa nga u ralo, a vha valela ngomu-ngomu ha dzhele, a pata milenzhe yavho nga mabulannga.

25 Fhedzi Paulo na Silasi vha rabela, vha renda Mudzimu na u mu imbela+ vhukati ha vhusiku, vhafariwa vho thetshelesa. 26 Nga u ṱavhanya ha vha na mudzinginyo muhulu, tshifhaṱo tsha dzinginyea. Nga khathihi fhedzi mavothi oṱhe a vulea, ngeḓane dza vhoṱhe vho farwaho dza vhofholowa.+ 27 Musi mulindi wa dzhele a tshi vuwa, a tshi vhona uri mavothi a dzhele o vulea, a bvisa banga a tshi ṱoḓa u ḓivhulaya, ngauri o vha a tshi humbula uri vhafariwa vho shavha.+ 28 Fhedzi Paulo a vhidzelela a ri: “U songo ḓihuvhadza, ngauri ri hone roṱhe!” 29 Mulindi wa dzhele a humbela uri hu ḓiswe mbone, a ya he ha vha hu na Paulo na Silasi a tshi khou tetemela, a gwadama phanḓa havho. 30 A vha bvisela nnḓa a ri: “Ndi ite mini uri ndi tshidzwe?” 31 Vhone vha ri: “Tenda Murena Yesu, ndi hone u tshi ḓo tshidzwa na vha muṱa wau.”+ 32 Vha mu funza ipfi ḽa Yehova* na vhoṱhe vha nnḓu yawe. 33 A ṱuwa navho nga honoho vhusiku, a vha ṱanzwa mbonzhe dzavho. Nga u ṱavhanya ene na vha muṱa wawe woṱhe vha lovhedzwa.+ 34 A vha isa nḓuni yawe a vha lugiselela zwiḽiwa, ene na vha muṱa wawe woṱhe vha takala zwihulu nge vha tenda Mudzimu.

35 Musi ḽo no tsha, vhomadzhisiṱaraṱa vha ruma vhaḓinḓa vha ri: “Vhofhololani vhenevho vhanna.” 36 Mulindi wa dzhele a vhudza Paulo zwe vha amba, a ri: “Vhomadzhisiṱaraṱa vho rumela vhathu uri ni vhofhololwe. Zwino ibvani ni ṱuwe nga mulalo.” 37 Fhedzi Paulo a ri: “Vho ri rwa phanḓa ha vhathu ri songo sengiswa naho ri Vharoma,+ vha ri isa dzhele. Naa zwino vha khou ri bvisa zwi sa ḓivhei? Kha vha tou ḓa vha ri bvise vhone vhaṋe.” 38 Vhaḓinḓa vha ya vha vhudza vhomadzhisiṱaraṱa zwe Paulo a zwi amba. Musi vha tshi pfa zwa uri vhenevho vhanna ndi Vharoma vha ofha.+ 39 Vha ḓa vha vha humbela pfarelo, vha vha bvisela nnḓa, vha vha humbela uri vha ṱuwe muḓini. 40 Vha bva dzhele vha ya nḓuni ya Lidia; musi vha tshi vhona vhahavho, vha vha ṱuṱuwedza+ vha kona u ṱuwa.