Bugu Ya Vhuvhili Ya Samuele

5 Nga u ya ha tshifhinga vha tshaka dzoṱhe dza Isiraele vha ḓa ha Davida ngei Heburoni+ vha ri: “Ri mashaka.+ 2 Zwiḽa kale musi Saulo e khosi yashu, ndi iwe we wa vha u tshi ranga phanḓa Vhaisiraele vha tshi ya nndwani.+ Yehova o amba na iwe a ri: ‘Ndi iwe ane wa ḓo lisa vhathu vhanga vha Isiraele, u ḓo vha murangaphanḓa wa Isiraele.’”+ 3 Ngauralo, vhahulwane vhoṱhe vha Isiraele vha ya ha khosi ngei Heburoni, Khosi Davida a vhofha mulanga navho+ phanḓa ha Yehova ngei Heburoni. Vha ḓodza Davida uri a vhe khosi ya Isiraele.+

4 Davida o vha e na miṅwaha ya 30 musi a tshi vha khosi, o vhusa miṅwaha ya 40.+ 5 O vhusa Vhayuda miṅwaha ya 7 na miṅwedzi ya 6 e Heburoni, o vhusa miṅwaha ya 33 e Yerusalema+ a tshi khou vhusa ḽoṱhe ḽa Isiraele na ḽa Yuda. 6 Khosi na vhanna vhe ya vha i navho vha ya Yerusalema uri vha lwe na Vhayebusi+ vhane vha dzula henefho shangoni. Vha goḓa Davida vha ri: “U nga si dzhene fhano! U ḓo pandelwa nga vha sa vhoni na vhaholefhali.” Vho vha vha tshi humbula uri: ‘Davida a nga si dzhene fhano.’+ 7 Naho zwo ralo, Davida a thuba fhethu ha vhushavhelo ha Tsioni, hune zwino ha vha Muḓi wa Davida.+ 8 Nga ḽeneḽo ḓuvha Davida a ri: “Vhathu vhane vha ṱoḓa u lwa na Vhayebusi vha dzhene nga mugeroni uri vha vhulaye ‘vhaholefhali na vha sa vhoni,’ vhane vha vhenga Davida!” Ndi ngazwo hu tshi pfi: “Vha sa vhoni na vhaholefhali vha nga si dzhene nḓuni.” 9 Davida a pfulutshela henefho fhethu ha vhushavhelo, hune ha vhidzwa* uri ndi Muḓi wa Davida; Davida a thoma u fhaṱa mbondo na zwiṅwe zwifhaṱo u mona nawo, u bva Tshikwarani*+ na huṅwe fhethu henefho muḓini.+ 10 Davida a bvela phanḓa a tshi vha na maanḓa,+ Yehova Mudzimu wa mavhuthu o vha e nae.+

11 Hiramu+ khosi ya Tiro a rumela vhaḓinḓa ha Davida uri vha dzudzanye u ḓisa thanda dza miṱaululo,+ vhavhaḓi vha mabulannga na vhatsheṱi vha mitsheṱo, vha thoma u fhaṱela Davida nnḓu.*+ 12 Davida o vha a tshi zwi ḓivha uri Yehova o mu vhea uri a vhe khosi ya Isiraele,+ o hulisa muvhuso wawe+ a tshi itela vhathu vhawe vha Isiraele.+

13 Davida o vhinga vhafumakadzi vhanzhi vha vhuimo ha fhasi*+ na vhaṅwe vhafumakadzi ngei Yerusalema musi o no vhuya Heburoni, Davida a vha na vharwa na vhananyana vhanzhi.+ 14 Madzina a vhana vhe a bebelwa vhone ngei Yerusalema ndi: Shamua, Shobaba, Nathani,+ Salomo,+ 15 Ibihara, Elishua, Nefege, Yafia, 16 Elishama, Eliada na Eliphelete.

17 Musi Vhafilisita vha tshi pfa uri Davida o ḓodzwa uri a vhe khosi kha ḽa Isiraele,+ Vhafilisita vhoṱhe vha gonya vha tshi khou ṱoḓa Davida.+ Musi Davida a tshi zwi pfa, a tsela fhasi fhethu hune zwa konḓa u hu swikelela.+ 18 Vhafilisita vha ḓa vha phaḓalala Govhani ḽa Refaimi.+ 19 Davida a vhudzisa Yehova+ a ri: “Naa ndi fanela u gonya uri ndi ye u lwa na Vhafilisita? Naa u ḓo vha kumedzela zwanḓani zwanga?” Yehova a amba na Davida a ri: “Gonya ngauri ndi ḓo kumedzela Vhafilisita zwanḓani zwau.”+ 20 Davida a ya Baali-perasimi, Davida a vha vhulayela henefho. Davida a ri: “Yehova o fhelisa maswina anga phanḓa+ hanga vhunga luvhondo lwo kumbiwaho nga maḓi.” Ndi ngazwo o ri henefho fhethu hu pfi Baali-perasimi.+ 21 Vhafilisita vha sia midzimu yavho ya zwifanyiso henefho, Davida na vhanna vhe a vha e navho vha zwi dzhia.

22 Nga murahu Vhafilisita vha dovha vha vhuya, vha phaḓalala Govhani ḽa Refaimi.+ 23 Davida a vhudzisa Yehova, fhedzi a mu fhindula a ri: “U songo gonya wo vha livha. Nṱhani hazwo, u vha mone nga murahu, u lwe navho phanḓa ha zwiṱaka zwa baka.* 24 Musi u tshi pfa mitsindo nṱha ha zwiṱaka zwa baka, u dzhie vhukando, ngauri Yehova u ḓo vha o u ranga phanḓa u tshi ya u vhulaya mmbi ya Vhafilisita.” 25 Ngauralo, Davida a ita zwe Yehova a mu laya, a vhulaya Vhafilisita+ u bva Geba+ u swika Gesere.+