Levitiko

27 Yehova a bvela phanḓa a tshi amba na Mushe a ri: 2 “Amba na Vhaisiraele u ri: ‘Arali muthu a ita muano+ wo khetheaho wa u ṋekedza mutengo wo anganyelwaho wa muthu kha Yehova, 3 mutengo wo anganyelwaho kha wa munna a re na miṅwaha ya 20 u ya kha ya 60 u ḓo vha shekele* dza 50 dza siḽiva u ya nga nḓila ine ha kalwa ngayo tshileme tsha shekele fhethu hukhethwa. 4 Fhedzi arali hu mufumakadzi, mutengo wo anganyelwaho u ḓo vha shekele dza 30. 5 Arali e na miṅwaha ya 5 u ya kha ya 20, mutengo wo anganyelwaho kha wa munna u ḓo vha shekele dza 20, kha wa mufumakadzi u ḓo vha shekele dza 10. 6 Arali e na ṅwedzi muthihi u ya kha miṅwaha miṱanu, mutengo wo anganyelwaho kha wa munna u ḓo vha shekele ṱhanu dza siḽiva, kha wa mufumakadzi u ḓo vha shekele tharu dza siḽiva.

7 “‘Arali e na miṅwaha ya 60 u ya nṱha, mutengo wo anganyelwaho kha wa munna u ḓo vha shekele dza 15, kha wa mufumakadzi u ḓo vha shekele dza 10. 8 Arali e mushai a sa koni u badela mutengo wo anganyelwaho,+ onoyo muthu u ḓo ya ha tshifhe, tshifhe u ḓo mu vhetshela mutengo. Tshifhe u ḓo vhea mutengo u ya nga hune onoyo muthu ane a khou ita muano a ḓo kona u u swikelela.+

9 “‘Arali muano u tshi katela tshifuwo tsho teaho u vha tshifhiwa tsha Yehova, tshiṅwe na tshiṅwe tshine a nga tshi ṋea Yehova tshi ḓo vha tshikhethwa. 10 Ho ngo fanela u dzhiulula tshavhuḓi a ḓisa tshi si tshavhuḓi kana a dzhiulula tshi si tshavhuḓi a ḓisa tshavhuḓi. Fhedzi arali a ḓisa tshiṅwe tshifuwo vhudzuloni ha tshiṅwe, zwenezwo zwifuwo zwoṱhe zwi ḓo vha zwikhethwa. 11 Arali tshi tshifuwo tshi re na tshika+ tshine tsha sa ḓo ṋekedzwa Yehova, u ḓo imisa tshifuwo tshenetsho phanḓa ha tshifhe. 12 Tshifhe u ḓo vhea mutengo watsho, u ya nga uri ndi tshavhuḓi kana a si tshavhuḓi. Mutengo wo anganyelwaho nga tshifhe u ḓo dzula wo ralo. 13 Fhedzi arali a tshi ṱoḓa u tshi rengulula, u tea u engedza tshithihi tsha zwiṱanu tsha mutengo watsho wo anganyelwaho.+

14 “‘Arali munna a ṋekedza nnḓu yawe sa tshithu tshikhethwa kha Yehova, tshifhe u ḓo vhea mutengo wayo, zwi tshi ya nga uri ndi yavhuḓi kana a si yavhuḓi. Mutengo we tshifhe a u vhea u ḓo dzula wo ralo.+ 15 Fhedzi arali muthu we a ita uri nnḓu yawe i vhe khethwa a tshi ṱoḓa u i rengulula, u tea u engedza tshithihi tsha zwiṱanu tsha tshelede ya mutengo wo anganyelwaho, i ḓo vha yawe.

16 “‘Arali muthu a ita uri tshiṅwe tshipiḓa tsha tsimu yawe tshi vhe tshikhethwa kha Yehova, mutengo wo anganyelwaho wa tsimu u ḓo lingana na mbeu ine ya ṱoḓea uri i zwalwe: homere* ya mbeu ya baḽi i ḓo vha shekele dza 50 dza siḽiva. 17 Arali a ita uri tsimu yawe i vhe khethwa u bva nga Ṅwaha wa Mbofholowo,+ mutengo wo anganyelwaho u dzula wo ralo. 18 Arali a ita uri tsimu yawe i vhe khethwa nga murahu ha Ṅwaha wa Mbofholowo, tshifhe u ḓo vhalela mutengo zwi tshi ya nga miṅwaha ye ya sala u swika nga Ṅwaha wa Mbofholowo u tevhelaho, mutengo wo anganyelwaho u fhungudzwe.+ 19 Fhedzi arali we a ita uri yeneyo tsimu i vhe khethwa a i rengulula, u tea u engedza tshithihi tsha zwiṱanu tsha tshelede ya mutengo wo anganyelwaho, i ḓo dzula i yawe. 20 Arali a sa i rengulula, ya rengiselwa muṅwe, i nga si tsha dovha ya rengululwa. 21 Musi tsimu i tshi humiselwa murahu nga Ṅwaha wa Mbofholowo i ḓo vha tshithu tshikhethwa kha Yehova, sa tsimu ye ya kumedzwa khae. I ḓo vha thundu ya vhotshifhe.+

22 “‘Arali a ita uri tsimu ye a i renga ine i si vhe ifa ḽawe i vhe khethwa kha Yehova,+ 23 tshifhe u ḓo mu vhalela mutengo wayo u swika nga Ṅwaha wa Mbofholowo, u ḓo mu ṋea mutengo wo anganyelwaho nga ḽeneḽo ḓuvha.+ Ndi tshithu tshikhethwa kha Yehova. 24 Nga Ṅwaha wa Mbofholowo tsimu i ḓo humiselwa kha we a i renga khae, ane a vha muṋe wa tsimu.+

25 “‘Mutengo muṅwe na muṅwe u fanela u anganyelwa u ya nga nḓila ine ha kalwa ngayo tshileme tsha shekele fhethu hukhethwa. Shekele i fanela u lingana na gera* dza 20.

26 “‘Naho zwo ralo, a hu na muthu ane a fanela u ita uri matanzhe a zwifuwo a vhe makhethwa, samusi zwo bebwa zwi matanzhe kha Yehova.+ Hu sa londwi uri ndi mboho kana ndi nngu, yo no vha ya Yehova.+ 27 Arali tshi tshiṅwe tsha zwifuwo zwi re na tshika, a tshi rengulula u ya nga mutengo wo anganyelwaho, a engedze tshithihi tsha zwiṱanu tsha mutengo watsho.+ Fhedzi arali tshi songo rengululwa, tshi ḓo rengiswa u ya nga mutengo wo anganyelwaho.

28 “‘Fhedzi hu songo vha na tshithu tsho kumedzwaho tshine muthu a tshi kumedzela tshoṱhe kha Yehova tshi tshi bva kha thundu yawe tshine tsha rengiswa kana tsha rengululwa, hu sa londwi uri ndi muthu kana ndi zwifuwo kana ndi tsimu yawe. Tshiṅwe na tshiṅwe tsho ṋekedzwaho ndi tshikhethwa-khethwa kha Yehova.+ 29 Zwiṅwe hafhu, a hu na muthu o kumedzwaho u fheliswa ane a nga rengululwa.+ Nga a vhulawe.+

30 “‘Tshafumi+ tsha tshiṅwe na tshiṅwe kha shango, hu sa londwi uri tshi bva kha zwibveledzwa zwa tsimuni kana kha mitshelo ndi tsha Yehova. Ndi tshikhethwa kha Yehova. 31 Arali muthu a ṱoḓa u rengulula tshipiḓa tshithihi kha zwa fumi, a engedze tshithihi tsha zwiṱanu tsha mutengo watsho. 32 Ni ṋee Yehova tshafumi kha zwifuwo zwaṋu, musi mulisa a tshi vhala* zwifuwo zwawe, a vhetshele thungo tshifuwo tsha vhufumi uri tshi vhe tsha Mudzimu. Tshifuwo tshiṅwe na tshiṅwe tsha vhufumi ndi tshikhethwa. 33 Ho ngo fanela u tshi ṱola hu sa londwi uri ndi tshavhuḓi kana a si tshavhuḓi, ho ngo fanela u ḓisa tshiṅwe vhudzuloni hatsho. Fhedzi arali a ḓisa tshiṅwe tshifuwo vhudzuloni ha tshiṅwe, zwenezwo zwifuwo zwoṱhe zwi ḓo vha zwikhethwa.+ A tsho ngo fanela u rengululwa.’”

34 Hedzi ndi ndaela dze Yehova a dzi ṋea Mushe na Vhaisiraele ngei Thavhani ya Sinai.+