Esitere
3 Nga murahu ha zwenezwo, Khosi Ahasiverosi a hulisa Hamani+ murwa wa Hamedatha wa Muagagi,+ a mu hulisa nga u ita uri khuluṋoni yawe i fhire dza vhaṅwe vharangaphanḓa vhoṱhe vha re nae.+ 2 Vhashumeli vhoṱhe vha khosi vha re khoroni ya khosi vho vha vha tshi losha Hamani, ngauri khosi yo laedza uri vha mu ṱhonifhe. Fhedzi Maradokai a hana u mu losha. 3 Vhashumeli vha khosi vha re khoroni ya khosi vha amba na Maradokai vha ri: “Ndi ngani u tshi khou nyadza ndaela ya khosi?” 4 Vho vha vha tshi mu vhudzisa ḓuvha ḽiṅwe na ḽiṅwe, fhedzi a sa vha thetshelesi. Vha vhudza Hamani eneo mafhungo uri a vhone arali a tshi nga konḓelela zwe Maradokai a vha a tshi khou zwi ita;+ ngauri o vha vhudza uri u Muyuda.+
5 Musi Hamani a tshi vhona uri Maradokai u khou hana u mu losha, Hamani a sinyuwa nga maanḓa.+ 6 Fhedzi a si takalele muhumbulo wa uri a fhelise Maradokai e eṱhe, ngauri vho vha vho mu vhudza nga ha vhathu vha ha Maradokai. Hamani a thoma u elekanya uri a fhelise Vhayuda vhoṱhe vha re muvhusoni woṱhe wa Ahasiverosi, vhane vha vha vhathu vha ha Maradokai.
7 Nga ṅwedzi wa u thoma, une wa vha ṅwedzi wa Nisani,* nga ṅwaha wa vhu 12+ wa vhuhosi ha Khosi Ahasiverosi, vha ita madeṅwa+ phanḓa ha Hamani uri hu wanwe ḓuvha na ṅwedzi, ḽa wela kha ṅwedzi wa vhu 12, une wa vha Adari.*+ 8 Hamani a amba na Khosi Ahasiverosi a ri: “Hu na vhaṅwe vhathu vho balanganaho vhukati ha vhathu+ vha re mavunduni* oṱhe a muvhuso wau,+ vhane milayo yavho yo fhambana na ya vhaṅwe vhathu vhoṱhe; a vha thetshelesi milayo ya khosi, a zwo ngo tea uri khosi i sokou zwi litsha. 9 Arali khosi i tshi zwi takalela, nga hu ṅwaliwe mulayo wa uri vha fheliswe. Ndi ḓo badela vhaḓinḓa talente* dza siḽiva dza 10 000 uri dzi dzheniswe mbulungeloni ya musanda.”*
10 Khosi ya bvula rinngi yayo ya u swaya+ tshanḓani tshayo ya i ṋekedza Hamani+ murwa wa Hamedatha wa Muagagi,+ we a vha e swina ḽa Vhayuda. 11 Khosi ya amba na Hamani ya ri: “Wo ṋewa siḽiva na vhathu uri u vha ite zwine wa vhona zwo tea.” 12 Ha vhidzwa vhaṅwaleli vha khosi+ nga ḓuvha ḽa vhu 13 ḽa ṅwedzi wa u thoma. Vha ṅwala zwoṱhe+ zwe Hamani a laedza magota a khosi, vhavhusi vha mavundu* na vharangaphanḓa vha vhaṅwe vhathu, kha vundu* ḽiṅwe na ḽiṅwe ya rumela nga kuṅwalele kwa henefho na luambo lwa henefho. Zwenezwo zwa ṅwaliwa nga dzina ḽa Khosi Ahasiverosi zwa gandiswa nga rinngi ya khosi ya u swaya.+
13 Vhaḓinḓa vha isa eneo marifhi mavunduni* oṱhe a khosi, e na ndaela ya uri nga ḓuvha ḽithihi hu fheliswe, hu vhulawe Vhayuda vhoṱhe, vhaṱuku na vhahulwane, vhana na vhafumakadzi, nga ḓuvha ḽa vhu 13 nga ṅwedzi wa vhu 12, une wa vha ṅwedzi wa Adari,+ na uri hu dzhiiwe thundu dzavho.+ 14 Mafhungo a honoho vhurifhi a vhe mulayo vunduni* ḽiṅwe na ḽiṅwe na uri u ḓivhadzwe vhathu vhoṱhe uri vha ḓilugiselele ḽeneḽo ḓuvha. 15 Vhaḓinḓa vha ṱuwa nga u ṱavhanya+ vho rumiwa nga khosi; wonoyo mulayo wa ḓivhadzwa pfamoni* ya ngei Shushani.*+ Khosi na Hamani vha dzula vha nwa, fhedzi muḓini wa Shushani* ho vha ho vuwa vilinga.