Ekisoda

25 Yehova a amba na Mushe a ri: 2 “Vhudza vhathu vha Isiraele uri vha nkuvhanganyele miṋeelo; ni nkuvhanganyele miṋeelo kha vhathu vhoṱhe vhane mbilu dzavho dza vha ṱuṱuwedza u ṋeela.+ 3 Muṋeelo une na fanela u u kuvhanganya khavho ndi hoyu: musuku,+ siḽiva,+ koporo,+ 4 harane ya muvhala wa lutombo, wuḽu ya phephulu, labi ḽitswuku, labi ḽavhuḓi ḽa ḽinene, mamvele a mbudzi, 5 mikumba ya thutha yo daiwaho nga muvhala mutswuku, mikumba ya tshiphu, thanda dza muunga,+ 6 mapfura a mbone,+ mapfura a baḽisamu a u ḓodza+ na a zwioro zwi nukhelelaho+ 7 na matombo a onikisi na maṅwe matombo ane a ḓo vhewa kha efodo*+ na kha tsha u vhea khanani.+ 8 Vha mphaṱele nnḓu khethwa, uri ndi dzule* vhukati havho.+ 9 Ni fhaṱe dennde ḽikhethwa* na u ita thundu dzaḽo dzoṱhe, ni tshi tevhela pulane ine nda khou ni sumbedza yone.+

10 “Vha ite mbulungelo* nga thanda dza muunga, vhulapfu hayo vhu vhe khubithi* mbili na hafu, vhuphara hayo vhu vhe khubithi na hafu, u ya nṱha i vhe khubithi na hafu.+ 11 U i ḓodze musuku vhukuma.+ U i ḓodze nga nnḓa na nga ngomu, u ite lumeme lwa musuku u mona nayo.+ 12 U i itele rinngi nṋa dza musuku, u dzi vhee nṱha ha milenzhe yayo miṋa, thungo iṅwe hu vhe na rinngi mbili na kha iṅwe thungo hu vhe na dziṅwe rinngi mbili. 13 U vhaḓe thanda dza muunga, u dzi ḓodze musuku.+ 14 U dzhenise dzenedzo thanda kha rinngi thungo dzoṱhe dza Mbulungelo uri u hwale Mbulungelo ngadzo. 15 Dzenedzo thanda dzi fanela u dzula kha rinngi dzi re kha Mbulungelo; dzi songo vhuya dza bviswa khayo.+ 16 Mbaba dza matombo dzine nda ḓo u ṋea dzone sa Vhuṱanzi u dzi dzhenise kha Mbulungelo.+

17 “U ite na mutibo nga musuku vhukuma, vhulapfu hawo vhu vhe khubithi mbili na hafu, vhuphara hawo vhu vhe khubithi na hafu.+ 18 U ite na vhakerube vhavhili nga musuku; u vha ite nga musuku wo fulwaho, u vha dzudze kha thungo mbili dza mutibo.+ 19 U ite vhakerube, u vha dzudze kha thungo dzawo mbili, mukerube muthihi kha iṅwe thungo ya mutibo na muṅwe mukerube muthihi kha iṅwe thungo ya mutibo. 20 Vhakerube vha fanela u ṱharamudzela nṱha phapha dzavho mbili, vha tsire mutibo nga phapha dzavho,+ vha fanela u sedzana. Zwifhaṱuwo zwa vhakerube zwi fanela u lavhelesa mutibo. 21 U tibe Mbulungelo nga mutibo,+ nga ngomu ha Mbulungelo u vhee mbaba dza matombo dzine nda ḓo u ṋea dzone uri dzi vhe Vhuṱanzi. 22 Ndi ḓo ḓa kha iwe henefho nda amba na iwe ndi nṱha ha mutibo.+ Ndi ḓo vha ndi vhukati ha vhakerube vhavhili vha re kha mbulungelo ya mulanga,* uri ndi u laye zwoṱhe zwine wa fanela u vhudza Vhaisiraele.

23 “U vhaḓe ṱafula+ nga thanda dza muunga, vhulapfu hayo i vhe khubithi mbili, vhuphara vhu vhe khubithi, u ya nṱha i vhe khubithi na hafu.+ 24 U i ḓodze musuku vhukuma, u i itele lumeme lwa musuku u mona nayo. 25 U ite lumeme u mona nayo lwa vhuphara vhu eḓanaho na minwe miṋa,* u i khavhise nga musuku u mona nayo. 26 U ite rinngi nṋa dza musuku, u vhee dzenedzo rinngi matungo maṋa hune ha vha na milenzhe. 27 Rinngi dzi fanela u vha tsini na lumeme u itela u dzhenisa thanda dza u hwala ṱafula. 28 U vhaḓe thanda dza muunga u dzi ḓodze musuku uri vha kone u hwala ṱafula ngadzo.

29 “U i vhaḓele ndilo, zwinwelo, midzio, zwigoḓelo, hune vha ḓo shela zwifhiwa zwa u nwiwa zwi shelwaho kha tshiṱhavhelo. Zwenezwi u zwi ite nga musuku vhukuma.+ 30 U dzule wo vhea vhurotho ha ṱano kha ṱafula i re phanḓa hanga.+

31 “U ite tshiṱomambone+ nga musuku vhukuma. Tshi fanela u itwa nga musuku wo fulwaho. Hune tsha ima ngaho, tsinde ḽatsho, matavhi atsho, zwiṱari* zwatsho, madungo atsho na maluvha atsho zwi vhe tshithu tshithihi.+ 32 Tsinde ḽatsho ḽi vhe na matavhi a rathi, matavhi mararu kha iṅwe thungo na mararu kha iṅwe. 33 Tavhi ḽiṅwe na ḽiṅwe ḽi vhe na zwiṱari* zwi ngaho maluvha a alimondo, dungo na luvha, zwi tevhekane nga zwiraru nga zwiraru, ni ite zwi fanaho kha tavhi ḽiṅwe na ḽiṅwe thungo dzoṱhe. Matavhi oṱhe a tshiṱomambone a fanela u vha nga u rali. 34 Kha tsinde ḽa tshiṱomambone hu vhe na zwiṱari* zwi ngaho maluvha a alimondo, dungo na luvha, zwi tevhekane nga zwiṋa nga zwiṋa. 35 Kha tshenetsho tshiṱomambone tshi re na matavhi a rathi, kha tsinde ḽatsho hune matavhi mavhili a u thoma a ṱangana hone, hu vhe na dungo nga fhasi. Nga fhasi ha matavhi mavhili ane a tevhela hu vhe na dungo, na nga fhasi ha matavhi mavhili a u fhedzisela hu vhe na dungo. 36 Tshiṱomambone tshoṱhe u katela madungo na matavhi atsho zwi fanela u itwa nga musuku vhukuma muthihi wo fulwaho.+ 37 U tshi itele mbone dza sumbe, musi mbone dzi tshi fungwa dzi fanela u vhonetshela phanḓa hatsho.+ 38 Zwa u dzima mbone na zwa u oka mulilo zwi fanela u itwa nga musuku vhukuma.+ 39 Tshenetsho tshiṱomambone na thundu dzatsho, zwi fanela u itwa nga musuku vhukuma wa talente* nthihi. 40 U ite zwoṱhe nga nḓila ye nda u sumbedza ngayo thavhani.+