Vhurifhi Ha Vhuvhili Ha Petro
1 Nṋe Simoni Petro, mulanda na muapostola wa Yesu Kristo, ndi ṅwalela vhe vha wana pfunzo ya ngoho ya ndeme u fana na riṋe. Ro i wana ngauri Mudzimu na Mutshidzi washu Yesu Kristo vho luga.
2 Ngavhe ni tshi vha na vhuthu vhuhulu na mulalo zwo engedzeaho nga u vha na nḓivho yo teaho+ nga ha Mudzimu na Yesu Murena washu, 3 ngauri Mudzimu o shumisa maanḓa awe, a ri ṋea zwithu zwoṱhe zwine zwa ri thusa u tshila ro ḓikumedzela khae. Ro wana zwenezwi zwithu ngauri ri na nḓivho yo teaho nga hae. Ndi Ene we a ri vhidza+ nga vhugala na vhuḓi hawe. 4 Nga zwenezwi zwithu, o ri ṋea zwithu zwa ndeme zwavhuḓi zwe a zwi fhulufhedzisa,+ uri ngazwo ni vhe zwivhumbiwa zwa muya u fana na Mudzimu,+ samusi no ponyoka shango ḽo tshinyiwaho nga nyemulo mmbi.
5 Ndi ngazwo ni tshi fanela u ita zwoṱhe zwine na nga kona+ uri lutendo lwaṋu lu vhe na vhuḓi,+ vhuḓi ha ita uri ni vhe na nḓivho,+ 6 nḓivho ya ita uri ni ḓifare,+ u ḓifara zwa ita uri ni konḓelele, u konḓelela zwa ita uri ni ḓikumedzele kha Mudzimu,+ 7 u ḓikumedzela kha Mudzimu zwa ita uri ni funane sa murathu na mukoma, u funana sa murathu na mukomana zwa ita uri ni fune vhathu vhoṱhe.+ 8 Arali ni na zwenezwi zwithu, zwi tshi engedzea, ni ḓo shumisa nḓivho yo teaho nga ha Murena Yesu Kristo uri ni si vhe vhabva,+ fhedzi ni vhe na zwine na zwi bveledza.
9 A si na zwenezwi zwithu ha vhoni, o bonya maṱo uri a si vhone tshedza,+ o hangwa uri o ṱanzwiwa zwivhi zwawe+ zwe a zwi ita kale. 10 Vhahashu, ndi ngazwo ni tshi tea u ita zwoṱhe zwine na nga kona uri zwe na vhidzelwa+ na u nangelwa zwone zwi vhe zwa vhukuma kha inwi, ngauri arali na dzula ni tshi ita zwenezwi zwithu, a ni nga wi.+ 11 Arali na ita zwenezwi ni ḓo fhaṱutshedzwa zwihulu nga u tendelwa u dzhena Muvhusoni+ wa lini na lini wa Murena na Mutshidzi washu Yesu Kristo.+
12 Ndi ngazwo ndi tshi ḓo dzula ndi tshi ni humbudza zwenezwi zwithu, naho ni tshi zwi ḓivha, no farelela no khwaṱha kha ngoho ye na i guda. 13 Arali ndi tshi kha ḓi vha kha ḽeneḽi dennde,*+ ndi vhona zwo tea u ni humbudza zwenezwi zwithu,+ 14 ngauri ndi a zwi ḓivha uri ḽeneḽi dennde ḽi ḓo thuthiwa hu si kale, samusi Murena washu Yesu Kristo o mmbudza.+ 15 Ndi ḓo dzula ndi tshi ita zwoṱhe zwine nda nga kona, uri ni kone u humbula* zwenezwi zwithu musi ndo no ṱuwa.
16 Ro ni vhudza nga ha maanḓa na u vha hone ha Murena washu Yesu Kristo nge ra vhona vhuhulu hawe,+ hu si nge ra pfa mazwifhi. 17 Ngauri o huliswa na u ṋewa vhugala nga Mudzimu Khotsi, musi muṋe wa vhugala vhuhulu a tshi mu vhudza haya maipfi: “Hoyu ndi murwa wanga a funwaho, ane nda mu takalela.”+ 18 Vhukuma, enea maipfi ro a pfa a tshi bva ṱaḓulu musi ri nae thavhani khethwa.
19 Ndi ngazwo ro tenda uri zwoṱhe zwe Mudzimu a amba zwi ḓo itea. Ni humbulisise nga ha zwenezwo zwithu zwoṱhe. Zwenezwo zwithu zwi vhe mbiluni dzaṋu, zwi nge luvhone+ lu vhonetshelaho swiswini. Ni dzule ni tshi zwi ita u swika hu tshi vha na ṋaledzi ya nga matsheloni+ na musi ḽi tshi tsha. 20 Tsha ndeme vhukuma, ḓivhani uri a hu na vhuporofita vhu re Maṅwaloni vhu bvaho kha muthu. 21 Ngauri a si muthu we a ita uri hu vhe na vhuporofita,+ fhedzi vhathu vho amba zwi bvaho kha Mudzimu vha tshi livhiswa nga muya mukhethwa.+