Daniele

3 Khosi Nebukadanetsara o ita tshifanyiso tsha musuku tshe tsha vha tshi vhulapfu ha khubithi dza 60* na vhuphara ha khubithi dza 6.* A tshi imisa mudavhini wa Dura vunduni* ḽa Babele. 2 Khosi Nebukadanetsara a ri hu kuvhanganyiwe magota, vhaḓinḓa, vhavhusi, vhaeletshedzi, vhafaragwama, vhahaṱuli, vhomadzhisiṱaraṱa na vhalangi vhoṱhe vha mavundu* uri vha ḓe musi hu tshi khou vhewa tshifanyiso tshe Khosi Nebukadanetsara a tshi ita.

3 Ndi hone magota, vhaḓinḓa, vhavhusi, vhaeletshedzi, vhafaragwama, vhahaṱuli, vhomadzhisiṱaraṱa na vhalangi vhoṱhe vha mavundu* vha tshi kuvhangana musi hu tshi khou imiswa tshifanyiso tshe Khosi Nebukadanetsara a tshi ita. Vha ima phanḓa ha tshifanyiso tshe Nebukadanetsara a tshi ita. 4 Muḓinḓa a vhidzelela a ri: “Inwi vhathu vha dzitshaka na nyambo dzo fhambanaho ni khou laedzwa, 5 uri musi ni tshi pfa u lidzwa ha luṋanga, tshiṱiringo, haripa, tshilidzo tshi re na ṱhale na zwiṅwe zwilidzo zwoṱhe, ni gwadame ni rabele tshifanyiso tsha musuku tshe Khosi Nebukadanetsara a tshi ita. 6 Ane a si gwadame a rabela tshenetshi tshifanyiso u ḓo posiwa ṋanḓoni ya mulilo+ nga u ṱavhanya.” 7 Musi vhathu vhoṱhe vha tshi pfa u lidzwa ha luṋanga, tshiṱiringo, haripa, tshilidzo tshi re na ṱhale na zwiṅwe zwilidzo zwoṱhe, vhathu vha tshaka na nyambo dzo fhambanaho vha gwadama vha rabela tshifanyiso tsha musuku tshe Khosi Nebukadanetsara a tshi ita.

8 Nga tshenetsho tshifhinga, vhaṅwe Vhakaladea vha ḓa vha pomoka* Vhayuda. 9 Vha amba na Khosi Nebukadanetsara vha ri: “Ngavhe khosi i tshi tshila nga hu sa fheli. 10 Iwe khosi wo amba uri musi vhathu vhoṱhe vha tshi pfa u lidzwa ha luṋanga, tshiṱiringo, haripa, tshilidzo tshi re na ṱhale na zwiṅwe zwilidzo zwoṱhe, vha gwadame vha rabele tshifanyiso tsha musuku; 11 na uri ane a si gwadame a rabela tshenetshi tshifanyiso u ḓo posiwa ṋanḓoni ya mulilo.+ 12 Fhedzi hu na vhaṅwe Vhayuda vhe wa vha vhea uri vha lange vundu* ḽa Babele, vhenevho ndi: Shadaraka, Mishaka na Abedenego.+ Vhenevho vhanna a vho ngo u ṱhonifha, iwe thovhela. A vha shumeli midzimu yau, vha khou hana u rabela tshifanyiso tsha musuku tshe wa tshi ita.”

13 Nebukadanetsara a sinyuwa zwihulu, a laedza uri hu ḓiswe Shadaraka, Mishaka na Abedenego. Vhenevho vhanna vha ḓiswa phanḓa ha khosi. 14 Nebukadanetsara a amba navho a ri: “Naa ndi ngoho uri inwi Shadaraka, Mishaka na Abedenego a ni khou shumela midzimu+ yanga na uri ni khou hana u gwadamela tshifanyiso tsha musuku tshe nda tshi ita? 15 Zwino musi ni tshi pfa u lidzwa ha luṋanga, tshiṱiringo, haripa, tshilidzo tshi re na ṱhale na zwiṅwe zwilidzo zwoṱhe, arali no ḓiimisela u gwadama na rabela tshifanyiso tshe nda tshi ita, zwo luga. Fhedzi arali na hana u rabela, ni ḓo poswa ṋanḓoni ya mulilo nga u ṱavhanya. Ndi mudzimu ufhio ane a nga ni tshidza zwanḓani zwanga?”+

16 Shadaraka, Mishaka na Abedenego vha fhindula khosi vha ri: “Iwe Nebukadanetsara, a hu tshee na zwine ra nga amba. 17 Arali zwo tea, Mudzimu ane ra mu shumela u ḓo ri tshidza ṋanḓoni ya mulilo na tshanḓani tshau thovhela.+ 18 Naho a sa ri tshidza, u ḓivhe hezwi iwe thovhela, uri ri nga si shumele midzimu yau kana u rabela tshifanyiso tsha musuku tshe wa tshi ita.”+

19 Nebukadanetsara a sinyutshela Shadaraka, Mishaka na Abedenego lwe tshifhaṱuwo tshawe tsha sinyalala musi o vha sedza, a ita uri ṋanḓo i fhise zwihulu u fhira lwa nga misi. 20 A vhudza vhanna vha maanḓa vha mmbi yawe uri vha vhofhe Shadaraka, Mishaka na Abedenego, vha vha pose ṋanḓoni ya mulilo.

21 Vhenevho vhanna vha vhofhiwa vha tshi kha ḓi vha vho ambara zwiambaro zwavho, miṅadzi na zwiṅwe zwiambaro zwoṱhe, vha poswa ṋanḓoni ya mulilo. 22 Ngauri zwe khosi ya amba zwo vha zwo vhifha, ṋanḓo i tshi khou fhisa nga maanḓa, vhanna vhe vha isa Shadaraka, Mishaka na Abedenego ndi vhone vhe vha vhulawa nga mulilo. 23 Fhedzi vhenevha vhanna vhararu, Shadaraka, Mishaka na Abedenego vha wela ṋanḓoni ya mulilo vho vhofhiwa.

24 Khosi Nebukadanetsara a tshuwa, a ṱavhanya a takuwa, a amba na vhaḓinḓa vhawe vhahulwane a ri: “Naa a ro ngo vhofha vhanna vhararu ra vha posa muliloni?” Vha fhindula khosi vha ri: “Ee, thovhela.” 25 Khosi ya ri: “Ndi khou vhona vhanna vhaṋa vha tshi khou tshimbila muliloni, a vha khou swa, wa vhuṋa u nga murwa wa midzimu.”

26 Nebukadanetsara a sendela tsini na muṋango wa ṋanḓo ya mulilo a ri: “Shadaraka, Mishaka na Abedenego, inwi vhashumeli vha Mudzimu Wa-Ṱaḓulu-ṱaḓulu,+ ibvani ni ḓe ngeno!” Shadaraka, Mishaka na Abedenego vha bva muliloni. 27 Magota, vhaḓinḓa, vhavhusi na vhaḓinḓa vhahulwane vha khosi vho kuvhanganaho henefho,+ vho vhona uri mulilo a wo ngo fhisa vhenevho vhanna;+ na uri mavhudzi a ṱhohoni dzavho ho ngo swa, na zwiambaro zwavho a zwo ngo swa na uri vho vha vha sa nukhi na mulilo.

28 Nebukadanetsara a ri: “Kha hu rendwe Mudzimu wa Shadaraka, Mishaka na Abedenego,+ we a ruma muruṅwa wawe uri a tshidze vhashumeli vhawe. Vho mu fhulufhela vha si tevhedze zwe khosi ya zwi amba, vha ḓiimisela u fa nṱhani ha u shumela kana u rabela miṅwe midzimu nga nnḓa ha Mudzimu wavho.+ 29 Ndi khou vhetshela vhathu vhoṱhe mulayo, tshaka na nyambo dzo fhambanaho uri vhane vha sema Mudzimu wa Shadaraka, Mishaka na Abedenego vha tumukanywe, nnḓu dzavho dzi itwe mabunga;* ngauri a hu na mudzimu ane a tshidza u nga hoyu.”+

30 Khosi ya hudza* Shadaraka, Mishaka na Abedenego vunduni* ḽa Babele.+