Numeri

10 Yehova a amba na Mushe a ri: 2 “Ḓiitele phalaphala mbili;+ u dzi ite nga siḽiva yo fulwaho, u dzi shumise u itela u kuvhanganya tshitshavha na musi hu tshi athululwa madennde. 3 Musi dzi tshi lidzwa vhuvhili hadzo, tshitshavha tshoṱhe tshi tea u kuvhangana phanḓa hau muṋangoni wa dennde ḽa muṱangano.+ 4 Arali ha lidzwa nthihi, ndi vharangaphanḓa fhedzi, vhane vha ranga phanḓa vha zwigidi vha Isiraele, vhane vha ḓo kuvhangana phanḓa hau.+

5 “Musi hu tshi lidzwa phalaphala nga mibvumo i sa fani, vha re madenndeni a re thungo ya vhubvaḓuvha+ vha takuwe. 6 Musi hu tshi lidzwa phalaphala lwa vhuvhili nga mibvumo i sa fani, vha re madenndeni a re thungo ya tshipembe+ vha takuwe. Vha lidze phalaphala nga yeneyi nḓila tshifhinga tshoṱhe musi tshiṅwe tsha zwigwada tshi tshi takuwa.

7 “Musi hu tshi kuvhanganywa tshivhidzo, hu lidzwe phalaphala,+ fhedzi hu si nga mibvumo i sa fani. 8 Vharwa vha Aroni vhane vha vha vhotshifhe, vha lidze phalaphala,+ u lidzwa hadzo hu fanela u shuma sa mulayo kha inwi wa lini na lini na kha mirafho yaṋu yoṱhe.

9 “Arali ni tshi fanela uri ni lwe na mutsikeledzi ane a khou ni dina shangoni ḽaṋu, ni lidze phalaphala dza mukosi wa nndwa,+ Yehova Mudzimu waṋu u ḓo ni humbula na tshidzwa kha maswina aṋu.

10 “Nga zwifhinga zwa musi no takala,+ nga vhuṱambo haṋu+ na musi ṅwedzi u tshi thoma, ni lidze phalaphala musi ni tshi ṋekedza zwifhiwa zwa u fhiswa;+ na zwiṱhavhelo zwa u pfumedzana;+ Mudzimu u ḓo ni humbula musi ni tshi dzi lidza. Ndi nṋe Yehova Mudzimu waṋu.”+

11 Nga ṅwaha wa vhuvhili nga ṅwedzi wa vhuvhili, nga ḓuvha ḽa vhu 20 ḽa ṅwedzi,+ gole ḽa takuwa nṱha ha dennde ḽikhethwa*+ ḽi re na mbulungelo ya mulanga. 12 Vhaisiraele vha takuwa sogani ḽa Sinai nga nḓila ye ha dzudzanywa uri vha ḓo takuwa ngayo,+ gole ḽa ya ḽa ima sogani ḽa Pharani.+ 13 Holwu lwo vha lu lwa u thoma vha tshi takuwa vha tshi tevhedza zwe Yehova a zwi amba a tshi shumisa Mushe.+

14 Mmbi yo khethekanywaho nga tshaka tharu ya vharwa vha Yuda ya vha yone ya u thoma u takuwa i zwigwada,* Nahashoni+ murwa wa Aminadaba o vha o ranga phanḓa tshenetsho tshigwada. 15 Tshigwada tsha lushaka lwa vharwa vha Isashari tsho vha tsho rangwa phanḓa nga Nethaniele+ murwa wa Tsuwari. 16 Tshigwada tsha lushaka lwa vharwa vha Sebuloni tsho vha tsho rangwa phanḓa nga Eliaba+ murwa wa Heloni.

17 Musi dennde ḽikhethwa ḽi tshi ṱhaṱhamulwa,+ vharwa vha Gerisoni+ na vha Merari,+ vhane vha ḽi hwala, vha ṱuwa naḽo.

18 Mmbi yo khethekanywaho nga tshaka tharu ya vhana vha Rubeni ya takuwa i zwigwada,* Elitsuru+ murwa wa Shideuru o vha o ranga phanḓa tshenetsho tshigwada. 19 Tshigwada tsha lushaka lwa vharwa vha Simioni tsho vha tsho rangwa phanḓa nga Shelumi+ murwa wa Tsurisadai. 20 Tshigwada tsha lushaka lwa vharwa vha Gada tsho vha tsho rangwa phanḓa nga Eliasafu+ murwa wa Duele.

21 Ha takuwa Vhakehati vhane vha hwala thundu dza nḓuni khethwa.+ Vho vha vha tshi fanela u wana dennde ḽikhethwa ḽo no imiswa.

22 Mmbi yo khethekanywaho nga tshaka tharu ya vharwa vha Efuraimi ya takuwa i zwigwada,* Elishama+ ṅwana wa Amihudu o vha o ranga phanḓa tshenetsho tshigwada. 23 Tshigwada tsha lushaka lwa vharwa vha Manase tsho vha tsho rangwa phanḓa nga Gamaliele+ murwa wa Padatsuri. 24 Tshigwada tsha lushaka lwa vharwa vha Benyamini tsho vha tsho rangwa phanḓa nga Abidani+ murwa wa Gideoni.

25 Mmbi yo khethekanywaho nga tshaka tharu ya vharwa vha Dani ya takuwa i zwigwada,* yo vha i murahu yo tsireledza mmbi yoṱhe, Ahiesere+ murwa wa Amisadai o vha o ranga phanḓa tshenetsho tshigwada. 26 Tshigwada tsha lushaka lwa vharwa vha Ashere tsho vha tsho rangwa phanḓa nga Phagiele+ murwa wa Ohorani. 27 Tshigwada tsha lushaka lwa vharwa vha Nafutali tsho vha tsho rangwa phanḓa nga Ahira+ murwa wa Enani. 28 Yeneyi ndi nḓila ye Vhaisiraele vha takuwa ngayo nga zwigwada* zwavho.+

29 Mushe a amba na Hobaba murwa wa Ruwele*+ wa Mumidiani ane a vha makhulu* wa Mushe a ri: “Ri khou ya fhethu he Yehova a ri: ‘Ndi ḓo ni ṋea hone.’+ Ṱuwa na riṋe+ ri ḓo u fara zwavhuḓi, ngauri Yehova o fhulufhedzisa Vhaisiraele zwithu zwavhuḓi.”+ 30 Fhedzi a mu fhindula a ri: “Ndi nga si ṱuwe na inwi. Nṋe ndi ḓo humela shangoni ḽa hashu na kha mashaka anga.” 31 Mushe a ri: “Ndi khou humbela uri u songo ṱuwa, ngauri u a ḓivha hune ra fanela u atha hone madennde sogani, ndi iwe ane a ḓo ri ranga phanḓa.* 32 Arali wa ṱuwa na riṋe,+ zwivhuya zwiṅwe na zwiṅwe zwine Yehova a ḓo ri ṋea zwone na iwe ri ḓo u ṋea zwone.”

33 Vho tshimbila u bva thavhani ya Yehova+ lwa maḓuvha mararu, na mbulungelo+ ya Yehova ya mulanga yo vha yo vha ranga phanḓa lwa maḓuvha mararu uri vha wane hune vha ḓo awela hone.+ 34 Gole ḽa Yehova+ ḽo vha ḽi nṱha havho nga masiari musi vha tshi takuwa he vha vha vho atha hone madennde.

35 Tshifhinga tshoṱhe musi Mbulungelo i tshi pfuluswa, Mushe o vha a tshi ri: “Iwe Yehova, takuwa,+ balanganya maswina au, ita uri vhane vha u vhenga vha shavhe phanḓa hau.” 36 Musi i tshi vhewa fhasi, o vha a tshi ri: “Yehova vhuyelela kha Vhaisiraele vhanzhi vha sa vhalei.”*+