Nzumbululo I Yaho Kha Yohane
8 Musi Ngwana+ i tshi bvisa tshiganḓo tsha vhusumbe,+ ha fhumulwa ṱaḓulu lu ṱoḓaho u vha hafu ya awara. 2 Nda vhona vharuṅwa+ vha sumbe vha imaho phanḓa ha Mudzimu vha tshi ṋewa phalaphala dza sumbe.
3 Ha swika muṅwe muruṅwa a ima phanḓa ha aḽeṱare+ o fara mudzio wa musuku wa zwioro,+ a ṋewa zwioro zwinzhi uri a zwi ṋekedze kha aḽeṱare+ ya musuku i re phanḓa ha khuluṋoni musi ho thetsheleswa thabelo dza vhakhethwa. 4 Vhutsi ha zwioro ha duba phanḓa ha Mudzimu vhu tshi bva tshanḓani tsha muruṅwa, musi ho thetsheleswa thabelo+ dza vhakhethwa. 5 Onoyo muruṅwa a dzhia mudzio wa zwioro nga u ṱavhanya a u ḓadza nga maxale* a bvaho kha aḽeṱare a a posa kha ḽifhasi. Ha vha na mibvumo na dziphenyo+ na mudzinginyo, nda pfa na maipfi. 6 Vharuṅwa vha sumbe vho faraho phalaphala+ dza sumbe vha ḓilugiselela u dzi lidza.
7 Wa u thoma a lidza phalaphala yawe. Ha vha na tshifhango na mulilo wo ṱanganaho na malofha, zwa poswa kha ḽifhasi;+ ha swa tshipiḓa tshithihi kha zwiraru tsha ḽifhasi, ha swa tshipiḓa tshithihi kha zwiraru tsha miri, na hatsi hoṱhe ha swa.+
8 Muruṅwa wa vhuvhili a lidza phalaphala yawe. Ha poswa lwanzheni tshithu tshi ngaho thavha khulu i dugaho mulilo.+ Tshipiḓa tshithihi kha zwiraru tsha lwanzhe tsha vha malofha;+ 9 na tshipiḓa tshithihi kha zwiraru tsha zwivhumbiwa zwa lwanzheni zwi tshilaho zwa fa,+ na tshipiḓa tshithihi kha zwiraru tsha zwikepe zwa kwashea.
10 Muruṅwa wa vhuraru a lidza phalaphala yawe. Ha wa ṋaledzi khulu i dugaho sa luvhone i tshi bva ṱaḓulu, ya wela kha tshipiḓa tshithihi kha zwiraru tsha milambo na kha zwisima zwa maḓi.+ 11 Yeneyo ṋaledzi i pfi Tshimela tshi Kalakataho.* Tshipiḓa tshithihi kha zwiraru tsha maḓi tsha kalakata, vhathu vhanzhi vha fa nga eneo maḓi, ngauri o vha o itwa uri a kalakate.+
12 Muruṅwa wa vhuṋa a lidza phalaphala yawe. Tshipiḓa tshithihi kha zwiraru tsha ḓuvha,+ tsha ṅwedzi na tsha ṋaledzi, zwa swifhadzwa,+ uri hu si vhe na tshedza kha tshipiḓa tshithihi kha zwiraru tsha masiari na vhusiku.
13 Nda vhona na u pfa goni ḽi tshi khou fhufha makoleni* ḽi tshi khou vhidzelela ḽi tshi ri: “Khombo, khombo, khombo+ kha vho dzulaho kha ḽifhasi nga nṱhani ha zwine zwa ḓo itea hu si kale musi vharuṅwa vhararu vho salaho vha tshi lidza phalaphala dzavho!”+