Hesekiele

8 Nga ṅwaha wa vhurathi, nga ṅwedzi wa vhurathi, nga ḓuvha ḽa vhuṱanu ḽa ṅwedzi, musi ndo dzula nḓuni yanga na vhahulwane vha Yuda vho dzula phanḓa hanga, musi ndi henefho nda farwa nga tshanḓa tsha Yehova Murena Muvhusahoṱhe. 2 Musi ndi tshee ndo lavhelesa nda vhona tshivhumbeo tshi ngaho tsha muthu tshi fanaho na mulilo;+ u bva kha khundu dzawe u ya nṱha hu tshi vhonala hu tshi khou penya vhunga tsimbi i penyaho.*+ 3 A ṱharamudza tshine tsha nga ndi tshanḓa a mpfara mavhudzi, muya wa ntakulela tshikhalani* wa nnyisa Yerusalema nga mabono a bvaho ha Mudzimu, muṋangoni wa khoro ya nga ngomu+ yo lavhelesaho devhula, he ha vha ho ima tshifanyiso* tshine tsha sinyusa Mudzimu.+ 4 Vhugala ha Mudzimu wa Isiraele ho vha vhu henefho,+ vhu tshi nga tshivhumbeo tshe nda tshi vhona ngei govhani.+

5 A amba na nṋe a ri: “Murwa muthu, ndi humbela uri u lavhelese thungo ya devhula.” Nda lavhelesa thungo ya devhula, henefho devhula ha khoro ya aḽeṱare hu na tshifanyiso* muṋangoni tshine tsha sinyusa Mudzimu. 6 A amba na nṋe a ri: “Murwa muthu, naa u khou vhona zwithu zwi ofhisaho na zwi nengisaho zwine vha nnḓu ya Isiraele vha khou zwi ita henefha,+ zwine zwa ita uri ndi ṱutshele nnḓu khethwa yanga?+ Fhedzi u ḓo vhona zwithu zwi nengisaho zwine zwa ofhisa vhukuma.”

7 A nnyisa muṋangoni wa muṱa, musi ndi tshi lavhelesa nda vhona hu na buli kha luvhondo. 8 A amba na nṋe a ri: “Murwa muthu, ndi humbela uri u engedze buli ḽi re kha luvhondo.” Ndi hone ndi tshi engedza ḽeneḽo buli ḽi re kha luvhondo, nda vhona muṋango. 9 A amba na nṋe a ri: “Dzhena nga ngomu u vhone zwithu zwivhi na zwi nengisaho zwine vha khou zwi ita fhano.” 10 Nda lavhelesa nda vhona zwifanyiso zwo fhambanaho zwa zwikokovhi na zwivhanda zwi nengisaho+ na midzimu yoṱhe ya zwifanyiso i nengisaho* ya vha nnḓu ya Isiraele;+ zwo korwa kha luvhondo thungo dzoṱhe. 11 Vhahulwane vha 70 vha nnḓu ya Isiraele vho ima phanḓa hazwo, na Yaasanya murwa wa Shafani+ o ima vhukati havho. Vhoṱhe vho fara midzio ya u fhisela zwioro, mutsi wa zwioro u tshi khou dubela nṱha.+ 12 A amba na nṋe a ri: “Murwa muthu, naa u khou zwi vhona zwine vhahulwane vha nnḓu ya Isiraele vha khou ita vhe swiswini, muṅwe na muṅwe wavho e kamarani ya nga ngomu-ngomu he a ṱana hone midzimu yawe ya zwifanyiso? Ngauri vha ri, ‘Yehova ha ri vhoni. Yehova o ṱuwa shangoni.’”+

13 A dovha a amba na nṋe a ri: “U ḓo vhona zwithu zwi nengisaho zwine zwa ofhisa vhukuma u fhira zwine vha khou zwi ita.” 14 A nnyisa kha muṋango wa khoro ya devhula ya nnḓu ya Yehova, henefho nda vhona vhafumakadzi vho dzula vha tshi khou lilela mudzimu ane a pfi Thamusi.

15 A dovha a amba na nṋe a ri: “Iwe murwa muthu, naa u khou zwi vhona izwi? U ḓo vhona zwithu zwi nengisaho zwine zwa ofhisa vhukuma u fhira zwenezwi.”+ 16 A nnyisa muṱani wa nga ngomu wa nnḓu ya Yehova.+ Henefho muṋangoni wa thembele ya Yehova vhukati ha vurannḓa na aḽeṱare hu na vhanna vha ṱoḓaho u vha 25, miṱana yavho yo furalela thembele ya Yehova, zwifhaṱuwo zwavho zwo lavhelesa vhubvaḓuvha; vha tshi khou gwadamela ḓuvha vhe thungo ya vhubvaḓuvha.+

17 A amba na nṋe a ri: “Murwa muthu, u khou zwi vhona izwi? Naa ndi zwithu zwi sa dini kha vha nnḓu ya Yuda uri vha ite zwenezwi zwithu zwi nengisaho, u ḓadza shango nga khakhathi+ na u dzulela u ntsinyusa? Vha khou dzungudza tavhi* ningoni dzanga. 18 Nga zwenezwo, ndi ḓo vha sinyutshela. A thi nga vha khathutsheli; kana u vha pfela vhuṱungu.+ Naho vha nṱavhela mukosi nḓevheni dzanga, a thi nga ḓo vha pfa.”+