Maḽeaxi
3 “Ndi khou ruma muḓinḓa wanga, ane a ḓo nkhurela* nḓila.+ Murena wa ngoho ane na khou mu ṱoḓa, u ḓo ḓa nga u ṱavhanya thembeleni yawe;+ ha ḓa na muḓinḓa wa mulanga ane na mu takalela. U ḓo ḓa,” u ralo Yehova wa mavhuthu.
2 “Ndi nnyi ane a ḓo konḓelela musi a tshi ḓa, ndi nnyi ane a ḓo ima musi a tshi ḓa? Ngauri u ḓo vha a tshi fana na mulilo wa muṋokisi wa tsimbi, a tshi fana na tshisibe+ tsha vhakuvhi. 3 U ḓo nga muṋokisi na mukunakisi wa siḽiva+ ngauri u ḓo kunakisa vharwa vha Levi; u ḓo vha kunakisa sa musuku na siḽiva, vha vha vhathu vhane vha ṋekedza Yehova tshifhiwa nga u luga. 4 Yehova u ḓo takalela* tshifhiwa tsha Yuda na tsha Yerusalema, sa zwiḽa kale, sa miṅwahani yo fhiraho.+
5 “Ndi ḓo ḓa nda ni haṱula, ndi ḓo ṱavhanya nda haṱula vhaloi,+ phombwe, vhane vha ita miano ya mazwifhi,+ vhane vha fhura mushumi,+ tshilikadzi, ṅwana a si na khotsi*+ na vhane vha hana u thusa mutsinda.+ Vhenevho a vho ngo nnyofha,” u ralo Yehova wa mavhuthu.
6 “Ngauri nṋe Yehova a thi shanduki.*+ Inwi ni vharwa vha Yakobo; ndi ngazwo ni tshee hone. 7 No litsha u tevhedza milayo yanga u bva tshifhingani tsha vhomakhulukuku waṋu.+ Vhuyelelani kha nṋe, na nṋe ndi ḓo vhuyelela kha inwi,”+ u ralo Yehova wa mavhuthu.
Fhedzi inwi ni ri: “Ri vhuyelele hani?”
8 “Naa hu na ane a nga fhura Mudzimu? Fhedzi inwi no mphura.”
Inwi na ri: “Ro u fhura hani?”
“Nga u sa ḓisa miṋeelo na tshafumi. 9 No semiwa, ngauri ni khou mphura, na lushaka lwoṱhe lu khou mphura. 10 Ḓisani tshafumi ḓuluni,+ uri hu vhe na zwiḽiwa nḓuni yanga;+ ni nndinge kha zwenezwi,” u ralo Yehova wa mavhuthu, “uri ni kone u vhona arali ndi nga si ni vulele khoro dza ṱaḓulu,+ nda ni shululela phaṱhutshedzo u swika ni si tsha ṱahelelwa nga tshithu.”+
11 “Ndi ḓo kaidza zwikhokhonono ndi tshi itela inwi, a zwi nga ḓo tshinyadza mitshelo ya shango ḽaṋu, na minḓirivhe ya tsimuni yaṋu i ḓo aṋwa,”+ u ralo Yehova wa mavhuthu.
12 “Tshaka dzoṱhe dzi ḓo amba uri no takala,+ ngauri ni ḓo vha shango ḽi takalelwaho,” u ralo Yehova wa mavhuthu.
13 “No nnyamba luvhi,” u ralo Yehova.
Fhedzi ni ri: “Ro u amba hani luvhi?”+
14 “Inwi na ri, ‘U shumela Mudzimu a zwi vhuyedzi.+ Ro vhuyelwa hani nga u ita zwe a ri vhudza na u tshimbila ro ṱungufhala phanḓa ha Yehova wa mavhuthu? 15 Zwino ri vho vhona vhathu vhane vha ḓihudza vho takala. Na vhane vha ita vhuvhi zwi tshi vha tshimbilela zwavhuḓi.+ Vha linga Mudzimu vha si vhonwe mulandu.’”
16 Nga tshenetsho tshifhinga, vhane vha ofha Yehova vho amba nga tshavho, muṅwe na muṅwe a amba na khonani yawe, Yehova a vha thetshelesa nga vhuronwane. Yehova a amba uri hu ṅwaliwe buguni+ madzina a vhane vha mu ofha na u elekanya nga ha* dzina ḽawe.+
17 Yehova wa mavhuthu u ri, “Vha ḓo vha vhanga+ nga ḓuvha ḽine nda ḓo vha ita vhathu vhanga vho khetheaho.+ Ndi ḓo vha pfela vhuṱungu, u fana na munna ane a pfela vhuṱungu murwa wawe ane a mu shumela.+ 18 Ndi hone ni tshi ḓo kona u vhona phambano vhukati ha muvhuya na muvhi,+ vhukati ha ane a shumela Mudzimu na ane a si mu shumele.”