Dotoronomio
26 “Mafheleloni musi ni tshi dzhena shangoni ḽine Yehova Mudzimu waṋu a khou ni ṋea ḽone sa ifa, na ḽi dzhia ḽa vha ḽaṋu na dzula khaḽo, 2 ni dzhie zwiṅwe zwa zwiranzhe zwa zwibveledzwa* zwoṱhe zwa mavuni, zwine na ḓo zwi kuvhanganya shangoni ḽine Yehova Mudzimu waṋu a khou ni ṋea ḽone, ni zwi dzhenise manngini, ni ye fhethu hune Yehova Mudzimu waṋu a ḓo vha o hu nanga uri dzina ḽawe ḽi dzule hone.+ 3 Ni ye ha tshifhe ane a ḓo vha a tshi khou shuma misini yeneyo, ni ambe nae ni ri: ‘Ṋamusi ndi khou amba phanḓa ha Yehova Mudzimu waṋu uri ndo swika shangoni ḽe Yehova a anela vhomakhulukuku washu uri u ḓo ri ṋea ḽone.’+
4 “Tshifhe u ḓo ṱanganedza manngi waṋu, a u vhea phanḓa ha aḽeṱare ya Yehova Mudzimu waṋu. 5 Ni ambe phanḓa ha Yehova Mudzimu waṋu ni ri: ‘Khotsi anga o vha e Muaramu+ we vhutshilo hawe ha vha vhu khomboni, o ya Egipita+ a dzula henengei sa mutsinda, e na vha si gathi vha muṱa wawe.+ Fhedzi henengei a vha lushaka luhulu na lu re na maanḓa.+ 6 Vhaegipita vha ri tambudza na u ri tsikeledza, vha ri shumisa mushumo u vhavhaho wa vhupuli.+ 7 Ra thoma u lilela Yehova Mudzimu wa vhomakhulukuku washu, Yehova a pfa zwililo zwashu, a vhona u tambula hashu na u tsikeledzea hashu.+ 8 Mafheleloni Yehova a ri bvisa Egipita nga tshanḓa tshawe tsha maanḓa,+ a ita zwithu zwi ofhisaho, zwiga na vhuṱolo.+ 9 A ri ḓisa hafha fhethu a ri ṋea heḽi shango ḽi elelaho mafhi na mutoli.+ 10 Zwino ndi ḓisa zwiranzhe zwa zwibveledzwa zwa mavu e Yehova a nṋea.’+
“Ni zwi vhee phanḓa ha Yehova Mudzimu waṋu, ni gwadame phanḓa ha Yehova Mudzimu waṋu. 11 Ni takalele zwoṱhe zwe Yehova Mudzimu waṋu a ni ṋea zwone na vha muṱa waṋu, iwe na Mulevi na mutsinda a re vhukati haṋu.+
12 “Musi ni tshi fhedza u bvisa+ tshafumi kha zwibveledzwa zwaṋu zwoṱhe nga ṅwaha wa vhuraru, ṅwaha wa tshafumi, ni zwi ṋee Mulevi, mutsinda, ṅwana a si na khotsi* na tshilikadzi, vha ḓo ḽa vha fura miḓini* yaṋu.+ 13 Ndi hone ni tshi ḓo amba na Yehova Mudzimu waṋu na ri: ‘Ndo bvisa mukovhe mukhethwa nda u ṋea Mulevi, mutsinda, ṅwana a si na khotsi na tshilikadzi,+ samusi wo nndaya. A tho ngo pfuka kana u nyadza ndaela dzau. 14 A tho ngo zwi ḽa musi ndi tshi khou lila kana u zwi bvisa musi ndi na tshika kana u ṋea zwiṅwe zwazwo ndi tshi itela vho faho. Ndo thetshelesa Yehova Mudzimu wanga, nda ita zwoṱhe zwe wa nndaya. 15 Lavhelesa fhasi u ḽiṱaḓulu vhudzuloni hau vhukhethwa, u fhaṱutshedze vhathu vhau vha Isiraele na shango ḽe wa ri ṋea ḽone,+ samusi wo anela vhomakhulukuku washu,+ shango ḽi elelaho mafhi na mutoli.’+
16 “Ṋamusi Yehova Mudzimu waṋu u khou ni laya uri ni tevhedze haya maitele na mahaṱulele. Ni zwi tevhedze na u zwi ita nga mbilu yaṋu yoṱhe+ na nga zwoṱhe zwine na vha zwone. 17 Nga nṱhani ha zwe na zwi amba Yehova o ri u ḓo vha Mudzimu waṋu, musi ni tshi tshimbila nḓilani dzawe, ni tshi tevhedza maitele awe,+ ndaela dzawe,+ mahaṱulele+ awe na thetshelesa ipfi ḽawe. 18 Ṋamusi Yehova o pfa zwe na amba uri ni ḓo vha vhathu vhawe vho khetheaho,+ sa zwe a ni fhulufhedzisa, ni ḓo tevhedza ndaela dzawe dzoṱhe 19 a ni hulisa u fhira dziṅwe tshaka dzoṱhe dze a dzi sika,+ a ita uri ni khoḓwe, ni vhe na bvumo na vhugala, musi ni tshi vha vhathu vhakhethwa kha Yehova Mudzimu waṋu,+ sa zwe a fhulufhedzisa.”