Levitiko

7 “‘Mulayo wa tshifhiwa tsha u pfumelela mulandu ndi hoyu:+ Ndi tshikhethwa-khethwa. 2 Vha fanela u ṱhavha tshifhiwa tsha u pfumelela mulandu fhethu he vha ṱhavhela hone zwifhiwa zwa u fhiswa, malofha+ atsho a fanela u hashwa thungo dzoṱhe kha aḽeṱare.+ 3 A ṋekedze mapfura+ atsho oṱhe u katela na mapfura a mutshila, mapfura o putelaho mala, 4 na tswio mbili dzi re na mapfura tsini na zwizwa. A dovhe a bvise mapfura a re kha tshivhindi khathihi na tswio.+ 5 Tshifhe u ḓo zwi dubisa kha aḽeṱare sa tshifhiwa tshi fhiselwaho Yehova.+ Ndi tshifhiwa tsha u pfumelela mulandu. 6 Vhanna vhoṱhe vha shumaho sa vhotshifhe vha ḓo tshi ḽa,+ tshi fanela u ḽiwa fhethu hukhethwa. Ndi tshikhethwa-khethwa.+ 7 Mulayo wa tshifhiwa tsha u pfumelela tshivhi u a shuma na kha tshifhiwa tsha u pfumelela mulandu; ndi tsha tshifhe ane a ita tshipfumelelo.+

8 “‘Musi tshifhe a tshi ṋekedza tshifhiwa tsha u fhiswa tsha muṅwe muthu, mukumba+ wa tshenetsho tshifhiwa tsha u fhiswa tshe tsha ṋekedzwa tshifhe u ḓo vha wawe.

9 “‘Tshifhiwa tsha thoro tshiṅwe na tshiṅwe tsho bakwaho honndoni kana tsho bakwaho kha bodo kana kha pani+ ndi tsha tshifhe ane a tshi ṋekedza. Tshi ḓo vha tshawe.+ 10 Fhedzi tshifhiwa tsha thoro tshiṅwe na tshiṅwe tsho ṱanganyiswaho na mapfura+ kana tsho omaho+ tshi ḓo kovhekanyelwa vharwa vha Aroni; vhoṱhe vha ḓo wana mukovhe wo linganaho.

11 “‘Mulayo wa tshiṱhavhelo tsha u pfumedzana+ tshine muthu a nga tshi ṋekedza Yehova ndi hoyu: 12 Arali a tshi ṋekedza nga nḓila ya u sumbedza u livhuwa,+ a ṋekedze tshiṱhavhelo tsha u livhuwa tshi na ḽofo* dzi si na mbiliso dzo ṱanganyiswaho na mapfura, makokisi a si na mbiliso o ḓodzwaho mapfura, ḽofo* dzo bakwaho nga fuḽauru tsekene, yo ṱanganyiswaho zwavhuḓi na mapfura. 13 A ṋekedze tshifhiwa tshawe khathihi na ḽofo dza vhurotho* vhu re na mbiliso na tshiṱhavhelo tsha u livhuwa tsha zwiṱhavhelo zwawe zwa u pfumedzana. 14 Khatsho a ṋekedze tshithihi tsha tshifhiwa tshiṅwe na tshiṅwe sa mukovhe mukhethwa wa Yehova; u vhe wa tshifhe ane a shasha malofha a tshiṱhavhelo tsha u pfumedzana.+ 15 Ṋama ya tshiṱhavhelo tsha u livhuwa tsha zwiṱhavhelo zwawe zwa u pfumedzana i fanela u ḽiwa nga ḓuvha ḽine a zwi ṋekedza ngaḽo. Ho ngo tea u zwi siela matshelo.+

16 “‘Arali tshiṱhavhelo tshawe tshi tsha muano+ kana tshi tshifhiwa tsha u tou ḓifunela,+ tshi fanela u ḽiwa nga ḓuvha ḽine a ṋekedza tshiṱhavhelo tshawe, zwo salaho zwi nga ḽiwa na nga ḓuvha ḽi tevhelaho. 17 Fhedzi ṋama iṅwe na iṅwe ya tshiṱhavhelo yo salaho i fanela u fhiswa nga mulilo nga ḓuvha ḽa vhuraru.+ 18 Naho zwo ralo, arali ṋama ya tshiṱhavhelo tsha u pfumedzana ya ḽiwa nga ḓuvha ḽa vhuraru, ane a i ṋekedza ha nga ṱanganedzwi. Ha nga takalelwi nga Mudzimu; tshi na tshika, ane a ḽa iṅwe ya ṋama yatsho u ḓo ḓifhindulela kha vhukhakhi hawe.+ 19 Ṋama iṅwe na iṅwe ine ya kwama tshithu tshi songo kunaho a yo ngo fanela u ḽiwa. I fanela u fhiswa nga mulilo. Muṅwe na muṅwe o kunaho a nga ḽa ṋama yo kunaho.

20 “‘Fhedzi muthu naho e ufhio a songo kunaho ane a ḽa ṋama ya tshiṱhavhelo tsha u pfumedzana, tshine tsha vha tsha Yehova, onoyo muthu u tea u vhulawa.+ 21 Arali muthu a kwama naho tshi tshini tshi songo kunaho, hu sa londwi uri ndi tshika ya muthu,+ tshifuwo tshi songo kunaho,+ kana tshiṅwe na tshiṅwe tshi songo kunaho tshi nengisaho,+ a ḽa ṋama ya tshiṱhavhelo tsha u pfumedzana, tshine tsha vha tsha Yehova, onoyo muthu u tea u vhulawa.’”

22 Yehova a bvela phanḓa a tshi amba na Mushe a ri: 23 “Vhudza Vhaisiraele uri: ‘A no ngo tea u ḽa mapfura+ naho e afhio a mboho kana a thutha kana a mbudzi. 24 Mapfura a phukha yo wanalaho yo fa na mapfura a phukha yo vhulawaho nga iṅwe phukha a nga shumiselwa zwiṅwe zwithu, fhedzi inwi a no ngo tea u a ḽa na luthihi.+ 25 Ane a ḽa mapfura a tshifuwo tshe a tshi ṋekedza sa tshifhiwa tshi fhiselwaho Yehova u tea u vhulawa.

26 “‘A no ngo tea u ḽa malofha+ na luthihi hune na dzula hone, hu sa londwi uri ndi a zwiṋoni kana ndi a zwipuka. 27 Muthu ane a ḽa malofha u tea u vhulawa.’”+

28 Yehova a bvela phanḓa a tshi amba na Mushe a ri: 29 “Vhudza Vhaisiraele uri: ‘Ane a ṋekedza tshiṱhavhelo tsha u pfumedzana tshawe kha Yehova u ḓo ḓisa tshipiḓa tsha tshifhiwa tshi bvaho kha tshiṱhavhelo tsha u pfumedzana tsha Yehova.+ 30 Ene a ḓise mapfura+ a re kha tshiakha nga zwanḓa zwawe khathihi na tshiakha sa tshifhiwa tshi fhiselwaho Yehova; u ḓo tshi dzungudzela phanḓa na murahu sa tshifhiwa tsha u dzungudzwa+ phanḓa ha Yehova. 31 Tshifhe u ḓo dubisa mapfura kha aḽeṱare,+ fhedzi tshiakha ndi tsha Aroni na vharwa vhawe.+

32 “‘Ni ḓo ṋekedza tshifhe mulenzhe wa tsha u ḽa sa mukovhe mukhethwa u tshi bva kha zwiṱhavhelo zwa u pfumedzana.+ 33 Ṅwana wa Aroni ane a ṋekedza malofha a zwiṱhavhelo zwa u pfumedzana na mapfura u ḓo wana mulenzhe wa tsha u ḽa sa mukovhe wawe.+ 34 Ngauri ndi dzhia tshiakha tsha tshifhiwa tsha u dzungudzwa na mulenzhe wa mukovhe mukhethwa sa tshiṱhavhelo tsha u pfumedzana tsha Vhaisiraele, ndi u ṋea tshifhe Aroni na vharwa vhawe sa mulayo wa lini na lini kha Vhaisiraele.+

35 “‘Hoyu wo vha u mukovhe u bvaho kha zwifhiwa zwo fhiselwaho Yehova zwe zwa vha zwi tshi fanela u vhetshelwa tshifhe Aroni na vharwa vhawe, u bva nga ḓuvha ḽe Yehova a vha vhea uri vha shume sa vhotshifhe vhawe.+ 36 Yehova o laya Vhaisiraele uri vha vha ṋee wonoyo mukovhe nga ḓuvha ḽe a vha ḓodza.+ Ndi mulayo wa lini na lini kha mirafho yavho.’”

37 Hoyu ndi mulayo wa tshifhiwa tsha u fhiswa,+ tshifhiwa tsha thoro,+ tshifhiwa tsha u pfumelela tshivhi,+ tshifhiwa tsha u pfumelela mulandu,+ tshiṱhavhelo tsha u vhewa+ ha muthu uri a vhe tshifhe na tshiṱhavhelo tsha u pfumedzana,+ 38 sa zwe Yehova a laya Mushe ngei Thavhani ya Sinai+ nga ḓuvha ḽe a laya Vhaisiraele uri vha ṋekedze zwifhiwa zwavho kha Yehova sogani ḽa Sinai.+