Yeremia
9 Ngavhe ṱhoho yanga yo vha i tshisima tsha maḓi,
Maṱo anga e tshisima tsha miṱodzi,+
Ndo vha ndi tshi ḓo lila vhusiku na masiari
Ndi tshi lilela vhathu vhahashu vho vhulawaho.
2 Ngavhe ndo vha ndi na nnḓu ya vhaeni sogani!
Ndo vha ndi tshi ḓo ṱutshela vhathu vhahashu nda vha sia,
Ngauri vhoṱhe ndi dziphombwe,+
Ndi vhathu vha re na tshimbevha.
3 Vho lugela u zwifha, u fana na vhura ho lugela u pfula;
Shango ḽo ḓala mazwifhi, a hu na u fhulufhedzea,+
“Vha tou ṋaṋisa u ita vhuvhi,
A vha nthetshelesi,”+ u ralo Yehova.
4 “Muṅwe na muṅwe a ṱhogomele muhura wawe,
Ni songo fhulufhela wahaṋu.
5 Muṅwe na muṅwe u fhura muhura wawe,
A hu na ane a amba ngoho.
Vho funza ndimi dzavho u amba mazwifhi.+
Vha ḓinetisa nga u ita zwo khakheaho.
6 Vho* dzula na vhathu vha vhufhura.
Vho hana u nḓivha nga nṱhani ha vhufhura havho,” u ralo Yehova.
7 Nga zwenezwo, Yehova wa mavhuthu u ri:
“Ndi ḓo vha kunakisa* na u vha linga,+
Ndi zwifhio zwiṅwe zwine nda nga zwi ita kha ṅwananyana wa vhathu vhanga?
8 Ndimi dzavho ndi misevhe i vhulayaho, dzi amba zwa vhufhura.
Muthu u amba nga ha mulalo na muhura wawe,
Ngeno mbiluni yawe o mu lalela.”
9 “Naa a tho ngo fanela u vha sengisela zwenezwo zwithu?” u ralo Yehova.
“Naa a tho ngo fanela u ḓilifhedzela kha lwonolwo lushaka?+
10 Ndi ḓo ṱungufhala nda lilela dzithavha
Nda imba luimbo lwa u lilela* mafulo a sogani,
Ngauri o fhiswa uri hu si vhe na muthu ane a fhira nga henefho,
A hu tsha pfala zwifuwo zwi tshi lila.
Zwiṋoni na zwivhanda zwo shavha; a zwi tsheeho.+
11 Ndi ḓo ita uri Yerusalema u vhe thulwi ya matombo,+ u vhe haya ha phunguwe,+
Ndi ḓo ita uri miḓi ya Yuda i vhe mashubi, hu si vhe na muthu ane a dzula khayo.+
12 Ndi nnyi o ṱalifhaho lune a nga kona u pfesesa zwenezwi?
Ndi nnyi we a vhudzwa nga Yehova, uri a zwi ḓivhadze?
Ndi ngani shango ḽo fheliswa?
Ndi ngani ḽo fhiswa ḽa sala ḽi tshi nga soga,
Uri hu si vhe na muthu ane a fhira nga henefho?”
13 Yehova a fhindula a ri: “Ndi nga nṱhani ha uri vho laṱa mulayo* wanga we nda vha vhetshela wone, na nga nṱhani ha uri a vho ngo u tevhedza, a vho ngo thetshelesa zwe nda amba. 14 Nṱhani hazwo, vho ita swili vha tevhela mbilu dzavho,+ vha tevhela zwifanyiso zwa Baali, sa zwe vhokhotsi avho vha vha funza zwone.+ 15 Nga zwenezwo, Yehova wa mavhuthu, Mudzimu wa Isiraele u ri, ‘Ndi ḓo ita uri havha vhathu vha ḽe zwi kalakataho,* ndi ḓo ita uri vha nwe maḓi a re na mulimo.+ 16 Ndi ḓo vha balanganyela kha tshaka dzine vhone na vhokhotsi avho vha si dzi ḓivhe,+ nda ruma banga uri ḽi vha pandamedze u swika ndi tshi vha fhelisa.’+
17 Yehova wa mavhuthu u ri,
‘Ṱhogomelani zwine zwa khou itea.
Vhidzani vhafumakadzi vhane vha imba nyimbo dza zwililo,*+
Ni vhidze vhafumakadzi vha re na vhutsila uri vha ḓe,
18 Uri vha ṱavhanye vha ri lilele,
Uri maṱo ashu a shuluwe miṱodzi
Na tsie dzashu dzi rothise maḓi.+
19 Ngauri ho pfala tshililo ngei Tsioni:+
“Ro tshinyadzwa!
Ro shoniswa zwihulu!
Ro sia shango, vho thutha nnḓu dzashu.”+
20 Inwi vhafumakadzi, ipfani ipfi ḽa Yehova.
Ngavhe nḓevhe dzaṋu dzi tshi pfa ipfi ḽi bvaho mulomoni wawe.
21 Lufu lwo dzhena nga mafasiṱere ashu;
Lwo dzhena nga mitsheṱoni yashu yo khwaṱhaho
Lwa vhulaya vhana nḓilani
Na vhaṱhannga khoroni.’+
22 U ambe uri, ‘Yehova u ri:
“Zwitumbu zwa vhathu zwi ḓo balangana fhasi u fana na manyoro tsimuni,
U fana na thoro dzine dza kha ḓi bva u kaṋiwa,
Dzi si na mukuvhanganyi.”’”+
23 Yehova u ri:
“O ṱalifhaho a songo zuwa vhuṱali hawe;+
Muhali a songo zuwa maanḓa awe;
O pfumaho a songo zuwa lupfumo lwawe.”+
24 “Fhedzi ane a zuwa, nga a zuwe hezwi:
Uri u a nṱalukanya na u nḓivha,+
Uri ndi nṋe Yehova, Ane a sumbedza lufuno lu sa shanduki, khaṱhulo yo teaho na zwivhuya ḽifhasini,+
Ngauri ndi takadzwa nga zwenezwi zwithu,”+ u ralo Yehova.
25 “Maḓuvha a khou ḓa,” u ralo Yehova, “ane nda ḓo sengisa muṅwe na muṅwe o fumbaho na a songo fumbaho,+ 26 ndi ḓo sengisa Egipita+ na Yuda+ na Edomo+ na Vhaamoni+ na Vhamoaba+ na vhoṱhe vha dzulaho sogani,+ vhane vha vheula mavhudzi vha sia a vhukati ha ṱhoho; ngauri tshaka dzoṱhe a dzo ngo fumba, na vha nnḓu yoṱhe ya Isiraele a vho ngo fumba mbiluni.”+