Levitiko

23 Yehova a bvela phanḓa a tshi amba na Mushe a ri: 2 “Amba na Vhaisiraele u ri: ‘Vhuṱambo+ ha Yehova ha ṅwaha muṅwe na muṅwe vhune na fanela u vhu ḓivhadza+ ndi zwivhidzo zwikhethwa. Vhuṱambo hanga ha ṅwaha muṅwe na muṅwe ndi hovhu:

3 “‘Ni nga shuma maḓuvha a rathi, fhedzi nga ḓuvha ḽa vhusumbe ni fanela u awela tshoṱhe,+ ndi muṱangano mukhethwa. Ni songo shuma mushumo naho u ufhio. Ndi ḓuvha ḽa savhatha ya Yehova huṅwe na huṅwe hune na dzula hone.+

4 “‘Hovhu ndi vhuṱambo ha Yehova ha ṅwaha muṅwe na muṅwe, zwivhidzo zwikhethwa, zwine na fanela u zwi ḓivhadza nga zwifhinga zwazwo zwo vhewaho: 5 Nga ṅwedzi wa u thoma nga ḓuvha ḽa vhu 14 ḽa ṅwedzi,+ nga madekwana* ndi Paseka+ ya Yehova.

6 “‘Nga ḓuvha ḽa vhu 15 ḽa wonoyu ṅwedzi ndi Vhuṱambo ha Yehova ha Vhurotho vhu si na Mbiliso.+ Ni ḽe vhurotho vhu si na mbiliso maḓuvha a sumbe.+ 7 Nga ḓuvha ḽa u thoma ni ḓo vha na muṱangano mukhethwa.+ Ni songo shuma mushumo naho u ufhio u lemelaho. 8 Fhedzi ni ṋekedze Yehova zwifhiwa zwa u fhiswa nga mulilo lwa maḓuvha a sumbe. Nga ḓuvha ḽa vhusumbe hu ḓo vha na muṱangano mukhethwa. Ni songo shuma mushumo naho u ufhio u lemelaho.’”

9 Yehova a bvela phanḓa a tshi amba na Mushe a ri: 10 “Amba na Vhaisiraele u ri: ‘Musi ni tshi swika shangoni ḽine nda ḓo ni ṋea ḽone, musi no no kaṋa, ni ḓise ha tshifhe+ khuḽane ya zwiranzhe+ ya khaṋo yaṋu. 11 Tshifhe u ḓo i dzungudzela phanḓa na murahu phanḓa ha Yehova uri ni takalelwe. U i dzungudze nga ḓuvha ḽi tevhelaho Savhatha. 12 Nga ḓuvha ḽine na dzungudza khuḽane ni ṋekedze thutha i sa lwaliho, i re kha ṅwaha wayo wa u thoma, sa tshifhiwa tshi fhiselwaho Yehova. 13 Tshifhiwa tshayo tsha thoro tshi ḓo vha zwipiḓa zwivhili kha zwa fumi zwa tshikalo tsha efa* ya fuḽauru tsekene yo ṱanganyiswaho na mapfura, sa tshifhiwa tshi fhiswaho tsha Yehova tshi nukhelelaho. Tshifhiwa tshatsho tshi nwiwaho tsha tshipiḓa tshithihi kha zwiṋa tsha hini* ya waini. 14 Ni songo ḽa vhurotho naho vhu vhufhio, thoro dzo kadzingwaho, kana thoro ntswa u swika nga ḽeneḽo ḓuvha, u swika ni tshi isa tshifhiwa tsha Mudzimu waṋu. Ndi mulayo wa lini na lini kha mirafho yaṋu yoṱhe huṅwe na huṅwe hune na dzula hone.

15 “‘Ni vhalele savhatha dza sumbe u bva nga ḓuvha ḽa nga murahu ha Savhatha, u bva nga ḓuvha ḽe na ḓisa khuḽane ya tshifhiwa+ tsha u dzungudzwa. Dzi vhe vhege dzo fhelelaho. 16 Ni ḓo vhalela maḓuvha a 50+ u swika nga ḓuvha ḽa nga murahu ha Savhatha ya vhusumbe, nga murahu ni ṋekedze Yehova tshifhiwa tsha thoro ntswa.+ 17 Ni tshi bva hune na dzula hone ni ḓe na ḽofo mbili sa tshifhiwa tsha u dzungudzwa. Zwenezwi zwi bakwe nga zwipiḓa zwivhili kha zwa fumi zwa tshikalo tsha efa* zwa fuḽauru tsekene. Zwi bakwe na mbiliso,+ sa zwiranzhe zwa Yehova.+ 18 U ṋekedze ngwana dza nduna dzi sa lwaliho dza sumbe, dzi re na ṅwaha, na mbohwana nthihi na thutha mbili khathihi na ḽofo.+ Zwi vhe zwifhiwa zwi fhiselwaho Yehova khathihi na tshifhiwa tsha thoro na zwifhiwa zwa u nwiwa. Tshi vhe tshifhiwa tsha u fhiswa tshi nukhelelaho kha Yehova. 19 Ni ṋekedze tshibudzana tshithihi sa tshifhiwa tsha u pfumelela tshivhi+ na ngwana dza nduna mbili, dzi re na ṅwaha sa tshiṱhavhelo tsha u pfumedzana.+ 20 Tshifhe u ḓo tshi dzungudzela phanḓa na murahu khathihi na ḽofo dza zwiranzhe, sa tshifhiwa tsha u dzungudzwa phanḓa ha Yehova, khathihi na ngwana dza nduna mbili. Zwi vhe zwithu zwikhethwa kha Yehova, ndi zwa tshifhe.+ 21 Nga ḽeneḽo ḓuvha ni ḓivhadze+ muṱangano waṋu mukhethwa. Ni songo shuma mushumo naho u ufhio u lemelaho. Ndi mulayo wa lini na lini kha mirafho yaṋu yoṱhe fhethu hoṱhe hune na dzula hone.

22 “‘Musi ni tshi kaṋa tsimu dzaṋu, ni songo kaṋa na swika mukanoni wa tsimu yaṋu, ni songo doba zwo salaho musi ni tshi kaṋa.+ Ni zwi siele vhashai*+ na vhatsinda.+ Ndi nṋe Yehova Mudzimu waṋu.’”

23 Yehova a bvela phanḓa a tshi amba na Mushe a ri: 24 “Vhudza Vhaisiraele u ri: ‘Nga ṅwedzi wa vhusumbe, nga ḓuvha ḽa u thoma ḽa ṅwedzi, ni awele, ḽi vhe ḽa tshihumbudzi nga u lidza phalaphala+ uri hu vhe muṱangano mukhethwa. 25 Ni songo shuma mushumo naho u ufhio u lemelaho, ni ṋekedze Yehova tshifhiwa tshi fhiswaho nga mulilo.’”

26 Yehova a dovha a amba na Mushe a ri: 27 “Naho zwo ralo, nga ḓuvha ḽa vhufumi ḽa wonoyu ṅwedzi wa vhusumbe ndi Ḓuvha ḽa u Pfumelelwa.+ Ni vhe na muṱangano mukhethwa, ni ḓidzime+ ni ṋekedze Yehova tshifhiwa tshi fhiswaho nga mulilo. 28 Ni songo shuma mushumo naho u ufhio nga ḽeneḽo ḓuvha, ngauri ndi ḓuvha ḽa u pfumelelwa u itela u ni pfumelela+ phanḓa ha Yehova Mudzimu waṋu. 29 Ane a sa ḓo ḓidzima nga ḽeneḽo ḓuvha u ḓo vhulawa.+ 30 Ndi ḓo vhulaya ane a shuma mushumo naho u ufhio nga ḽeneḽi ḓuvha. 31 Ni songo shuma mushumo naho u ufhio. Ndi mulayo wa lini na lini kha mirafho yaṋu yoṱhe huṅwe na huṅwe hune na dzula hone. 32 Ndi savhatha yaṋu ya u awela tshoṱhe, ni ḓo ḓidzima+ nga madekwana nga ḓuvha ḽa vhuṱahe ḽa ṅwedzi. Ni tevhedze savhatha yaṋu u bva ḽi tshi kovhela u swika ḽi tshi kovhela nga ḓuvha ḽi tevhelaho.”

33 Yehova a bvela phanḓa a tshi amba na Mushe a ri: 34 “Vhudza Vhaisiraele u ri: ‘Nga ḓuvha ḽa vhu 15 ḽa wonoyu ṅwedzi wa vhusumbe ndi Vhuṱambo ha Mishasha* ha Yehova maḓuvha a sumbe.+ 35 Nga ḓuvha ḽa u thoma hu vhe na muṱangano mukhethwa, ni songo shuma mushumo naho u ufhio u lemelaho. 36 Ni ṋekedze Yehova tshifhiwa tshi fhiswaho nga mulilo lwa maḓuvha a sumbe. Nga ḓuvha ḽa vhumalo ni vhe na muṱangano mukhethwa,+ ni ṋekedze Yehova tshifhiwa tshi fhiswaho nga mulilo. Ndi muṱangano mukhethwa. Ni songo shuma mushumo naho u ufhio u lemelaho.

37 “‘Honovhu ndi vhuṱambo+ ha Yehova ha ṅwaha muṅwe na muṅwe vhune na fanela u vhu ḓivhadza uri ndi miṱangano mikhethwa,+ ha u ṋekedza Yehova zwifhiwa zwo fhiswaho nga mulilo: tshifhiwa tsha u fhiswa,+ tshifhiwa tsha thoro+ tsha tshiṱhavhelo na zwifhiwa zwa u nwiwa+ u ya nga nzudzanyo ya ḓuvha ḽiṅwe na ḽiṅwe. 38 Zwenezwi ndi zwa u engedza kha zwine zwa ṋekedzwa Yehova nga savhatha,+ zwifhiwa zwaṋu,+ zwifhiwa zwaṋu zwa muano+ na zwifhiwa zwaṋu zwa u ḓifunela,+ zwine na fanela u zwi ṋea Yehova. 39 Naho zwo ralo, nga ḓuvha ḽa vhu 15 ḽa ṅwedzi wa vhusumbe, musi ni tshi kuvhanganya zwibveledzwa shangoni, ni pembelele vhuṱambo ha Yehova maḓuvha a sumbe.+ Ḓuvha ḽa u thoma ndi ḽa u awela tshoṱhe na ḓuvha ḽa vhumalo ndi ḽa u awela tshoṱhe.+ 40 Nga ḓuvha ḽa u thoma, ni ḓo fula mitshelo mirini yavhuḓi, maṱari a miri ya mitshevho,+ matavhi a miri i re na maṱari na miri ya mipopula ya govhani,* ni ḓo takala+ phanḓa ha Yehova Mudzimu waṋu maḓuvha a sumbe.+ 41 Ni ḓo ḽi pembelela sa vhuṱambo ha Yehova maḓuvha a sumbe nga ṅwaha.+ Sa mulayo wa lini na lini kha mirafho yaṋu yoṱhe, ni ḽi pembelele nga ṅwedzi wa vhusumbe. 42 Ni dzule mishashani maḓuvha a sumbe.+ Vhaisiraele vhoṱhe vha dzule mishashani, 43 uri mirafho ya tshifhingani tshi ḓaho i ḓivhe+ uri ndo dzudza Vhaisiraele mishashani musi ndi tshi vha bvisa shangoni ḽa Egipita.+ Ndi nṋe Yehova Mudzimu waṋu.’”

44 Ndi zwe Mushe a vhudza Vhaisiraele nga ha vhuṱambo ha Yehova ha ṅwaha muṅwe na muṅwe.