Yoshua

22 Yoshua a vhidza Vharubeni, Vhagada na hafu ya lushaka lwa Manase 2 a amba navho a ri: “No ita zwoṱhe zwe Mushe mushumeli wa Yehova a ni laya,+ no thetshelesa ipfi ḽanga kha zwoṱhe zwe nda ni laya.+ 3 A no ngo laṱedza vhahaṋu u swika zwino,+ no tevhedza ndaela ya Yehova Mudzimu waṋu.+ 4 Zwino Yehova Mudzimu waṋu o awedza vhahaṋu, sa zwe a vha fhulufhedzisa.+ Zwino ni nga humela madenndeni aṋu shangoni ḽe Mushe, mushumeli wa Yehova a ni ṋea uri ḽi vhe ḽaṋu seli* ha Mulambo wa Yorodane.+ 5 Ni tevhedze nga vhuronwane ndaela na Mulayo zwe Mushe mushumeli wa Yehova a ni ṋea,+ nga u funa Yehova Mudzimu waṋu,+ nga u tshimbila nḓilani dzawe dzoṱhe,+ nga u tevhedza ndaela dzawe,+ nga u fhulufhedzea khae+ na u mu shumela+ nga mbilu yaṋu yoṱhe na nga zwoṱhe zwine na vha zwone.”+

6 Nga zwenezwo, Yoshua a vha fhaṱutshedza a vha tendela vha tshi ṱuwa; vha ṱuwa vha ya madenndeni avho. 7 Mushe o ṋea hafu ya lushaka lwa Manase ifa ngei Bashani,+ Yoshua o ṋea iṅwe hafu ya lushaka lwa Manase na vhahavho shango ḽa vhukovhela ha Mulambo wa Yorodane.+ Zwiṅwe hafhu, musi Yoshua a tshi vha tendela vha tshi ya madenndeni avho, o vha fhaṱutshedza 8 a amba navho a ri: “Vhuyelelani madenndeni aṋu ni na lupfumo lunzhi, zwifuwo zwinzhi vhukuma, siḽiva, musuku, koporo, tsimbi na zwiambaro zwinzhi vhukuma.+ Zwe na thuba kha maswina aṋu, ni kovhekane+ na vhahaṋu.”

9 Nga murahu ha zwenezwo, Vharubeni, Vhagada na hafu ya lushaka lwa Manase vha ṱuwa vha sia vhaṅwe Vhaisiraele henefho Shiḽo shangoni ḽa Kanana, vha vhuyelela shangoni ḽa Giḽiada,+ shango ḽine ḽa vha ifa ḽavho hune vha ḓo dzula hone sa zwe vha laiwa nga Yehova a tshi shumisa Mushe.+ 10 Musi vha tshi swika tsini na madzinguni a Yorodane shangoni ḽa Kanana, Vharubeni na Vhagada na hafu ya lushaka lwa Manase vha fhaṱa aḽeṱare khulu henefho tsini na Mulambo wa Yorodane. 11 Nga murahu vhaṅwe Vhaisiraele vha zwi pfa+ vha ri: “Vharubeni, Vhagada na hafu ya lushaka lwa Manase vho fhaṱa aḽeṱare mukanoni wa shango ḽa Kanana, tsini na Mulambo wa Yorodane nga thungo ya Vhaisiraele.” 12 Musi Vhaisiraele vha tshi zwi pfa, tshitshavha tshoṱhe tsha kuvhangana ngei Shiḽo+ u itela u lwa navho.

13 Vhaisiraele vha ruma Finiasi,+ murwa wa tshifhe Eliasara uri a ye kha Vharubeni, Vhagada na hafu ya lushaka lwa Manase ngei shangoni ḽa Giḽiada, 14 e na vharangaphanḓa vha fumi, murangaphanḓa muthihi wa nnḓu ya vhokhotsi kha tshaka dzoṱhe dza Isiraele, murangaphanḓa muṅwe na muṅwe wa nnḓu ya vhokhotsi kha Vhaisiraele vha zwigidi.+ 15 Musi vha tshi swika ha Vharubeni, Vhagada na hafu ya lushaka lwa Manase shangoni ḽa Giḽiada vha ri:

16 “Zwe tshitshavha tshoṱhe tsha Yehova tsha zwi amba ndi hezwi: ‘Ndi ngani ni songo fhulufhedzea+ kha Mudzimu wa Isiraele? Ṋamusi no litsha u tevhela Yehova nga u ḓifhaṱela aḽeṱare na dovha na vutshela Yehova.+ 17 Naa vhukhakhi he ra vhu ita ngei Pheoro ho vha vhu vhuṱuku? A ri athu u ḓikunakisa khaho u swika na ṋamusi, naho tshitshavha tsha Yehova tsho ḓelwa nga dwadze.+ 18 Ṋamusi ni khou shandukela Yehova! Arali ṋamusi na shandukela Yehova, matshelo u ḓo sinyutshela tshitshavha tshoṱhe tsha Isiraele.+ 19 Arali zwi tshi khou itiswa ngauri shango ḽine na khou dzula khaḽo ḽi na tshika, wetshelani shangoni ḽe Yehova a ni ṋea+ hune ha vha na dennde ḽikhethwa* ḽa Yehova,+ ni dzule vhukati hashu, fhedzi ni songo shandukela Yehova, ni songo ita uri ri vhe mashandukwa nga u fhaṱa aḽeṱare, ngeno aḽeṱare ya Yehova Mudzimu washu i hone.+ 20 Musi Akani+ murwa wa Zera a songo fhulufhedzea nga u tswa zwithu zwe zwa vha zwi tshi fanela u fheliswa, naa Mudzimu ho ngo sinyutshela tshitshavha tshoṱhe tsha Isiraele?+ A si ene e eṱhe we a fa nga nṱhani ha vhukhakhi hawe.’”+

21 Vharubeni, Vhagada na hafu ya lushaka lwa Manase vha tshi pfa zwenezwi vha fhindula vharangaphanḓa vha zwigidi vha Isiraele+ vha ri: 22 “Yehova Mudzimu a fhiraho miṅwe midzimu, Yehova Mudzimu a fhiraho miṅwe midzimu,+ u a ḓivha, na Isiraele u ḓo zwi ḓivha. Arali ri mashandukwa, ri sa fhulufhedzei kha Yehova, ni songo ri litsha ri tshi tshila ṋamusi. 23 Arali ro ḓifhaṱela aḽeṱare uri ri shandukele Yehova na uri ri ṋekedze zwifhiwa zwa u fhiswa, zwifhiwa zwa thoro, zwiṱhavhelo zwa u pfumedzana khayo, Yehova u ḓo ri pfisa vhuṱungu.+ 24 Hai, zwenezwi ro zwi itiswa nga dziṅwe mbilaelo, ngauri ro ri: ‘Tshifhingani tshi ḓaho, vhana vhaṋu vha ḓo amba na vhana vhashu vha ri: “Ni na mafhungo-ḓe na Yehova Mudzimu wa Isiraele? 25 Yehova o vhea Mulambo wa Yorodane uri u vhe mukano vhukati hashu na inwi, Vharubeni na Vhagada. A ni na mukovhe kha zwa Yehova.” Vhana vhaṋu vha ḓo thivhela vhana vhashu u gwadamela* Yehova.’

26 “Nga zwenezwo, ro amba ra ri: ‘Kha ri ḓifhaṱele aḽeṱare, hu si ya zwifhiwa zwa u fhiswa kana zwiṱhavhelo, 27 fhedzi uri i vhe vhuṱanzi vhukati ha inwi na riṋe+ na vhaḓuhulu* vhashu uri ri ḓo ita mushumo wa Yehova phanḓa hawe nga zwifhiwa zwashu zwa u fhiswa na zwiṱhavhelo zwashu na zwiṱhavhelo zwashu zwa u pfumedzana,+ uri vhana vhaṋu vha si ambe na vhana vhashu tshifhingani tshi ḓaho vha ri: “A ni na mukovhe kha zwa Yehova.”’ 28 Ra fhindula ra ri: ‘Arali vha amba na riṋe na vhaḓuhulu* vhashu tshifhingani tshi ḓaho, ri ḓo ri: “Vhonani aḽeṱare ye vhomakhulukuku washu vha i fhaṱa ine ya fana na aḽeṱare ya Yehova, yo vha i si ya zwifhiwa zwa u fhiswa kana zwiṱhavhelo, fhedzi yo vha i vhuṱanzi vhukati ha inwi na riṋe.”’ 29 Ri nga si ite zwithu zwo raloho ra shandukela Yehova ri si tsha tevhela Yehova+ nga u fhaṱa aḽeṱare ya zwifhiwa zwa u fhiswa, zwifhiwa zwa thoro na zwiṱhavhelo, nga nnḓa ha aḽeṱare ya Yehova Mudzimu washu, i re phanḓa ha dennde ḽikhethwa!”+

30 Musi tshifhe Finiasi, vharangaphanḓa vha tshitshavha na vhane vha ranga phanḓa vha zwigidi vha Isiraele vha tshi pfa zwe vhaḓuhulu vha Rubeni, vha Gada na vha Manase vha zwi amba, vha fushea.+ 31 Ngauralo, Finiasi murwa wa tshifhe Eliasara a amba na vhaḓuhulu vha Rubeni, vha Gada na vha Manase a ri: “Ṋamusi ri a zwi ḓivha uri Yehova u vhukati hashu, ngauri no fhulufhedzea kha Yehova. Zwino no tshidza Vhaisiraele tshanḓani tsha Yehova.”

32 Finiasi murwa wa tshifhe Eliasara na vharangaphanḓa vha ṱutshela Vharubeni na Vhagada shangoni ḽa Giḽiada vha humela shangoni ḽa Kanana, vha anetshela vhaṅwe Vhaisiraele. 33 Vhaisiraele vha fushea nga zwe vha zwi pfa. Vhaisiraele vha renda Mudzimu, vha si tsha dovha vha amba tshithu nga ha u lwa navho na u fhelisa shango ḽe Vharubeni na Vhagada vha vha vha tshi dzula khaḽo.

34 Ngauralo, Vharubeni na Vhagada vha ira yeneyo aḽeṱare,* ngauri “ndi vhuṱanzi vhukati hashu ha uri Yehova ndi Mudzimu wa ngoho.”