Mishumo Ya Vhaapostola
23 Paulo a lavhelesa Sanihedrini* a ri: “Vhahashu, ndi nga amba phanḓa ha Mudzimu uri luvalo lwanga lwo kuna+ u swika na ṋamusi.” 2 Musi tshifhe muhulu Anania a tshi pfa zwenezwo, a vhudza vho imaho tsini nae uri vha mu rwe mulomo. 3 Paulo a amba nae a ri: “Mudzimu u ḓo rwa iwe ane wa nga luvhondo lwo penndwaho nga pennde tshena. Naa wo dzula uri u ntsengise u ya nga Mulayo ngeno u tshi khou pfuka Mulayo nga u amba uri ndi rwiwe?” 4 Vho imaho henefho tsini vha ri: “Naa u khou sema tshifhe muhulu wa Mudzimu?” 5 Paulo a ri: “Vhahashu, ndo vha ndi sa zwi ḓivhi uri ndi tshifhe muhulu. Ngauri ho ṅwaliwa u pfi, ‘U songo sema muvhusi wa vhathu vha hau.’”+
6 Ngauri Paulo o vha a tshi zwi ḓivha uri vhaṅwe vhanna vha re henefho vho vha vhe Vhasadukei vhaṅwe vhe Vhafarisei, a vhidzelela henefho Sanihedrini a ri: “Vhahashu, nṋe ndi Mufarisei,+ ndi murwa wa Vhafarisei. Ndi khou haṱulwa ngauri ndi tenda uri vhafu vha ḓo vuswa.” 7 Nga nṱhani ha zwenezwo, ha vha na khani vhukati ha Vhafarisei na Vhasadukei, tshenetsho tshigwada tsha fhandekana. 8 Ngauri Vhasadukei vha ri vhafu a vha nga vuswi, a hu na muruṅwa kana tshivhumbiwa tsha muya, ngeno Vhafarisei vha tshi tenda zwoṱhe.+ 9 Ha vuwa bonyongo, vhaṅwe vhaḓivhi vha mulayo vha tshigwada tsha Vhafarisei vha takuwa vha hanedza vho halifha vha ri: “Hoyu munna a ri mu vhoni mulandu, arali tshivhumbiwa tsha muya kana muruṅwa o amba nae+—.” 10 Musi yeneyo khani i tshi vho hulela, mulangammbi a ofha uri vha ḓo vhulaya Paulo, a vhudza maswole uri a ye a mu bvise vhukati havho, a mu ise gammbani ya maswole.
11 Fhedzi nga honoho vhusiku, Murena a ima phanḓa hawe a ri: “U songo ofha!+ Samusi wo ṱanziela nga vhuḓalo nga ha nṋe fhano Yerusalema, u tea u ita nga u ralo na ngei Roma.”+
12 Musi ḽo no tsha, Vhayuda vha langana uri vha mu vhulaye, vha ana vha ri: “A ri nga ḽi kana u nwa u swikela ri tshi vhulaya Paulo, ra sa ita nga u ralo ri ḓo vha ro semiwa.” 13 Vhanna vhe vha ita wonoyo muano vho vha vha tshi fhira 40. 14 Vha ya kha vhahulwane vha vhotshifhe na kha vhahulwane vha ri: “Ro ana uri ri nga si ḽe ri songo thoma ra vhulaya Paulo. 15 Inwi na Sanihedrini ni fanela u vhudza mulangammbi uri a ḓise Paulo kha inwi, ni ite u nga ni khou ṱoḓa u mu vhudzisa dziṅwe mbudziso. Fhedzi musi a sa athu u swika, ri ḓo mu lalela ra mu vhulaya.”
16 Naho zwo ralo, muḓuhulu wa Paulo a pfa nga ha tshenetsho tshikwekwe, a ya gammbani ya maswole a sevha Paulo nga ha eneo mafhungo. 17 Paulo a vhidza muṅwe muhulwane wa maswole a ri: “Isa hoyu muṱhannga kha mulangammbi, ngauri u na zwine a ṱoḓa u mu vhudza.” 18 A dzhia onoyo muṱhannga a mu isa kha mulangammbi a ri: “Uḽa Paulo wo mu faraho o ri ndi ḓise uyu muṱhannga kha iwe, ngauri hu na zwine a ṱoḓa u u vhudza.” 19 Mulangammbi a mu fara nga tshanḓa a ya a ima thungo nae a ri: “Ndi mini zwine wa ṱoḓa u mmbudza?” 20 Ene a ri: “Vhayuda vho langana uri vha humbele uri Paulo a ḓiswe Sanihedrini matshelo uri zwi nge vha ṱoḓa u mu vhudzisa dziṅwe mbudziso.+ 21 Fhedzi u songo ita zwine vha u humbela, ngauri vhanna vha fhiraho 40 vho mu lalela, vho ana uri vha nga si ḽe kana u nwa vha songo thoma vha mu vhulaya;+ vho lindela u tshi ita zwine vha ḓo u humbela.” 22 Mulangammbi a vhudza onoyo muṱhannga uri a ṱuwe, a ri: “U songo vhuya wa vhudza muthu uri wo mmbudza enea mafhungo.”
23 Ndi hone mulangammbi a tshi vhidza vhahulwane vha maswole vhavhili a ri: “Kuvhanganyani maswole a 200, vhaṋameli vha bere vha 70 na maswole a 200 o faraho mapfumo uri a ḓilugiselele u ya Kesarea, a vhe o luga nga awara ya vhuraru ya vhusiku.* 24 Ni ṋee Paulo bere ni mu ise kha muvhusi Felikisi o tsireledzea.” 25 A ṅwala vhurifhi vhune ha ri:
26 “Nṋe Klaudio Lisia ndi ṅwalela iwe Thovhela Muvhusi Felikisi: Ri a vusa! 27 Onoyo munna o vha o farwa nga Vhayuda vha tshi ṱoḓa u mu vhulaya, nga u ṱavhanya nṋe na maswole anga ra ya ra mu lamulela,+ ngauri ndo pfa uri ndi Muroma.+ 28 Nda mu isa kha Sanihedrini+ yavho ngauri ndo vha ndi tshi ṱoḓa u ḓivha zwe a vha a tshi khou pomokwa zwone. 29 O vha a tshi khou pomokwa nga ha mafhungo ane a tshimbidzana na Mulayo wavho,+ fhedzi a si na mulandu une wa nga ita uri a vhulawe kana u valelwa dzhele. 30 Fhedzi ngauri ndo pfa nga zwe vha langana u ita onoyo munna,+ ndo vhona zwi khwine u mu rumela kha iwe, nda vhudza na vhane vha mu pomoka uri vha ḓise wonoyu mulandu kha iwe.”
31 Enea maswole a ita zwe a vhudzwa, a dzhia Paulo+ a mu isa Antipatiri vhusiku. 32 Nga ḓuvha ḽi tevhelaho vhaṋameli vha bere vha ṱuwa nae, fhedzi maswole a vhuyelela gammbani yao. 33 Vhaṋameli vha bere vha swika Kesarea vha ṋea muvhusi vhurifhi na u mu kumedzela Paulo. 34 A vhu vhala, a mu vhudzisa vundu ḽine a bva khaḽo, a pfa uri u bva Kilikia.+ 35 A ri: “Ndi ḓo pfa mafhungo au musi vha u pomokaho vha tshi swika.”+ A amba uri a dzule o lindwa pfamoni ya Herode.