Genesi
47 Yosefa a ya ha Farao a mu vhigela a ri:+ “Khotsi anga na vhakomana vhanga vho ḓa vha tshi bva shangoni ḽa Kanana vhe na nngu dzavho, kholomo dzavho na thundu yavho yoṱhe, vha shangoni ḽa Gosheni.”+ 2 A dzhia vhakomana vhawe vhaṱanu a vha isa ha Farao.+
3 Farao a vha vhudzisa a ri: “Ni shuma mushumo-ḓe?” Vha fhindula Farao vha ri: “Vhashumeli vhau ndi vhalisa vha nngu, u fana na vhomakhulukuku wavho.”+ 4 Vha amba na Farao vha ri: “Nḓala ndi khulu shangoni ḽa Kanana,+ a hu na pfulo ya masambi. Nga zwenezwo, ro ḓa fhano u dzula sa vhatsinda.+ Zwino ri humbela uri u tendele vhashumeli vhau vha dzule shangoni ḽa Gosheni.”+ 5 Farao a amba na Yosefa a ri: “Khotsi au na vhakomana vhau vho ḓa fhano ha iwe. 6 Shango ḽa Egipita ndi ḽau. Ita uri khotsi au na vhakomana vhau vha dzule fhethu havhuḓi vhukuma.+ Vha litshe vha dzule shangoni ḽa Gosheni, arali u tshi ḓivha vhanna vha re na vhukoni vhukati havho, u fanela u vha vhea uri vha ṱhogomele zwifuwo zwanga.”
7 Yosefa a isa khotsi awe Yakobo ha Farao a mu ḓivhadza khae, Yakobo a fhaṱutshedza Farao. 8 Farao a vhudzisa Yakobo a ri: “U na miṅwaha mingana?” 9 Yakobo a fhindula Farao a ri: “Miṅwaha ye nda i fhedza ndi tshi khou tendeleka* ndi 130. Miṅwaha ya vhutshilo hanga ya u tsikeledzea yo vha i si gathi,+ ndi miṱuku kha ye vhomakhulukuku wanga vha i fhedza vha tshi khou tendeleka.”*+ 10 Nga murahu ha zwenezwo, Yakobo a fhaṱutshedza Farao a ṱuwa phanḓa hawe.
11 Yosefa a ita uri khotsi awe na vhakomana vhawe vha dzule shangoni ḽa Egipita, fhethu havhuḓi vhukuma shangoni ḽa Ramasese,+ samusi Farao o vha o laedza. 12 Yosefa a ḓi dzula a tshi ṋea khotsi awe zwiḽiwa* na vhakomana vhawe na muṱa woṱhe wa khotsi awe, zwi tshi ya nga tshivhalo tsha vhana vhavho.
13 Ho vha hu si na zwiḽiwa* shangoni ḽoṱhe, ngauri nḓala yo vha i khulu vhukuma; hu si tsha vha na tshithu shangoni ḽa Egipita na ḽa Kanana nga nṱhani ha nḓala.+ 14 Yosefa a kuvhanganya tshelede yoṱhe ye vhathu vha shango ḽa Egipita na ḽa Kanana vha vha vha tshi khou renga ngayo goroi;+ Yosefa a ḓi dzula a tshi isa yeneyo tshelede mbulungeloni ya Farao. 15 Nga u ya ha tshifhinga tshelede ya vhathu vha Egipita na vha Kanana ya fhela, Vhaegipita vhoṱhe vha thoma u ya ha Yosefa, vha ri: “Ri ṋee zwiḽiwa! Ndi ngani ri tshi nga tou fa wo lavhelesa nga nṱhani ha uri tshelede yashu yo fhela?” 16 Yosefa a ri: “Arali tshelede yaṋu yo fhela, ḓisani zwifuwo zwaṋu ndi ni ṋee zwiḽiwa.” 17 Vha thoma u ḓisa zwifuwo zwavho kha Yosefa; Yosefa a ḓi vha ṋea zwiḽiwa vhone vha tshi mu ṋea bere, nngu, kholomo na donngi, nga wonoyo ṅwaha Yosefa a ḓi bvela phanḓa a tshi vha ṋea zwiḽiwa vhone vha tshi mu ṋea zwifuwo zwavho.
18 Wonoyo ṅwaha wa vhuya wa fhela, nga ṅwaha u tevhelaho vha ḓa khae vha ri: “Muṋe washu, a ri nga u dzumbeli uri ro no ḓi u ṋea tshelede na masambi a zwifuwo. A ri tshee na tshithu tsha u ṋea muṋe washu nga nnḓa ha mivhili yashu na masimu ashu. 19 Ndi ngani ri tshi nga tou fa wo lavhelesa, riṋe na masimu ashu? Ri renge khathihi na masimu ashu uri u ri ṋee zwiḽiwa, riṋe khathihi na masimu ashu ri ḓo vha vhalanda vha Farao. Ri ṋee mbeu uri ri kone u tshila ri si fe, shango ḽashu ḽi sa sale ḽi si na vhathu.” 20 Yosefa a rengela Farao shango ḽoṱhe ḽa Vhaegipita, ngauri Muegipita muṅwe na muṅwe o vha o rengisa tsimu yawe, ngauri nḓala yo vha i khulu vhukuma; masimu a vha a Farao.
21 Nga zwenezwo, a pfulusela vhathu miḓini i re tsini, u bva thungo dzoṱhe dza shango ḽa Egipita.+ 22 Masimu e a si a renge ndi a vhotshifhe fhedzi,+ ngauri zwiḽiwa zwavho zwo vha zwi tshi bva ha Farao. Ndi ngazwo vha songo rengisa masimu avho. 23 Nga zwenezwo Yosefa a amba na vhathu a ri: “Ḓivhani uri u bva ṋamusi ndo ni renga khathihi na masimu aṋu no no vha vha Farao. Mbeu kheyi, ni tea u i zwala masimuni. 24 Musi ni tshi kaṋa, ni fanela u ṋea Farao+ tshithihi tsha zwiṱanu, fhedzi zwiṋa kha zwiṱanu ndi zwaṋu ndi mbeu ya masimuni na zwiḽiwa zwaṋu na vha miṱa yaṋu na vhana vhaṋu uri vha ḽe.” 25 Nga zwenezwo vha ri: “Wo ri tshidza.+ U nga ri muṋe washu a nga ri takalela, ri ḓo vha vhalanda vha Farao.”+ 26 Yosefa a zwi ita mulayo, une wa kha ḓi shuma na ṋamusi shangoni ḽoṱhe ḽa Egipita, uri tshithihi tsha zwiṱanu ndi tsha Farao. Ndi masimu a vhotshifhe fhedzi e Farao a si a dzhie.+
27 Isiraele a bvela phanḓa a tshi dzula shangoni ḽa Egipita, shangoni ḽa Gosheni;+ vha fhaṱa henefho vha beba vha anda vhukuma.+ 28 Yakobo a tshila miṅwe miṅwaha ya 17 shangoni ḽa Egipita, miṅwaha ya vhutshilo hawe ya vha 147.+
29 Tshifhinga tsha uri Isiraele a fe+ tsho vha tshi tshi khou sendela, ngauralo a vhidza murwa wawe Yosefa a ri: “Arali u tshi ntakalela, vhea tshanḓa tshau fhasi ha tshirumbi tshanga, u ntsumbedze lufuno lu sa shanduki na uri u a fhulufhedzea. Ndi humbela uri u songo mbulunga Egipita.+ 30 Musi ndi tshi fa,* u tea u mbvisa shangoni ḽa Egipita wa mbulunga vhiḓani ḽa vhomakhulukuku wanga.”+ Yosefa a ri: “Ndi ḓo ita zwine wa khou zwi amba.” 31 Nga zwenezwo a ri: “Nnyanele.”+ A mu anela. Isiraele a khotha e henefho mmbeteni wawe.+