Bugu Ya Vhuvhili Ya Koronika
33 Manase+ o vha e na miṅwaha ya 12 musi a tshi vha khosi, o vhusa miṅwaha ya 55 e Yerusalema.+
2 O ita zwi sa takadzi Yehova, o tevhela maitele a nengisaho a tshaka dze Yehova a dzi pandela phanḓa ha vhathu vha Isiraele.+ 3 O fhaṱulula fhethu ha vhurabeli he khotsi awe Hiskia a hu thutha,+ a fhaṱela Vhobaali aḽeṱare, a ita na thanda khethwa,* a gwadamela mavhuthu oṱhe a ṱaḓulu, a a shumela.+ 4 O dovha a fhaṱa dziaḽeṱare nḓuni ya Yehova,+ fhethu he Yehova a vha o ri: “Ndi ḓo vhea dzina ḽanga ngei Yerusalema lini na lini.”+ 5 O fhaṱela mavhuthu oṱhe a ṱaḓulu dziaḽeṱare miṱani mivhili ya nnḓu ya Yehova.+ 6 O posa vharwa vhawe muliloni+ ngei Govhani ḽa Murwa wa Hinomi;+ o ita zwa manditi,+ zwa madambi, zwa u tungula, zwa vhuloi na u vhea mingome na vhane vha bvumba.+ O ita zwi sa takadzi Yehova nga ho kalulaho, a mu sinyusa.
7 A vhea tshifanyiso tsho vhaḓwaho nḓuni ye Mudzimu wa ngoho+ a amba nga hayo na Davida na murwa wawe Salomo a ri: “Kha heyi nnḓu na ngei Yerusalema, he nda hu nanga kha tshaka dzoṱhe dza Isiraele, ndi ḓo vhea dzina ḽanga lini na lini.+ 8 A thi tsha ḓo dovha nda bvisa milenzhe ya Vhaisiraele kha shango ḽe nda ḽi ṋea vhomakhulukuku wavho, arali vha tevhedza nga vhuronwane zwoṱhe zwe nda vha laya, Mulayo woṱhe, maitele na mahaṱulele zwe nda vha ṋea zwone ndi tshi shumisa Mushe.” 9 Manase a bvela phanḓa a tshi xedza Vhayuda na vhadzulapo vha Yerusalema, a ita uri vha ite vhuvhi vhuhulu vhu fhiraho ha tshaka dze Yehova a dzi fhelisa phanḓa ha Vhaisiraele.+
10 Yehova a bvela phanḓa a tshi amba na Manase na vhathu vhawe, fhedzi vha si thetshelese.+ 11 Yehova a vha ḓisela vhalangammbi vha khosi ya Asuri, vha hovha Manase nga zwihovhi* vha mu vhofha nga ngeḓane mbili dza koporo vha mu isa Babele. 12 Musi o tsikeledzea, a humbela Yehova Mudzimu uri a mu khathutshele, a ḓiṱukufhadza nga maanḓa phanḓa ha Mudzimu wa vhomakhulukuku wawe. 13 A bvela phanḓa a tshi rabela Mudzimu, we a kwamea nga tshililo tshawe, a pfa khumbelo yawe ya u ṱoḓa u khathutshelwa, a mu vhuyedzedza Yerusalema vhuhosini hawe.+ Manase a ḓivha zwa uri Yehova ndi Mudzimu wa ngoho.+
14 Nga murahu ha zwenezwo, a fhaṱa luvhondo lwa nga nnḓa lwa Muḓi wa Davida+ thungo ya vhukovhela ha govhani* ḽa Gihoni+ u vhuya u swika Khoroni ya Khovhe,+ lwa mona lwa swika Ofele,+ a lu lapfisa nga maanḓa. A dovha a vhea vhalangammbi kha miḓi yoṱhe yo tsireledzwaho nga mbondo ngei Yuda. 15 A dovha a bvisa midzimu ya mazwifhi na mudzimu wa tshifanyiso nḓuni ya Yehova+ na aḽeṱare dzoṱhe dze a dzi fhaṱa thavhani ya nnḓu ya Yehova+ na ngei Yerusalema, a zwi laṱa nnḓa ha muḓi. 16 A lugiselela na aḽeṱare ya Yehova,+ a thoma u ṋekedza zwiṱhavhelo zwa u pfumedzana+ na zwiṱhavhelo zwa u livhuwa khayo,+ a vhudza Vhayuda uri vha shumele Yehova Mudzimu wa Isiraele. 17 Naho zwo ralo, vhathu vho vha vha tshi kha ḓi ṋekedza zwiṱhavhelo fhethu ha vhurabeli, fhedzi vho vha vha tshi khou zwi ṋekedza Yehova Mudzimu wavho.
18 Mafhungo oṱhe a Manase na thabelo ye a i rabela Mudzimu wawe na mafhungo a vhavhoni vhe vha amba nae dzinani ḽa Yehova Mudzimu wa Isiraele, o ṅwaliwa kha mafhungo a mahosi a Isiraele. 19 Na thabelo yawe+ na nḓila ye tshililo tshawe tsha fhindulwa ngayo na zwivhi zwawe zwoṱhe na u sa fhulufhedzea hawe+ na u fhaṱa hawe fhethu ha vhurabeli na u imisa thanda khethwa*+ na zwifanyiso zwo vhaḓwaho musi a sa athu u ḓiṱukufhadza, zwo ṅwaliwa kha mafhungo a vhavhoni. 20 Manase a vhulungwa na vhomakhulukuku wawe, a vhulungwa nḓuni yawe; murwa wawe Amoni a vha khosi vhudzuloni hawe.+
21 Amoni+ o vha e na miṅwaha ya 22 musi a tshi vha khosi, o vhusa miṅwaha mivhili e Yerusalema.+ 22 O bvela phanḓa a tshi ita zwi sa takadzi Yehova, u fana na zwe zwa itwa nga khotsi awe Manase;+ Amoni a ṋekedza zwiṱhavhelo kha midzimu yoṱhe ya zwifanyiso zwo vhaḓwaho ye khotsi awe Manase a i ita,+ a i shumela. 23 Fhedzi ho ngo ḓiṱukufhadza phanḓa ha Yehova+ u fana na khotsi awe Manase we a ḓiṱukufhadza;+ nṱhani hazwo Amoni o tou engedza mulandu wawe. 24 Mafheleloni vhashumeli vhawe vha mu itela tshimbevha,+ vha mu vhulayela nḓuni yawe. 25 Fhedzi vhathu vha ḽeneḽo shango vha vhulaya vhoṱhe vhe vha itela Khosi Amoni tshimbevha,+ vha vhea murwa wawe Yosia uri a vhe khosi vhudzuloni hawe.+