Mishumo Ya Vhaapostola
14 Musi vhe Ikonio vha dzhena sinagogoni ya Vhayuda vha funza, gogo ḽa Vhayuda na ḽa Vhagerika ḽa tenda. 2 Fhedzi Vhayuda vhe vha si tende vha ṱuṱuwedza vhathu vha dzitshaka uri vha lwe na Paulo na Baranaba.+ 3 Vha fhedza vhege nnzhi vhe henefho, vho ṋewa maanḓa nga Yehova* a u amba nga tshivhindi nga ha mulaedza wa vhuthu hawe vhuhulu, a vha shumisa u ita vhuṱolo na zwithu zwi mangadzaho u itela u khwaṱhisedza wonoyo mulaedza.+ 4 Naho zwo ralo, vhathu vha wonoyo muḓi vha fhandekana; vhaṅwe vha ima na Vhayuda, vhaṅwe vha ima na vhaapostola. 5 Musi vhathu vha dzitshaka, Vhayuda na vharangaphanḓa vhavho vha tshi ṱoḓa u fara vhaapostola uri vha vha vhaise nga u vha kanḓa nga matombo,+ 6 vhaapostola vha zwi pfa, vha shavhela miḓini ya Likaonia, Lisitara, Derebe na mashangoni a tsini.+ 7 Vha ḓivhadza mafhungo maḓifha henefho.
8 Ho vha hu na muṅwe munna ngei Lisitara we a vha a tshi ṱwa o dzula. Onoyo munna o bebwa o holefhala a sa koni u tshimbila. 9 O vha o thetshelesa musi Paulo a tshi khou amba. Paulo a mu lavhelesa a vhona uri u a tenda uri u ḓo fhola,+ 10 a vhidzelela a ri: “Takuwa u ime.” Onoyo munna a thamuwa a tshimbila.+ 11 Musi vhathu vha tshi vhona zwe Paulo a zwi ita, vha vhidzelela nga Tshilikaonia vha ri: “Midzimu yo ḓiita vhathu, ya tsela kha riṋe!”+ 12 Vha thoma u vhidza Baranaba vha ri ndi Ziasi, fhedzi Paulo vha ri ndi Heremosi, ngauri ndi ene we a vha a tshi khou amba nga maanḓa. 13 Tshifhe wa Ziasi, we thembele yawe ya vha i tsini na muḓi, a ḓisa kholomo na maluvha* henefho khoroni, ene na gogo vho vha vha tshi khou ṱoḓa u ṋekedza zwiṱhavhelo.
14 Musi Baranaba na Paulo* vha tshi zwi pfa, vha kherula zwiambaro, vha dzhena vhukati ha gogo vha vhidzelela vha ri: 15 “Vhahashu, ni khou zwi itela mini? Na riṋe ri vhathu vha re na vhushayanungo u fana na inwi.+ Ri khou ni ḓivhadza mafhungo maḓifha, uri ni ṱutshele hezwi zwithu zwa mahandana ni rembulutshele kha Mudzimu a tshilaho, we a sika ḽiṱaḓulu, ḽifhasi, lwanzhe na zwoṱhe zwi re khazwo.+ 16 Tshifhingani tsho fhiraho o tendela tshaka dzoṱhe dzi tshi ita zwine dza funa,+ 17 naho zwo ralo o ni ṋea vhuṱanzi+ nga u ni itela zwithu zwavhuḓi, o ni nisela mvula, a ita uri ni kaṋe zwinzhi nga tshifhinga tsha hone,+ a ni ṋea na zwiḽiwa, a takadza na mbilu dzaṋu.”+ 18 Musi vho no amba zwenezwo, vha thivhela gogo uri ḽi si vha itele zwiṱhavhelo, fhedzi zwo vha zwi songo leluwa.
19 Ha swika Vhayuda vha bvaho Antiokia na Ikonio vha ṱuṱuwedza gogo,+ ḽa kanḓa Paulo nga matombo, ḽa mu kokodzela nnḓa ha muḓi ḽi tshi vhona u nga o fa.+ 20 Musi vhafunziwa vha tshi mu tanga, a vuwa a vhuyelela muḓini. Nga ḓuvha ḽi tevhelaho a ṱuwa na Baranaba vha ya Derebe.+ 21 Vho no ḓivhadza mafhungo maḓifha kha wonoyo muḓi na u ita vhafunziwa vhanzhi, vha humela Lisitara, Ikonio na Antiokia. 22 Henefho vha khwaṱhisa vhafunziwa,+ na u vha ṱuṱuwedza uri vha dzule vhe na lutendo, vha ri: “Ri fanela u tambula zwihulu uri ri dzhene Muvhusoni wa Mudzimu.”+ 23 Zwiṅwe hafhu, Paulo na Baranaba vha vhea vhahulwane zwivhidzoni zwoṱhe,+ vha rabela na u ḓidzima zwiḽiwa,+ vha vha kumedzela kha Yehova* we vha mu tenda.
24 Vha fhira nga Pisidia vha ya Pamfilia,+ 25 musi vho no amba ipfi ḽa Mudzimu ngei Perege, vha ya Atalia. 26 U bva henefho vha ṋamela tshikepe vha ya Antiokia, he vha sumbedzwa vhuthu vhuhulu ha Mudzimu nga nṱhani ha mushumo we vha u ita.+
27 Musi vho no swika vha kuvhanganya tshivhidzo tshoṱhe, vha vha vhudza zwithu zwinzhi zwe Mudzimu a zwi ita a tshi vha shumisa, na uri o thusa dzitshaka uri dzi mu tende.+ 28 Vha fhedza tshifhinga tshilapfu vhe na vhafunziwa.