Genesi

41 Ho no fhela miṅwaha mivhili, Farao a ḽora+ o ima tsini na Mulambo wa Nili. 2 Ha bvelela kholomo dza sumbe dzo nakaho na dzo nonaho mulamboni, dzi tshi khou fula hatsi henefho Mulamboni wa Nili.+ 3 Ha vha na dziṅwe dza sumbe dze dza tevhela dziḽa dziṅwe dzi tshi bva henefho Mulamboni wa Nili, dzo vhifha, dzo onda, dza ima tsini na dziḽa dziṅwe kholomo philiphilini ya Mulambo wa Nili. 4 Nga zwenezwo, kholomo dzo vhifhaho na dzo ondaho dza thoma u ḽa dza sumbe dzo nakaho na dzo nonaho. Farao a vuwa.

5 Naho zwo ralo, a dovha a eḓela, a ḽora lwa vhuvhili. Ho vha hu na ṱhotshe dza sumbe kha tsinde ḽithihi, dzi ndenya, dzi dzavhuḓi.+ 6 Ha dovha ha mela dziṅwe ṱhotshe dza sumbe, dzo sekenaho, dzo rwiwaho nga muya u bvaho vhubvaḓuvha. 7 Ṱhotshe dzo sekenaho dza thoma u mila dza sumbe dzo denyefhalaho dzavhuḓi. Farao a vuwa, a ṱhogomela uri ndi muḽoro.

8 Fhedzi nga matsheloni a thoma u vhilaela. A vhidza vhotshifhe vhoṱhe vha manditi na vha vhuṱali vhoṱhe vha Egipita. Farao a vha ṱalutshedza miḽoro yawe, fhedzi hu si vhe na we a kona u mu ṋea ṱhalutshedzo yawo.

9 Nga zwenezwo, muhulwane wa vhafari vha zwinwelo a amba na Farao a ri: “Ṋamusi ndi ḓibula zwivhi zwanga. 10 Farao o vha o sinyutshela vhashumi vhawe. A valela nṋe na muhulwane wa vhabaki+ dzhele ya muhulwane wa vhalindi. 11 Nga murahu ha zwenezwo, roṱhe ra ḽora nga vhusiku vhuthihi. Miḽoro yashu yo vha i na ṱhalutshedzo dzi sa fani.+ 12 Henefho ro vha ri na muṅwe muṱhannga wa Muhevheru, mushumeli wa muhulwane wa vhalindi.+ Musi ri tshi mu ṱalutshedza yeneyo miḽoro,+ muṅwe na muṅwe washu a mu ṱalutshedza zwine muḽoro wawe wa amba zwone. 13 Zwe a ri ṱalutshedza zwa vha nga yeneyo nḓila. Nṋe nda vhuyedzedzwa vhuimoni hanga, fhedzi uḽa muṅwe a fhahewa.”+

14 Nga zwenezwo, Farao a ri hu vhidzwe Yosefa,+ vha ṱavhanya vha mu bvisa dzhele.*+ A ḓivheula, a ambara zwiṅwe zwiambaro, a ya ha Farao. 15 Farao a amba na Yosefa a ri: “Ndo ḽora, fhedzi a hu na ane a nga ṱalutshedza muḽoro wonoyo. Zwino ndo pfa uri musi iwe u tshi vhudzwa muḽoro u a u ṱalutshedza.”+ 16 Yosefa a fhindula Farao a ri: “Ane a ḓo ṋea Farao ṱhalutshedzo i takadzaho ndi Mudzimu, hu si nṋe.”+

17 Farao a amba na Yosefa a ri: “Ndo ḽora ndo ima philiphilini ya Mulambo wa Nili. 18 Ha bvelela kholomo dza sumbe dzo nakaho na dzo nonaho dzi tshi bva mulamboni, dza thoma u fula hatsi henefho Mulamboni wa Nili.+ 19 Ha dovha ha vha na dziṅwe kholomo dza sumbe dze dza tevhela dziḽa dziṅwe, dzo vha dzo vhifha vhukuma, dzo onda. A thi athu u vhuya nda vhona kholomo dzo vhifhaho nga heyo nḓila shangoni ḽoṱhe ḽa Egipita. 20 Kholomo dzo ondaho, dzo vhifhaho dza thoma u ḽa dza sumbe dzo nonaho dza u thoma. 21 Musi dzo no dzi ḽa, ho vha hu si na muthu we a vha a tshi nga zwi ḓivha uri dzo ita nga u ralo, samusi dzo ḓi dzula dzo onda na u vhifha u fana na u thomani. Nda vuwa.

22 “Nga murahu ha zwenezwo, nda ḽora ṱhotshe dza sumbe kha tsinde ḽithihi, dzi ndenya, dzi dzavhuḓi.+ 23 Ha dovha ha mela dziṅwe ṱhotshe dza goroi dza sumbe dzo omaho, tsekene, dzo rwiwaho nga muya u bvaho vhubvaḓuvha. 24 Ṱhotshe dzo sekenaho dza thoma u mila dza sumbe dzo denyefhalaho dzavhuḓi. Nga⁠uralo, nda vhidza vhotshifhe vha manditi,+ fhedzi hu si vhe na we a kona u nṋea ṱhalutshedzo yawo.”+

25 Yosefa a amba na Farao a ri: “Miḽoro ya Farao i a fana i amba tshithu tshithihi. Mudzimu wa ngoho o vhudza Farao zwine a ḓo zwi ita.+ 26 Kholomo dza sumbe dzavhuḓi ndi miṅwaha ya sumbe. Na ṱhotshe dza sumbe ndi miṅwaha ya sumbe. Yeneyi miḽoro i amba tshithu tshithihi. 27 Kholomo dza sumbe dzo ondaho na dzo vhifhaho dze dza tevhela dziḽa dziṅwe ndi miṅwaha ya sumbe; ṱhotshe dza sumbe dzi si na tshithu, dzo rwiwaho nga muya wa vhubvaḓuvha, ndi miṅwaha ya sumbe ya nḓala. 28 Ndi zwe nda vhudza Farao nda ri: Mudzimu wa ngoho o ita uri Farao a vhone zwine a ḓo zwi ita.

29 “Hu ḓo vha na miṅwaha ya sumbe ya zwiḽiwa zwinzhi shangoni ḽoṱhe ḽa Egipita. 30 Fhedzi nga murahu ha zwenezwo, hu ḓo vha na miṅwaha ya sumbe ya nḓala, zwiḽiwa zwinzhi zwa Egipita zwi ḓo hangwiwa, nḓala i ḓo tshinya shango.+ 31 Zwiḽiwa zwinzhi zwe zwa vha zwi hone shangoni a zwi tsha ḓo humbulwa ngauri nḓala ine ya ḓo tevhela i ḓo vha i khulu vhukuma. 32 Farao o ṋewa wonoyo muḽoro luvhili ngauri eneo mafhungo o khwaṱhisedzwa vhukuma nga Mudzimu wa ngoho, Mudzimu wa ngoho u ḓo ita zwenezwo nga u ṱavhanya.

33 “Farao nga a ṱoḓe munna o ṱalifhaho a mu vhee uri a lange ḽa Egipita. 34 Farao nga a dzhie vhukando a vhee vhalavhelesi kha ḽino shango, a kuvhanganye tshipiḓa tshithihi kha zwiṱanu tsha khaṋo ya Egipita miṅwahani ya sumbe ya zwiḽiwa zwinzhi.+ 35 Vha kuvhanganye zwiḽiwa zwoṱhe miṅwahani ya zwiḽiwa zwinzhi, vha kuvhanganye goroi uri i langwe nga Farao, zwi vhe zwiḽiwa zwine zwa ḓo vhewa miḓini, zwi vhulungwe henefho.+ 36 Zwenezwi zwiḽiwa zwi fanela u fusha shango miṅwaha ya sumbe ya nḓala ine ya ḓo vha hone shangoni ḽa Egipita uri shango ḽi si fe nga nḓala.”+

37 Farao na vhashumeli vhawe vhoṱhe vha takadzwa nga eneo mafhungo. 38 Nga⁠uralo, Farao a amba na vhashumeli vhawe a ri: “Naa hu nga waniwa muṅwe munna a fanaho na onoyu ane muya wa Mudzimu wa vha khae?” 39 Farao a amba na Yosefa a ri: “Samusi Mudzimu o ita uri u ḓivhe zwenezwi zwithu zwoṱhe, a hu na muthu a re na ṱhalukanyo na vhuṱali u fana na iwe. 40 U ḓo langa nnḓu yanga yoṱhe, vhathu vhanga vhoṱhe vha ḓo u thetshelesa kha zwoṱhe.+ Ndi nṋe fhedzi ane a ḓo u fhira samusi ndi khosi.”* 41 Farao a dovha a amba na Yosefa a ri: “Ndi khou u vhea uri u lange shango ḽoṱhe ḽa Egipita.”+ 42 Ndi hone Farao a tshi bvula rinngi yawe ya u swaya tshanḓani tshawe a i ambadza Yosefa, a mu ambadza zwiambaro zwa ḽinene na ngeḓane ya musuku mukuloni wawe. 43 Zwiṅwe hafhu, a mu ṋamedza gariki ya vhuvhili ya u mu ṱhonifha ye a vha e nayo, vhathu vha tshi vhidzelela vha tshi ri, “Avurekhe!”* ha vha hu hone u mu vhea uri a lange shango ḽoṱhe ḽa Egipita.

44 Farao a dovha a amba na Yosefa a ri: “Ndi nṋe Farao, fhedzi a hu na muthu ane a ḓo ita tshithu* naho tshi tshifhio shangoni ḽoṱhe ḽa Egipita a songo tendelwa nga iwe.”+ 45 Nga murahu ha zwenezwo, Farao a ira Yosefa dzina ḽa Zafunathe-panea, a mu ṋea Asinatha+ ṅwananyana wa tshifhe Potifera wa Oni uri a vhe mufumakadzi wawe. Yosefa a thoma u ṱhogomela* shango ḽa Egipita.+ 46 Yosefa o vha e na miṅwaha ya 30+ musi a tshi ima* phanḓa ha Farao khosi ya Egipita.

Yosefa a ṱuwa phanḓa ha Farao a tandula shango ḽoṱhe ḽa Egipita. 47 Tshifhingani tsha miṅwaha ya sumbe ya zwiḽiwa zwinzhi shango ḽa bveledza zwiḽiwa zwinzhi. 48 A kuvhanganya zwiḽiwa zwoṱhe zwe zwa waniwa miṅwahani ya sumbe shangoni ḽa Egipita, a vhea zwiḽiwa miḓini. Muḓini muṅwe na muṅwe o vha a tshi vhea zwiḽiwa zwi bvaho masimuni a henefho. 49 Yosefa a bvela phanḓa a tshi kuvhanganya goroi nnzhi vhukuma, ya ḓala sa muṱavha wa lwanzhe, lwe vha litsha na u i kala, ngauri yo vha i si tsha kalea.

50 Musi ṅwaha wa nḓala u sa athu u swika, Asinatha ṅwananyana wa tshifhe Potifera wa Oni o bebela Yosefa vharwa vhavhili.+ 51 Yosefa a ira murwa wawe wa tanzhe dzina ḽa Manase,*+ ngauri o ri: “Mudzimu o ita uri ndi hangwe u tambula hanga na vhoṱhe vha muṱani wa khotsi anga.” 52 Wa vhuvhili a mu ira dzina ḽa Efuraimi,*+ ngauri o ri: “Mudzimu o ita uri ndi vhe na vhana vhanzhi shangoni ḽe nda tambula khaḽo.”+

53 Miṅwaha ya sumbe ya zwiḽiwa zwinzhi shangoni ḽa Egipita ya vhuya ya fhela,+ 54 ha thoma miṅwaha ya sumbe ya nḓala, samusi Yosefa o vha o amba.+ Ha vha na nḓala mashangoni oṱhe, fhedzi kha ḽoṱhe ḽa Egipita ho vha hu na zwiḽiwa.*+ 55 Mafheleloni ha vha na nḓala shangoni ḽoṱhe ḽa Egipita, vhathu vha thoma u lilela Farao uri a vha ṋee zwiḽiwa.+ Farao a amba na Vhaegipita vhoṱhe a ri: “Iyani ha Yosefa, ni ite zwoṱhe zwine a ni vhudza zwone.”+ 56 Nḓala ya ṱanganya ḽifhasi ḽoṱhe.+ Yosefa a thoma u vula maḓulu oṱhe e a vha e hone, a thoma u rengisela Vhaegipita,+ samusi nḓala yo vha i khulu shangoni ḽa Egipita. 57 Zwiṅwe hafhu, vhathu vha ḽifhasi ḽoṱhe vha ya Egipita u renga zwiḽiwa kha Yosefa, ngauri nḓala yo vha i khulu ḽifhasini ḽoṱhe.+