Mishumo Ya Vhaapostola
25 Musi Festo+ o no swika vunduni a tshi vho vhusa, a fhedza maḓuvha mararu e Kesarea, nga murahu a ya Yerusalema. 2 Vhahulwane vha vhotshifhe na vharangaphanḓa vha Vhayuda vha mu vhudza mulandu une vha khou pomoka Paulo.+ Vha luvhelela Festo 3 uri a pfe zwine vha humbela, a rumele Paulo Yerusalema. Fhedzi vho vha vho mu lalela nḓilani, vha tshi ṱoḓa u mu vhulaya.+ 4 Festo a ri Paulo u fanela u litshwa dzhele ngei Kesarea, na uri ene u ḓo humela henengei hu si kale. 5 A ri: “Ambani na vharangaphanḓa vhaṋu uri vha ṱuwe na nṋe henengei uri vha kone u mu pomoka arali hu na zwe a khakha.”+
6 Musi o no fhedza maḓuvha a sa fhiri malo kana a fumi e navho, a kona u ya Kesarea, nga ḓuvha ḽi tevhelaho a dzula hune ha sengiselwa hone, a amba uri Paulo a ḓiswe. 7 Musi a tshi swika, Vhayuda vha bvaho Yerusalema vha mu tanga, vha mu pomoka milandu mihulu minzhi ye vha vha vha si na vhuṱanzi nayo.+
8 Fhedzi Paulo a ḓiimelela a ri: “A tho ngo pfuka Mulayo wa Vhayuda, wa thembele kana wa Kesare.”+ 9 Nge Festo a vha a tshi ṱoḓa u takadza Vhayuda,+ a vhudzisa Paulo a ri: “Naa u a ṱoḓa u ya Yerusalema uri u sengiselwe hone zwenezwi zwithu na nṋe ndi hone?” 10 Paulo a ri: “Ndo ima fhethu hune Kesare a sengisela hone, hune nda tea u sengiswa hone. A tho ngo khakhela Vhayuda, samusi na iwe u tshi zwi ḓivha. 11 Arali ndo pfuka mulayo, ndo ita tshithu tshine tsha ita uri ndi vhulawe,+ ndi tea u vhulawa; fhedzi arali zwine vha khou mpomoka zwone hu mazwifhi, a hu na ane a nga nkumedzela khavho u itela u vha takadza. Nṋe ndi ri hoyu mulandu kha u fhiriselwe kha Kesare!”+ 12 Musi Festo o no amba na tshigwada tsha vhaeletshedzi vhawe, a ri: “Samusi wo ri u khou ṱoḓa u sengiswa nga Kesare, u ḓo sengiswa ngae.”
13 Ho no fhela maḓuvha, Khosi Agripa na Berenike vha ya Kesarea u dalela Festo. 14 Musi o no fhedza maḓuvha manzhi e henefho, Festo a vhudza khosi mulandu wa Paulo a ri:
“Hu na munna o farwaho we a siiwa dzhele nga Felikisi, 15 musi ndi ngei Yerusalema vhahulwane vha vhotshifhe na vhahulwane vha Vhayuda vho mu pomoka,+ vha humbela uri a haṱulwe. 16 Fhedzi nda ri, nga Tshiroma muthu ha kumedzelwi kha vhane vha khou mu pomoka u itela u vha takadza a songo thoma a ḓiimelela kha vhane vha mu pomoka.+ 17 Musi vha tshi swika henefha, a tho ngo tsha fhedza tshifhinga, fhedzi nga ḓuvha ḽi tevhelaho nda dzula hune nda sengisela hone nda amba uri a ḓiswe. 18 Musi ndo thetshelesa zwe vha vha vha tshi khou mu pomoka zwone, nda ṱhogomela uri a hu na tshe a tshinya.+ 19 Vho vha vha tshi khou hanedzana nae nga ha mudzimu ane vha mu rabela*+ na nga ha muṅwe munna ane a pfi Yesu o faho, ane Paulo a amba uri u khou tshila.+ 20 Samusi ndo vha ndi sa ḓivhi uri ndi nga dzudzanya hani yeneyo khani, nda mu vhudzisa arali o vha a tshi nga takalela u ya Yerusalema uri mafhungo awe a sengiwe henengei.+ 21 Fhedzi musi Paulo a tshi humbela uri a dzule henefho dzhele u swikela Augusto* a tshi ita phetho,+ nda amba uri a dzule henefho u swikela ndi tshi mu isa kha Kesare.”
22 Agripa a amba na Festo a ri: “Na nṋe hoyu muthu ndi nga takalela u mu thetshelesa.”+ Festo a ri: “U ḓo mu thetshelesa matshelo.” 23 Nga tsha matshelo, Agripa na Berenike vha dzhena holoni vha tshi khou ḓikukumusa vhe na vhalangammbi na vhanna vha vhuimo ha nṱha vha henefho muḓini; Festo a amba uri Paulo a ḓiswe. 24 Festo a ri: “Khosi Agripa na inwi noṱhe ni re fhano, hoyu munna ndi ene we gogo ḽa Vhayuda ḽa ḓa kha nṋe ngei Yerusalema na fhano, ḽi tshi khou ṱavha mukosi ḽi tshi ri u tea u vhulawa.+ 25 Fhedzi ndo ṱhogomela uri ho ngo ita mulandu une wa nga ita uri a vhulawe.+ Musi a tshi humbela uri mulandu wawe u fhiriselwe kha Muvhusi, nda amba uri a iswe henengei. 26 Fhedzi a thi na tshine nda nga ṅwalela Murena* wanga nga hae. Ndi ngazwo ndo mu ḓisa phanḓa haṋu noṱhe na kha iwe Khosi Agripa, uri musi wo no mu sengisa, khamusi ndi nga wana zwine nda nga zwi ṅwala. 27 Ngauri ndi vhona zwi sa pfali u isa mufariwa ndi songo amba milandu ine a khou pomokwa yone.”