Kha Vharoma

9 Ndi tevhela Kristo. Luvalo lwanga lu livhiswa nga muya mukhethwa, ndi khou amba ngoho. A thi khou zwifha musi ndi tshi ri: 2 ndo ṱungufhala zwihulu, mbilu yanga i dzula i tshi vhavha. 3 Arali zwi tshi konadzea, ndi tama u vha kule na Kristo sa o semiwaho nṱhani ha vhahashu, vhane vha vha mashaka anga. 4 Ndi Vhaisiraele vhe Mudzimu a vha ṱanganedza sa vhana vhawe.+ Mudzimu o vha hulisa, a vhofha mulanga+ navho na u vha ṋea Mulayo.+ Vha na ndugelo ya u mu rabela,+ o vha ṋea zwe a vha fhulufhedzisa.+ 5 Ndi vhaḓuhulu vha vhomakhulukuku washu,+ Kristo ndi ṅwana wavho.+ Nga hu rendwe Mudzimu ane a vhusa zwithu zwoṱhe, lini na lini. Amen.

6 Fhedzi zwenezwi a zwi ambi uri zwe Mudzimu a amba a zwo ngo itea. Ngauri a si vhoṱhe vho bebwaho Isiraele vhane vha vha “Vhaisiraele” vha vhukuma.+ 7 A si uri vha re vhana* vha Abrahamu ndi vhana vhawe vhoṱhe,+ ngauri ho ṅwaliwa u pfi: “Vhana* vhau vha ḓo bva kha Isaka.”+ 8 Zwenezwi zwi amba uri a si vhoṱhe vhana vha Abrahamu vha re vhana vha Mudzimu,+ fhedzi vhana vhe vha bebwa nga zwe Mudzimu a zwi fhulufhedzisa+ ndi vhone vhana* vha Abrahamu. 9 Zwe zwa fhulufhedziswa ndi hezwi: “Ndi ḓo ḓa nga tshenetshi tshifhinga, Sara u ḓo vha na ṅwana wa mutukana.”+ 10 Zwo itea na musi Rebeka a tshi bebela makhulukuku washu Isaka mafhaṱa.*+ 11 Musi vhenevho vhana vha sa athu u bebwa na u ita zwivhuya kana zwivhi, Mudzimu o vha o no amba uri u ḓo nanga nnyi. Ngauri u nanga ane a funa, hu si nga zwine muthu a ita. 12 Ndi ngazwo Rebeka o vhudzwa u pfi: “Mukomana u ḓo shumela murathu.”+ 13 Samusi ho ṅwaliwa ha pfi: “Ndo funa Yakobo, fhedzi nda vhenga Esau.”+

14 Zwino ri ḓo ri mini? Naa Mudzimu u haṱula nga nḓila i songo teaho? Na khathihi!+ 15 O amba na Mushe a ri: “Ndi ḓo khathutshela ane nda ṱoḓa u mu khathutshela, nda pfela vhuṱungu ane nda ṱoḓa u mu pfela vhuṱungu.”+ 16 Nga zwenezwo, a zwi ḓitiki nga ane a zwi tama kana ane a khou ita vhuḓidini, fhedzi zwi ḓitika nga Mudzimu, ane a khathutshela.+ 17 Ngauri luṅwalo lwo amba na Farao lwa ri: “Ndo u litsha uri u tshile, uri ndi sumbedze maanḓa anga nga iwe na uri dzina ḽanga ḽi ḓivhadzwe ḽifhasini ḽoṱhe.”+ 18 Ngauralo, Mudzimu u khathutshela ane a funa, fhedzi a tendela vhaṅwe vha tshi rindidza mbilu dzavho.+

19 Zwino iwe u ḓo ri: “Samusi hu si na ane a nga hanedza phetho ya Mudzimu, ndi ngani a tshi vhona vhathu vhukhakhi?” 20 Fhedzi iwe u nnyi, ane wa hanedza Mudzimu?+ Naa tshithu tsho vhumbwaho tshi nga vhudza o tshi vhumbaho tsha ri: “Ndi ngani wo mmbumba nga yeneyi nḓila?”+ 21 Naa muvhumbi ha koni u vhumba midzio mivhili nga vumba ḽithihi?+ Ḽiṅwe a vhumba ngaḽo mudzio wavhuḓi, ḽiṅwe a vhumba ngaḽo mudzio u si wavhuḓi. 22 Naho Mudzimu o vha a tshi ṱoḓa u sumbedza mbiti dzawe kha vhathu vhavhi na uri maanḓa awe a ḓivhiwe, o konḓelela vhathu vho fanelwaho nga mbiti dzawe, vhane vha nga midzio yo fanelwaho nga u fheliswa. 23 O ita zwenezwi uri a ḓivhadze vhugala hawe kha vhathu vho fanelwaho nga u khathutshelwa,+ vha ngaho midzio ye a dzula o i lugiselela vhugala, 24 vhenevho ndi riṋe vhe a ri vhidza, u bva kha Vhayuda na vha dziṅwe tshaka.+ 25 Zwi fana na zwe a zwi vhudza Hosea, a tshi ri: “Vhane vha si vhe vhathu vhanga+ ndi ḓo vha vhidza ‘vhathu vhanga,’ we a vha a sa funwi ndi ḓo mu vhidza ‘mufunwa’;+ 26 na fhethu he vha vhudzwa u pfi, ‘A ni vhathu vhanga,’ henefho vha ḓo vhidzwa ‘vhana vha Mudzimu a tshilaho.’”+

27 Zwiṅwe hafhu, Yesaya o vhidzelela a ri: “Naho tshivhalo tsha Vhaisiraele tshi tshi nga ḓala tsha nga muṱavha wa lwanzhe, hu ḓo tshidzwa vhathu vhaṱuku.+ 28 Ngauri Yehova* u ḓo haṱula vha re kha ḽifhasi nga u ṱavhanya.”+ 29 Samusi Yesaya o amba a tshi ri: “Arali Yehova* wa mavhuthu a songo ri siela vhana,* ro vha ri tshi ḓo fana na Sodoma na Gomora.”+

30 Zwino ri ḓo ri mini? Vhathu vha dzitshaka, naho vha sa ṱoḓi u luga, vho wana u luga,+ u luga hune ha bveledzwa nga lutendo;+ 31 naho Vhaisiraele vho lingedza u vha vho lugaho samusi zwo ṅwaliwa kha mulayo, a vho ngo tevhedza mulayo woṱhe. 32 Ndi ngani? Ngauri vho lwela u vha vho lugaho nga mishumo, nṱhani ha u vha na lutendo. Vho khukhulwa nga “tombo ḽi khukhulaho”;+ 33 samusi ho ṅwaliwa ha pfi: “Ndi vhea tombo ḽi khukhulaho Tsioni+ ḽine ḽa ḓo vha khukhula, fhedzi ane a ḽi tenda ha nga shoni.”+