Hesekiele
27 Yehova a dovha a amba na nṋe a ri: 2 “Iwe murwa muthu, imbela Tiro luimbo lwa tshililo,*+ 3 u vhudze Tiro u ri,
‘Iwe ane a dzula khoroni dza lwanzhe,
Ane a rengisa thundu dza vhathu vha zwiṱangadzime zwinzhi,
Yehova Murena Muvhusahoṱhe u ri:
“Iwe Tiro, wo amba nga ha iwe muṋe wa ri, ‘Ndo naka vhukuma.’+
4 Mashango au o tangiwa nga lwanzhe,
Na vhafhaṱi vhau vho u nakisa vhukuma.
5 Mabulannga au ndi a muri wa mudzhunipa wa ngei Siniri,+
Thanda dzau dza u atha maseila ndi dza muri wa muṱaululo wa ngei Libanoni.
6 Thanda dzau dza u tshimbidza tshikepe dzo itwa nga muri wa muouku wa ngei Bashani,
Phanḓa hatsho tsho itwa nga mabulannga a muri wa muṱongola, nga ngomu hatsho tsha adzelwa maṋanga a nḓou a bvaho tshiṱangadzimeni tsha Khithimi.+
7 Maseila au o itwa nga malabi a mivhala-vhala a bvaho Egipita,
Ṱhanga yau yo itwa nga malabi o rungiwaho nga harane ya muvhala wa lutombo na wuḽu ya phephulu i bvaho zwiṱangadzimeni zwa ngei Elisa.+
8 Vhadzulapo vha Sidoni na vha Aravadi+ vho vha vhe vhatshimbidzi vha tshikepe tshau.
Iwe Tiro, vhashumi vha tshikepeni+ tshau vho vha vhe vhanna vhau vha re na vhutsila.
9 Vhanna vha re na vhutsila na tshenzhelo* vha Gibali+ vho thivha mabuli au.+
Zwikepe zwoṱhe zwa lwanzheni na vhashumi vhazwo vho ḓa kha iwe u itela u rengisa thundu.
10 Vhanna vha Peresia, Ludi na Phuti+ vho vha vhe kha mmbi yau, vho vha vhe vhanna vhau vha nndwa.
Vho fhahea zwiṱangu zwavho na magondolo avho kha iwe, vho u ḓisela vhugala.
11 Vhanna vha Aravadi vha re kha mmbi yau vho ima u mona na mbondo dzau
Kha mitsheṱo yau ho vha hu tshi ima vhanna vha re na tshivhindi.
Vho fhahea zwiṱangu zwavho u mona na mbondo dzau
Vha u nakisa vhukuma.
12 “‘“Vha Tharasisi+ vho rengiselana na iwe nga nṱhani ha uri wo pfuma.+ Vho u ṋea siḽiva, tsimbi, thini na mutobvu uri vha kone u wana thundu dzau.+ 13 Yavani, Thubali+ na Meseke+ vho rengiselana na iwe, vha u ṋea dziphuli+ na madzanga a koporo uri vha kone u wana thundu dzau. 14 Vha nnḓu ya Thogarama+ vho u ṋea bere na meila uri vha kone u wana thundu dzau. 15 Vhathu vha Dedani+ vho rengiselana na iwe; iwe wa thola vharengisi kha zwiṱangadzime zwinzhi; vha u luvha nga u u ṋea maṋanga a nḓou+ na matanda matswu. 16 Edomo o rengiselana na iwe ngauri wo vha u na zwibveledzwa zwinzhi. Vho u ṋea matombo a thekhoisi, wuḽu ya phephulu, malabi o khavhiswaho nga mivhala-vhala, malabi avhuḓi, khoraḽa na matombo a rubi uri vha kone u wana thundu dzau.
17 “‘“Yuda na shango ḽa Isiraele vho rengiselana na iwe, vho u ṋea goroi i bvaho ngei Minithi,+ zwiḽiwa zwavhuḓi, mutoli,+ mapfura na baḽisamu+ uri vha kone u wana thundu dzau.+
18 “‘“Damaseko+ o rengiselana na iwe ngauri wo vha u na zwibveledzwa zwinzhi na lupfumo lwau lunzhi, o u ḓisela waini ya Heliboni na wuḽu ya Tsahara. 19 Vedani na Yavani vha ngei Usala vho u ṋea tsimbi, muri wa mukasia na luṱanga uri vha kone u wana thundu dzau. 20 Dedani+ o u rengisela malabi* a u kapea kha bere. 21 Wo thola Vhaarabu na vharangaphanḓa vhoṱhe vha Kedara+ vhane vha vha vharengisi vha nngu, thutha na mbudzi.+ 22 Wo vha u tshi rengiselana na vharengisi vha ngei Sheba na Raama;+ vho u ṋea mifuda yoṱhe ya zwiḓolo zwi nukhelelaho, matombo a mutengo muhulu na musuku uri vha kone u wana thundu dzau.+ 23 Wo rengiselana na vharengisi vha ngei Harani,+ Kane, Edeni,+ Sheba,+ Ashuri+ na Kilimada. 24 Maketeni wau vho vha vha tshi rengisa zwiambaro zwavhuḓi, zwiambaro zwa nga nnḓa zwo itwaho nga malabi a lutombo na malabi o khavhiswaho nga mivhala-vhala na khaphethe dza mivhala-vhala, zwoṱhe zwo vhofhelelwa nga dzithambo.
25 Thundu dzau dzo vha dzi tshi hwalwa nga zwikepe zwa Tharasisi,+
Zwenezwo zwa ita uri u pfume na u vha muhulu* ngei vhukati ha lwanzhe.
26 Vhatshimbidzi vhau vha tshikepe vho u isa vhukati ha lwanzhe;
Wo kwashekanywa u vhukati ha lwanzhe nga muya wa vhubvaḓuvha.
27 Lupfumo lwau, thundu dzau, vhashumi vhau vha tshikepeni,
Vhane vha thivha mabuli, vharengisi vha thundu+ dzau na vhanna vhau vha nndwa+
Tshigwada* tsha vhathu vhau vhoṱhe
Zwoṱhe zwi ḓo ṋupela vhukati ha lwanzhe nga ḓuvha ḽine wa ḓo wa ngaḽo.+
28 Musi vhashumi vha tshikepeni vha tshi huwelela, na mashango a re tsini na lwanzhe a ḓo dzinginyea.
29 Vhatshimbidzi vha tshikepe vhoṱhe na vhashumi vha tshikepeni
Vha ḓo tsa zwikepeni zwavho vha ima ho omaho.
30 Vha ḓo u huwelela na u u lilela lu ṱungufhadzaho+
Vha tshi khou ḓishela nga mavu kha ṱhoho na u vhumbuluwa miḽorani.
31 Vha ḓo ḓivheula mavhudzi vha ambara madzanganda;
Vha ḓo u lilela lu ṱungufhadzaho.
32 Vha ḓo u imbela dza tshililo vho ṱungufhala, vha ri:
‘Ndi nnyi ane a nga Tiro, o fhumulaho ngei vhukati ha lwanzhe?+
33 Musi thundu dzau dzi tshi ḓa dzi tshi bva vhukati ha lwanzhe, wo vha u tshi fusha vhathu vhanzhi.+
Lupfumo lwau lunzhi na thundu dzau zwo pfumisa mahosi a ḽifhasi.+
34 Zwino wo kwashekanywa ngei mativhani a lwanzhe,+
Vharengisi vhau vhoṱhe na vhathu vhau vho ṋupela na iwe.+
35 Vhadzulapo vhoṱhe vha zwiṱangadzimeni vha ḓo u lavhelesa vha mangala,+
Mahosi avho a ḓo tetemela nga nyofho,+ o tshenuwa.
36 Vharengisi vha dzitshaka vha ḓo u lidzela muludzi kha zwe zwa itea.
U ḓo fheliswa nga u ṱavhanya nga nḓila i vhavhaho,
U si tsha vha hone lini na lini.’”’”+