Evangeli Ya Mateo

27 Nga matsheloni, vhahulwane vhoṱhe vha vhotshifhe na vhahulwane vha vhathu vha langana uri vha vhulaye Yesu.+ 2 Musi vho no mu vhofha, vha mu isa kha muvhusi Pilato.+

3 Musi Yudasi we a mu fheṱa a tshi vhona uri Yesu o haṱulelwa lufu, a ḓisola a humisela shekele dza 30 dza siḽiva kha vhahulwane vha vhotshifhe na kha vhahulwane,+ 4 a ri: “Ndo tshinya nge nda fheṱa muthu a si na mulandu.” Vhone vha ri: “A ri zwi dzheni. Iwe muṋe u ḓo vhona uri u ḓo zwi bva hani!”* 5 A laṱa iḽa tshelede thembeleni, a ṱuwa a ya a ḓihunga.+ 6 Vhahulwane vha vhotshifhe vha dzhia yeneyo tshelede, vha ri: “Mulayo a u ri tendeli ri tshi i dzhenisa mbulungeloni khethwa, ngauri ndi tshelede i re na malofha.” 7 Musi vho no langana, vha renga ngayo tsimu* uri vha vhulunge vhatsinda khayo. 8 Yeneyo tsimu i kha ḓi vhidzwa Tsimu ya Malofha+ na ṋamusi. 9 Ngauralo, ha itea zwe zwa ambiwa nga muporofita Yeremia, musi a tshi ri: “Vho dzhia shekele dza 30 dza siḽiva, mutengo we wa vha wo vhewa uri u renge onoyo munna, mutengo we vhaṅwe vharwa vha Isiraele vha langana u mu renga ngawo, 10 vha renga tsimu* nga dzenedzo shekele u tendelana na zwe Yehova* a nndaedza zwone.”+

11 Yesu a ima phanḓa ha muvhusi, onoyo muvhusi a mu vhudzisa a ri: “Naa u Khosi ya Vhayuda?” Yesu a ri: “Ndi iwe ane a khou zwi amba.”+ 12 Musi a tshi khou pomokwa nga vhahulwane vha vhotshifhe na vhahulwane, a si fhindule tshithu.+ 13 Pilato a ri: “Naa a u pfi zwithu zwinzhi zwine vha u pomoka zwone?” 14 Yesu a si mu fhindule, na muvhusi a vhuya a mangala zwihulu.

15 Nga vhuṱambo vhuṅwe na vhuṅwe, zwo vha zwo ḓowelea uri muvhusi a bvise dzhele muthu ane vhathu vha mu funa.+ 16 Nga tshenetsho tshifhinga ho vha ho farwa muṅwe munna ane a pfi Baraba we a vha a tshi ḓivhelwa zwithu zwivhi. 17 Musi vho kuvhangana, Pilato a ri: “Ni ṱoḓa ndi tshi vhofholola nnyi kha Baraba na Yesu ane ha pfi ndi Kristo?” 18 Pilato o vha a tshi zwi ḓivha uri vho kumedza Yesu vha tshi khou itiswa nga vivho. 19 Musi Pilato o dzula hune ha sengiselwa hone, mufumakadzi wawe a rumela muthu uri a amba nae, a ri: “U songo ita tshithu onoyu munna a si na mulandu, ngauri ndo ḽora nga hae, wonoyo muḽoro wa ita uri ndi tshuwe zwihulu.” 20 Fhedzi vhahulwane vha vhotshifhe na vhahulwane vha ṱuṱuwedza vhathu uri vha humbele Baraba uri a vhofhololwe,+ Yesu a vhulawe.+ 21 Muvhusi a dovha a vha vhudzisa a ri: “Ni ṱoḓa ndi tshi vhofholola nnyi kha avha vhavhili?” Vha ri: “Baraba.” 22 Pilato a ri: “Ndi ite mini nga Yesu ane ha pfi ndi Kristo?” Vhoṱhe vha ri: “Kha ombelwe kha danda!”*+ 23 Pilato a ri: “Ndi ngani? O tshinya mini?” Vha tou ṋaṋa u ṱavha mukosi vha ri: “Kha ombelwe kha danda!”+

24 Musi Pilato a tshi vhona uri zwine a khou ita a zwi thusi tshithu, zwi khou tou vusa bonyongo, a dzhia maḓi a ṱamba zwanḓa vhathu vha tshi zwi vhona, a ri: “A thi na mulandu wa malofha a uyu munna. Ndi vhuḓifhinduleli haṋu.” 25 Musi vhathu vhoṱhe vha tshi pfa zwenezwo, vha fhindula vha ri: “Malofha awe nga a vhilwe kha riṋe na kha vhana vhashu.”+ 26 A vhofholola Baraba, a ita uri Yesu a rwiwe nga tshimebi,+ a mu kumedzela uri a ombelwe kha danda.+

27 Maswole a muvhusi a dzhia Yesu a mu isa nḓuni ya muvhusi, tshigwada tshoṱhe tsha maswole tsha mu tanga.+ 28 A mu bvula zwiambaro, a mu ambadza tshiambaro tshitswuku,+ 29 a luka khare ya mipfa a mu ambadza kha ṱhoho, a mu farisa luṱanga kha tshanḓa tsha u ḽa. A gwadama phanḓa hawe a mu goḓa a ri: “Ri a vusa, iwe Khosi ya Vhayuda!” 30 A mu pfela mare,+ a mu dzhiela luṱanga, a mu rwa ngalwo kha ṱhoho. 31 Musi o no fhedza u mu goḓa, a mu bvula tshiḽa tshiambaro, a mu ambadza zwiambaro zwawe, a ṱuwa nae uri a ye a mu ombele kha danda.+

32 Musi a tshi tou bva a wana munna ane a pfi Simoni wa Kirene. A mu kombetshedza uri a hwale danda* ḽine Yesu a ḓo ombelwa khaḽo.+ 33 Musi eneo maswole a tshi swika fhethu hune ha pfi Golgotha, zwine zwa amba uri Dethele,+ 34 a mu ṋea waini yo ṱanganyiswaho na zwithu zwi vhavhaho uri a nwe,+ musi o no i thetshela a hana u i nwa. 35 O no mu ombela kha danda, a kovhekana zwiambaro zwawe nga u ita madeṅwa,+ 36 a dzula henefho a mu linda. 37 A vhea na luṅwalo nga nṱha ha ṱhoho yawe lu re na mulandu we a vha a tshi khou pomokwa wone, une wa ri: “Hoyu ndi Yesu Khosi ya Vhayuda.”+

38 O vha o ombelwa vhukati ha mavemu mavhili, ḽiṅwe ḽi nga thungo ya tshanḓa tsha u ḽa ḽiṅwe kha tsha monde.+ 39 Vha fhiraho vha mu sema,+ vha dzungudza ṱhoho,+ 40 vha ri: “Iwe we wa ri u ḓo thutha thembele wa i fhaṱa nga maḓuvha mararu,+ ḓitshidze! Arali u murwa wa Mudzimu, itsa kha danda!”*+ 41 Vhahulwane vha vhotshifhe, vhamaṅwalo na vhahulwane na vhone vha mu goḓa vha ri:+ 42 “O tshidza vhaṅwe, fhedzi ha koni u ḓitshidza! Arali e Khosi ya Vhaisiraele;+ nga a tse kha danda,* ndi hone ri tshi ḓo mu tenda. 43 O vha a tshi fhulufhela Mudzimu; zwino nga a mu tshidze arali A tshi mu funa,+ ngauri o ri, ‘Ndi Murwa wa Mudzimu.’”+ 44 Na aḽa mavemu e a vha o ombelwa tsini nae o vha a tshi khou mu sema.+

45 U bva nga awara ya vhurathi,* ha vha na swiswi ḽihulu kha ḽeneḽo shango, u swika nga awara ya vhuṱahe.*+ 46 Hu ṱoḓaho u vha nga awara ya vhuṱahe, Yesu a vhidzelela nga ipfi ḽihulu a ri: “Eli, Eli, lama sabaxtani?” zwine zwa amba uri, “Mudzimu wanga, Mudzimu wanga, ndi ngani wo nṱutshela?”+ 47 Vhaṅwe vho imaho henefho, vha tshi pfa zwenezwo vha ri: “Hoyu munna u khou vhidzelela Elia.”+ 48 Nga u ṱavhanya muṅwe wavho a gidima a dzhia tshipontshi a tshi mbwandamedza kha waini i dungaho, a tshi ṱoma kha luṱanga a tshi ṋea Yesu uri a nwe.+ 49 Fhedzi vhaṅwe vha ri: “Mu litshe! Kha ri vhone arali Elia a tshi ḓo ḓa a mu tshidza.” 50 Yesu a dovha a vhidzelela, a kona u fa.+

51 Khetheni ḽe ḽa vha ḽi nḓuni khethwa+ ḽa kheruwa nga vhukati,+ u bva nṱha u ya fhasi,+ ḽifhasi ḽa dzinginyea, matombo a fhanduwa. 52 Mavhiḓa a vulea, zwitumbu zwinzhi zwa vhakhethwa zwa bvela nnḓa, 53 zwa vhonwa nga vhathu vhanzhi, (vhathu vha bvaho mavhiḓani musi Yesu o no vuswa, vha dzhena muḓini mukhethwa). 54 Musi muhulwane wa maswole na vhe a vha e navho vha tshi khou linda Yesu, vha tshi pfa mudzinginyo na u vhona zwithu zwe zwa itea, vha ofha zwihulu vha ri: “Ngangoho o vha e Murwa wa Mudzimu.”+

55 Ho vha hu na vhafumakadzi vhanzhi henefho vho lavhelesaho vhe kulenyana. Vho tevhela Yesu a tshi bva Galilea uri vha mu thuse.+ 56 Vhaṅwe vhavho hu Maria Magdalena, Maria mme a Yakobo na Yose, na mme a vharwa vha Sebedeo.+

57 Musi ḽi tshi vho kovhela, ha ḓa muṅwe munna wa mupfumi a bvaho Arimathia, ane a pfi Yosefa, we a vha e mufunziwa wa Yesu.+ 58 Onoyu munna a ya kha Pilato a humbela tshitumbu tsha Yesu.+ Pilato a amba uri a ṋewe tshone.+ 59 Yosefa a dzhia tshenetsho tshitumbu a tshi putela nga labi ḽavhuḓi ḽa ḽinene,+ 60 a tshi vhulunga vhiḓani ḽawe ḽe ḽa koriwa kha tombo,+ ḽe ha vha hu sa athu u vhulungelwa muthu khaḽo. Musi o no vala muṋango wa vhiḓa nga tombo ḽihulu, a ṱuwa. 61 Fhedzi Maria Magdalena na muṅwe Maria vha sala vho dzula henefho tsini na vhiḓa.+

62 Zwenezwo zwithu zwo itea nga ḓuvha ḽa musi hu tshi khou lugiselelwa Savhatha.+ Nga ḓuvha ḽi tevhelaho, vhahulwane vha vhotshifhe na Vhafarisei vha kuvhangana ha Pilato, 63 vha ri: “Muṋe washu, ri kha ḓi humbula zwe uḽa mufhuri a zwi amba a tshi kha ḓi tshila musi a tshi ri: ‘Ndi ḓo vuswa nga murahu ha maḓuvha mararu.’+ 64 Ngauralo, ruma vhathu uri vha ye u linda vhiḓa u swika nga ḓuvha ḽa vhuraru, uri vhafunziwa vhawe vha si ye vha mu tswa,+ vha vhudza vhathu vha ri, ‘O vuswa vhafuni!’ Vhufhura honovhu ha vho fhira ha u thoma.” 65 Pilato a amba navho a ri: “Ṱuwani na vhalindi ni ye u linda vhiḓa nga hune na nga kona ngaho.” 66 Ngauralo, vha ya vha shatela ḽeneḽo vhiḓa, vha sia na vhalindi henefho.