Nehemia
8 Vhathu vhoṱhe vha kuvhangana nga vhuthihi khoroni ya phanḓa ha Khoro ya Maḓi,+ vha vhudza Esera+ ane a vha mukopololi* uri a ḓise bugu ya Mulayo wa Mushe,+ we Yehova a laya Vhaisiraele uri vha u tevhele.+ 2 Nga ḓuvha ḽa u thoma ḽa ṅwedzi wa vhusumbe,+ tshifhe Esera a ḓisa Mulayo phanḓa ha tshivhidzo+ tsha vhanna, vhafumakadzi na vhoṱhe vhane vha kona u thetshelesa na u pfesesa. 3 Henefho khoroni ya muḓi phanḓa ha Khoro ya Maḓi, a vhalela+ vhanna, vhafumakadzi na vhoṱhe vhane vha kona u pfesesa bugu ya Mulayo; vhathu vha thetshelesa nga vhuronwane.+ 4 Esera ane a vha mukopololi* o vha o ima kha pulatifomo ya mabulannga yo itelwaho tshenetsho tshiitea; vho imaho tsini nae nga thungo ya tshanḓa tshawe tsha u ḽa vho vha vhe Mathithia, Shema, Anaia, Uria, Hilikia na Maaseya; vho imaho nga thungo ya tshanḓa tshawe tsha monde vho vha vhe Pedaya, Misaele, Malakia,+ Hasumu, Hasibadana, Sakaria na Meshulamu.
5 Esera a vula bugu phanḓa ha vhathu vhoṱhe vha tshi zwi vhona, ngauri o vha o ima fhethu hu re nṱha ha vhathu vhoṱhe. Musi a tshi i vula vhathu vhoṱhe vha takuwa. 6 Esera a khoḓa Yehova Mudzimu muhulu wa ngoho, vhathu vhoṱhe vha bvumela vho imisela zwanḓa zwavho nṱha vha ri: “Amen!* Amen!”+ Vha khotha vha luvha Yehova vho kwatamisa zwifhaṱuwo. 7 Yeshua, Bani, Sherebia,+ Yamini, Akubu, Shabathai, Hodiya, Maaseya, Kelita, Asaria, Yosabada,+ Hanani na Pelaya, vha Vhalevi, vhe vha ṱalutshedza vhathu Mulayo,+ musi vhathu vho ima henefho. 8 Vha bvela phanḓa vha tshi vhalela nṱha bugu yeneyo ya Mulayo wa Mudzimu wa ngoho, vha u ṱalutshedza zwavhuḓi, vha ita uri u pfale; vha thusa vhathu uri vha pfesese zwe zwa vha zwi tshi khou vhaliwa.+
9 Nehemia we a vha e muvhusi* nga tshenetsho tshifhinga, tshifhe Esera+ ane a vha mukopololi* na Vhalevi vhe vha vha vha tshi khou funza vhathu vha amba na vhathu vhoṱhe vha ri: “Ṋamusi ndi ḓuvha ḽikhethwa kha Yehova Mudzimu waṋu.+ Ni songo ṱungufhala kana u lila.” Ngauri vhathu vhoṱhe vho lila musi vha tshi pfa zwine Mulayo wa amba. 10 A amba navho a ri: “Tshimbilani ni ye ni ḽe zwiḽiwa zwavhuḓi,* ni nwe zwa u ḓifha, ni kovhele vha si na tshithu zwiḽiwa;+ ngauri ṋamusi ndi ḓuvha ḽikhethwa kha Murena washu, ni songo ṱungufhala, ngauri dakalo ḽine Yehova a ḽi ṋea ndi vhushavhelo* haṋu.” 11 Vhalevi vho vha vha tshi khou fhumudza vhathu vhoṱhe vha tshi ri: “Fhumulani! Ngauri ṋamusi ndi ḓuvha ḽikhethwa, ni songo ṱungufhala.” 12 Vhathu vhoṱhe vha ṱuwa vha ya vha ḽa na u nwa na u kovha zwiḽiwa vho takala nga maanḓa,+ ngauri vho vha vho pfesesa mafhungo e vha vhalelwa one.+
13 Nga ḓuvha ḽa vhuvhili, vharangaphanḓa vha miṱa ya vhokhotsi vha vhathu vhoṱhe, vhotshifhe na Vhalevi vha kuvhangana u mona na Esera ane a vha mukopololi* uri vha pfesese khwine zwine Mulayo wa amba zwone. 14 Vha wana kha Mulayo ho ṅwaliwa zwe Yehova a laya nga Mushe uri Vhaisiraele vha fanela u dzula mishashani* tshifhingani tsha vhuṱambo nga ṅwedzi wa vhusumbe,+ 15 na uri vha huwelele+ na u ḓivhadza kha miḓi yoṱhe na kha ḽoṱhe ḽa Yerusalema vha ri: “Ibvani ni ye dzinguni ḽa dzithavhani ni ye ni reme matavhi a re na maṱari kha miri ya miṱwari, miri ya mipaini, miri ya miṱhala na miri ya mitshevho na matavhi a re na maṱari a miṅwe miri a u ita mishasha, u ya nga zwo ṅwaliwaho.”
16 Vhathu vha bva vha vhuya na eneo matavhi uri vha ḓifhaṱele mishasha kha ṱhanga dzavho khathihi na miṱani yavho, miṱani ya nnḓu ya Mudzimu wa ngoho,+ khoroni ya muḓi phanḓa ha Khoro ya Maḓi+ na Khoroni ya Efuraimi.+ 17 Tshivhidzo tshoṱhe tshe tsha vhuya u bva vhuthubwani tsha fhaṱa mishasha, tsho vha tshi tshi khou dzula mishashani, ngauri Vhaisiraele vho vha vha sa athu u ita nga yeneyo nḓila u bva misini ya Yoshua+ murwa wa Nunu u swika nga ḽeneḽo ḓuvha, vho vha vho takala nga maanḓa.+ 18 Bugu ya Mulayo wa Mudzimu wa ngoho+ yo vha i tshi vhalwa ḓuvha ḽiṅwe na ḽiṅwe, u bva nga ḓuvha ḽa u thoma u swika nga ḓuvha ḽa u fhedza. Vho fara honoho vhuṱambo maḓuvha a sumbe, nga ḓuvha ḽa vhumalo ha vha na muṱangano mukhethwa, u ya nga he zwa vha zwi tshi ṱoḓea ngaho.+