Evangeli Ya Yohane
21 Nga murahu ha zwenezwo, Yesu o dovha a ḓivhonadza kha vhafunziwa vhawe ngei Lwanzheni lwa Tiberia. O ḓivhonadza nga heyi nḓila: 2 Ho vha hu na Simoni Petro, Thomasi (ane a pfi Didimo*),+ Nathanaele+ a bvaho Kana ngei Galilea, vharwa vha Sebedeo+ na vhaṅwe vhafunziwa vhawe vhavhili. 3 Simoni Petro a ri: “Ndi kha ḓi ya u rea khovhe.” Vhone vha ri: “Na riṋe ri khou ṱuwa na iwe.” Vha ṋamela tshikepe, fhedzi honoho vhusiku vha si fashe tshithu.+
4 Yesu a ima khunzi-khunzini nga maḓautsha, fhedzi vha si zwi ṱhogomele uri ndi Yesu.+ 5 Yesu a ri: “Vhananga, ni na zwiḽiwa?”* Vhone vha ri: “Hai!” 6 A amba navho a ri: “Poselani mambule kha thungo ya tsha u ḽa ya tshikepe, ndi hone ni tshi ḓo fasha.” Vha ita nga u ralo, fhedzi vha si kone u kokodza mambule ngauri vho vha vho fasha khovhe nnzhi.+ 7 Mufunziwa we Yesu a vha a tshi mu funa+ a amba na Petro a ri: “Ndi Murena!” Musi Simoni Petro a tshi pfa uri ndi Murena a ambara tshiambaro tshawe tsha nga nṱha, a fhufhela lwanzheni. 8 Fhedzi vhaṅwe vhafunziwa vha tevhela vhe kha tshikepe tshiṱuku vha tshi khou kokodza mambule o ḓalaho khovhe, ngauri vho vha vhe tsini na khunzi-khunzi, hu mithara dzi ṱoḓaho u vha 100* u bva henefho.
9 Musi vha tshi tou tsa tshikepeni, vha vhona ho vhewa khovhe kha maxale,* hu na vhurotho. 10 Yesu a amba navho a ri: “Ḓisani dziṅwe khovhe dze na dzi fasha.” 11 Simoni Petro a humela tshikepeni a kokodzela mambule khunzi-khunzini e a vha e na khovhe khulwane dza 153. Naho dzo vha dzi nnzhi mambule ho ngo kheruwa. 12 Yesu a ri: “Iḓani ni ḽe.” A hu na mufunziwa we a vha na tshivhindi tsha u mu vhudzisa uri: “Ndi iwe nnyi?” ngauri vho vha vha tshi zwi ḓivha uri ndi Murena. 13 Yesu a dzhia vhurotho a vha ṋea, a vha ṋea na khovhe. 14 Lwo vha lu lwa vhuraru+ Yesu a tshi ḓivhonadza kha vhafunziwa vhawe musi o no vuswa vhafuni.
15 Musi vho no fhedza u ḽa, Yesu a amba na Simoni Petro a ri: “Simoni murwa wa Yohane, naa u a mpfuna u fhira izwi?” Simoni a ri: “Ee, Murena, u a zwi ḓivha uri ndi a u funa.” Yesu a ri: “Ṋea ngwana dzanga zwiḽiwa.”+ 16 A amba nae lwa vhuvhili a ri: “Simoni murwa wa Yohane, naa u a mpfuna?” Simoni a ri: “Ee, Murena, u a zwi ḓivha uri ndi a u funa.” Yesu a ri: “Lisa ngwana dzanga.”+ 17 A amba nae lwa vhuraru a ri: “Simoni murwa wa Yohane, naa u a mpfuna?” Petro a ṱungufhala ngauri o vha o mu vhudzisa lwa vhuraru a ri: “Naa u a mpfuna?” Ene a ri: “Murena, zwithu zwoṱhe u a zwi ḓivha; u a zwi ḓivha uri ndi a u funa.” Yesu a ri: “Ṋea ngwana dzanga zwiḽiwa.+ 18 Ngoho ndi a u vhudza ndi ri, musi u tshee muswa, wo vha u tshi ḓiambadza wa ya hune wa funa. Fhedzi musi u tshi kalaha u ḓo isa zwanḓa muṅwe muthu a u ambadza, a u isa hune wa si hu fune.” 19 O vha a tshi khou zwi ambela uri a sumbedze nḓila ye lufu lwa Petro lwa vha lu tshi ḓo rendisa ngayo Mudzimu. Musi o no amba zwenezwo, a amba na Petro a ri: “Bvela phanḓa u tshi ntevhela.”+
20 Petro a rembuluwa a vhona mufunziwa we Yesu a vha a tshi mu funa+ a tshi khou tevhela, ndi uḽa we musi vha tshi khou ḽa tshilalelo a ḓitika nga khana ya Yesu a ri: “Murena, ndi nnyi ane a khou u fheṱa?” 21 Musi Petro a tshi mu vhona, a amba na Yesu a ri: “Murena, hu ḓo itea mini nga uyu munna?” 22 Yesu a ri: “Arali ndi tshi funa uri uyu a dzule e hone u swika ndi tshi vhuya, a zwi u kwami. Iwe bvela phanḓa u tshi ntevhela.” 23 Nga nṱhani ha zwenezwo, mafhungo a uri onoyo mufunziwa a nga si fe, a pfiwa nga vhaṅwe vhafunziwa. Naho zwo ralo, Yesu o vha a sa khou amba uri onoyo mufunziwa a nga si fe, fhedzi o ri: “Arali ndi tshi funa uri uyu a dzule e hone u swika ndi tshi vhuya, a zwi u kwami.”
24 Onoyu mufunziwa+ ndi ene we a ṱanziela nga ha zwenezwi zwithu na we a zwi ṅwala, ri a ḓivha uri vhuṱanzi he a vhu ṋea ndi ha ngoho.
25 Hu na zwiṅwe zwithu zwinzhi zwe Yesu a zwi ita, zwine arali zwi vhe zwo ṅwaliwa zwoṱhe, ndi vhona u nga mipombo yazwo yo vha i tshi ḓo ḓadza shango ya ḓi sala.+