Vhurifhi Ha Yakobo
2 Vhahashu, zwi konadzea hani uri ni vhe na lutendo kha Yesu Kristo Murena washu o huliswaho, ngeno ni na tshiṱalula?+ 2 Ngauri arali hune na kuvhangana hone ha dzhena muthu o ambaraho zwiambaro zwavhuḓi na rinngi dza musuku, ha dzhena na ane a shaya o ambara zwiambaro zwi re na tshika, 3 naa ni takalela o ambaraho zwiambaro zwavhuḓi na ri, “Dzula afha fhethu havhuḓi,” na amba na a shayaho na ri, “Iwe ima zwau,” kana na ri, “Dzula henefho fhasi”?+ 4 Arali ni tshi ita zwenezwo, naa a ni khou dzhia vhaṅwe vhe khwine u fhira vhaṅwe+ na u haṱula nga nḓila i si yavhuḓi?+
5 Vhahashu vha funwaho, thetshelesani. Naa Mudzimu ho ngo nanga vhane shango ḽa vha dzhia vhe vhashayi uri vha pfume kha u vha na lutendo+ na u vha maḽaifa a Muvhuso we a u fhulufhedzisa vhane vha mu funa?+ 6 Fhedzi no nyadza vha shayaho. Naa a si vhapfumi vhane vha ni tsikeledza+ na u ni isa khothe? 7 Naa a vha ni semi nga nṱhani ha dzina ḽavhuḓi ḽine na vhidzwa ngaḽo? 8 Ni vha ni tshi khou ita zwavhuḓi vhukuma arali ni tshi tevhedza mulayo wa khosi u ya nga luṅwalo lune lwa ri, “U tea u funa muhura wau vhunga u tshi ḓifuna.”+ 9 Fhedzi arali na dzula ni na tshiṱalula,+ ni khou ita tshivhi, mulayo u sumbedza uri ni na mulandu.+
10 Ane a tevhedza zwoṱhe zwine Mulayo wa amba, fhedzi a pfuka tshithu tshithihi kha wonoyo Mulayo, u vha o pfuka zwoṱhe zwine wa amba.+ 11 Ngauri we a ri, “U songo vha phombwe,”+ o dovha a ri, “U songo vhulaya.”+ Arali u sa iti vhupombwe, fhedzi wa vhulaya, wo pfuka mulayo. 12 Dzulani ni tshi amba na u ita zwithu sa vhane vha ḓo haṱulwa nga mulayo wa vhathu vho vhofholowaho.*+ 13 A sa khathutsheli ha nga khathutshelwi musi a tshi haṱulwa.+ U khathutshela zwi fhira khaṱhulo.
14 Vhahashu, zwi vhuyedza ngani arali muthu a tshi amba uri u na lutendo, fhedzi mishumo yawe i sa zwi sumbedzi?+ Naa lwonolwo lutendo lu nga mu tshidza?+ 15 Arali munna kana mufumakadzi a re mutendi a si na zwiambaro na zwiḽiwa zwo linganaho ḽeneḽo ḓuvha, 16 fhedzi muṅwe waṋu a amba navho a ri, “Tshimbilani nga mulalo, ni ambare, ni ḽe ni fure,” zwi ḓo vha vhuyedza ngani arali ni songo vha ṋea zwine vha zwi shaya?+ 17 Nga hu fanaho, na lutendo lu si na mishumo lwo fa.+
18 Fhedzi muṅwe u ḓo ri: “Iwe u na lutendo, nṋe ndi na mishumo. Ntsumbedze lutendo lwau lu si na mishumo, na nṋe ndi ḓo u sumbedza lutendo lwanga nga mishumo yanga.” 19 Naa u a tenda uri hu na Mudzimu muthihi? U khou ita zwavhuḓi vhukuma. Fhedzi na madimoni a a tenda a tetemela.+ 20 Iwe a si na ṱhalukanyo, naa a u zwi ḓivhi uri lutendo lu si na mishumo ndi mahandana? 21 Naa khotsi ashu Abrahamu ho ngo dzhiiwa sa o lugaho nga nṱhani ha mishumo ye a i ita? Naa ho ngo dzhiiwa sa o lugaho musi a tshi ṋekedza murwa wawe Isaka kha aḽeṱare?+ 22 Zwenezwi zwi sumbedza uri lutendo lwawe lwo vhonala kha mishumo yawe, mishumo yawe yo ita uri a vhe na lutendo lwo fhelelaho,+ 23 ha itea zwo ṅwaliwaho kha luṅwalo lune lwa ri: “Abrahamu o vha na lutendo kha Yehova,* a dzhiiwa sa o lugaho,”+ a vhidzwa khonani ya Yehova.*+
24 Zwino ni vho kona u zwi vhona uri muthu hu pfi o luga nga mishumo, hu si nga lutendo fhedzi. 25 Na Rahaba we a vha a tshi rengisa muvhili o dzhiiwa sa o lugaho nga nṱhani ha mishumo yawe, musi a tshi ṱanganedza vhaḓinḓa na u vha bvisa nga iṅwe nḓila.+ 26 Samusi muvhili u si na muya* wo fa,+ na lutendo lu si na mishumo lwo fa.+