Bugu Ya Vhuvhili Ya Koronika
20 Nga murahu Vhamoaba+ na Vhaamoni+ khathihi na vhaṅwe Vhaamonimi,* vha ḓa vha lwa na Yehoshafati. 2 Ngauralo, Yehoshafati a vhudzwa uri: “Gogo ḽihulu ḽo ḓa u lwa na iwe ḽi tshi bva dzinguni ḽa lwanzheni,* ḽi tshi bva Edomo,+ ḽi ngei Hasasoni-thamara, hune ha vha Engedi.”+ 3 Yehoshafati a tshuwa, a ḓiimisela uri a ṱoḓe Yehova.+ A ḓivhadza uri Vhayuda vhoṱhe vha ḓidzime zwiḽiwa. 4 Vhathu vha Yuda vha kuvhangana uri vha vhudzise nga ha Yehova;+ vho ḓa vha tshi bva miḓini yoṱhe ya Yuda uri vha ambe na Yehova.
5 Yehoshafati a ima tshivhidzoni tsha Yuda na tsha Yerusalema nḓuni ya Yehova phanḓa ha muṱa muswa, 6 a ri:
“Iwe Yehova Mudzimu wa vhomakhulukuku washu, naa a u Mudzimu a re ngei ṱaḓulu;+ naa a u langi mivhuso yoṱhe ya dzitshaka?+ Iwe u na maanḓa na nungo, a hu na ane a nga lwa na iwe.+ 7 Naa a si Iwe Mudzimu washu we wa pandela vhadzulapo vha ḽino shango phanḓa ha vhathu vhau vha Isiraele, wa ḽi ṋea vhana* vha khonani yau Abrahamu ḽa vha ḽavho lwa tshoṱhe?+ 8 Vha dzula khaḽo, henefho vha u fhaṱela nnḓu khethwa ya dzina ḽau,+ vha ri: 9 ‘Arali ra welwa nga khombo, hu sa londwi uri ndi nga banga, khaṱhulo dzi vhavhaho, malwadze kana nḓala, ri ḓo ima phanḓa ha ino nnḓu na phanḓa hau (ngauri dzina ḽau ḽi kha ino nnḓu)+ ra vhidzelela uri u ri thuse vhuṱunguni hashu, u ḓo ri pfa wa ri tshidza.’+ 10 Zwino ngevha vhanna vha Vhaamoni, vha Vhamoaba na vha dzinguni ḽa thavhani dza Seiri,+ vhe wa si tendele Vhaisiraele vha tshi vha tshoṱela musi vha tshi bva shangoni ḽa Egipita. Vho vha litsha vha si vha fhelise.+ 11 Zwino vha khou ri lifhedza nga u ḓa vha ri pandela shangoni ḽe wa ri ṋea ḽone sa ifa.+ 12 Yowee Mudzimu washu, naa a u nga vha haṱuli?+ Ngauri a ri na maanḓa phanḓa ha heḽi gogo ḽihulu ḽine ḽa khou ḓa u lwa na riṋe; a ri ḓivhi zwine ra ḓo zwi ita,+ fhedzi ro lavhelesa iwe.”+
13 Nga tshenetsho tshifhinga, Vhayuda vhoṱhe vho vha vho ima phanḓa ha Yehova khathihi na vhana vhavho vhaṱuku, vhafumakadzi vhavho na vharwa vhavho.
14 Yahasiele murwa wa Sakaria, murwa wa Benaya, murwa wa Yeiele, murwa wa Mathanya wa Mulevi wa vharwa vha Asafu a ḓelwa nga muya wa Yehova musi e vhukati ha tshivhidzo. 15 A ri: “Thetshelesani inwi Vhayuda vhoṱhe na inwi vhadzulapo vha Yerusalema na iwe Khosi Yehoshafati! Zwine Yehova a ni vhudza zwone ndi hezwi: ‘Ni songo ofhiswa kana u tshuwiswa nga heḽi gogo, ngauri nndwa a si yaṋu ndi ya Mudzimu.+ 16 Matshelo ni tse ni lwe navho. Vha ḓo vha vha tshi khou gonya nga pharani ya Tsitsi, ni ḓo vha wana magumoni a govha* u livhana na soga ḽa Yeruele. 17 A ni nga ḓo lwa yeneyo nndwa. Khwaṱhani, ni ime+ ni vhone Yehova a tshi ni tshidza.+ Iwe Yuda na iwe Yerusalema u songo ofha+ kana u tshuwa. Matshelo ni bve ni lwe navho, Yehova u ḓo vha na inwi.’”+
18 Yehoshafati a khotha o kwatamisa tshifhaṱuwo, Vhayuda vhoṱhe na vhadzulapo vha Yerusalema vha gwadama phanḓa ha Yehova vha rabela Yehova. 19 Vhalevi vha re vhaḓuhulu vha Vhakehati+ na vha Vhakora vha takuwa vha renda Yehova Mudzimu wa Isiraele nga ipfi ḽihulu.+
20 Vha vuwa nga matsheloni-tsheloni nga ḓuvha ḽi tevhelaho vha ya sogani ḽa Thekoa.+ Musi vha tshi khou bva, Yehoshafati a takuwa a ri: “Nthetsheleseni inwi Vhayuda na inwi vhadzulapo vha Yerusalema! Fhulufhelani Yehova Mudzimu waṋu uri ni kone u ima no khwaṱha.* Fhulufhelani vhaporofita vhawe,+ ni ḓo kunda.”
21 Musi o no eletshedza vhathu, a vhea vhanna uri vha imbele+ Yehova na u mu renda vho ambara zwiambaro zwikhethwa musi vha tshi khou bva vho ranga phanḓa vhanna vho ḓiṱamaho, vha ri: “Livhuwani Yehova, ngauri lufuno lwawe lu sa shanduki ndi lwa lini na lini.”+
22 Musi vha tshi thoma u imba nyimbo dza thendo vho takala, Yehova a vhea vhanna uri vha lalele Vhaamoni, Vhamoaba na vha dzinguni ḽa thavhani dza Seiri vha tshoṱelaho ḽa Yuda, vha vhulayana nga tshavho.+ 23 Vhaamoni na Vhamoaba vha vutshela vhadzulapo vha dzinguni ḽa thavhani dza Seiri+ uri vha vha fhedze; musi vho no fhedza vhadzulapo vha Seiri, vha vhulayana nga tshavho.+
24 Fhedzi musi Vhayuda vha tshi swika kha tshiingamo tsha sogani+ vha tshi ri vha lavhelese ḽiḽa gogo, vha vhona zwitumbu zwo ḓala fhasi;+ hu si na we a ponyoka. 25 Yehoshafati na vhathu vhawe vha ḓa vha vha dzhiela zwe vha thuba, vha wana vhe na thundu nnzhi, zwiambaro na zwithu zwi tamisaho, zwo ḓala lwe vha kundwa u zwi hwala.+ Zwo dzhia maḓuvha mararu u hwala zwo thubiwaho ngauri zwo vha zwi zwinzhi. 26 Nga ḓuvha ḽa vhuṋa vha kuvhangana Govhani ḽa Beraka, henefho vha renda* Yehova. Ndi ngazwo henefho fhethu ho pfi ndi Govhani ḽa Beraka*+ u swika na ṋamusi.
27 Vhanna vhoṱhe vha Yuda na vha Yerusalema, vho rangwa phanḓa nga Yehoshafati, vha humela Yerusalema vho takala, ngauri vho vha vho takadzwa nga Yehova nge a kunda maswina avho.+ 28 Vha swika Yerusalema vha tshi khou lidza zwilidzo zwi re na ṱhale, haripa+ na phalaphala,+ vha ya nḓuni ya Yehova.+ 29 Mudzimu a ita uri mivhuso yoṱhe ya mashango i ofhe musi i tshi pfa uri Yehova o lwa na maswina a Vhaisiraele.+ 30 Muvhusoni wa Yehoshafati ha vha na mulalo, Mudzimu a mu ṋea mulalo thungo dzoṱhe.+
31 Yehoshafati a bvela phanḓa a tshi vhusa Vhayuda. O vha e na miṅwaha ya 35 musi a tshi vha khosi, o vhusa miṅwaha ya 25 Yerusalema. Mme awe o vha a tshi pfi Azuba ṅwananyana wa Shilihi.+ 32 O tevhedza zwe zwa itwa nga khotsi awe Asa.+ Ho ngo zwi litsha, o ita zwo lugaho phanḓa ha Yehova.+ 33 Naho zwo ralo, ho ngo thutha fhethu ha vhurabeli,+ vhathu vho vha vha sa athu u lugiselela Mudzimu wa vhomakhulukuku wavho mbilu dzavho.+
34 Mafhungo oṱhe a Yehoshafati, u bva mathomoni u swika magumoni, o ṅwaliwa kha mafhungo a Yehu+ murwa wa Henani,+ e a katelwa kha Bugu ya Mahosi a Isiraele. 35 Nga murahu Khosi Yehoshafati wa Yuda a konana na Khosi Ahasia wa Isiraele, we a vha a tshi ita zwithu zwivhi.+ 36 A langana nae uri vha fhaṱe zwikepe zwa u ya Tharasisi,+ vha fhaṱa zwikepe ngei Etsioni-gebere.+ 37 Naho zwo ralo, Eliesere murwa wa Dodava wa Maresa a porofita nga ha Yehoshafati a ri: “Nga nṱhani ha uri wo konana na Ahasia, Yehova u ḓo tshinya mishumo yau.”+ Zwikepe zwa kwashea,+ zwa si tsha kona u ya Tharasisi.