Ekisoda

13 Yehova a dovha a amba na Mushe a ri: 2 “Matanzhe oṱhe a vhatukana vhukati ha Vhaisiraele ni a ite uri a vhe makhethwa* kha nṋe. Tanzhe ḽa mutukana na ḽa tshifuwo tsha tshiduna ndi ḽanga.”+

3 Mushe a amba na Vhaisiraele a ri: “Ni humbule heḽi ḓuvha ḽe na bva ngaḽo Egipita+ nḓuni ya vhupuli, ngauri Yehova o ni bvisa henefho nga tshanḓa tsha maanḓa.+ Ni songo ḽa tshithu tshi re na mbiliso. 4 Ni ḓo pfuluwa nga ḽeneḽi ḓuvha, nga ṅwedzi wa Abibi.*+ 5 Musi Yehova o no u isa shangoni ḽa Vhakanana, ḽa Vhahethe, ḽa Vhaamori, ḽa Vhahevi na ḽa Vhayebusi,+ shango ḽe a anela vhomakhulukuku wau uri u ḓo u ṋea ḽone,+ shango ḽi elelaho mafhi na mutoli,+ u dzule u tshi humbula tshenetshi tshiitea nga wonoyu ṅwedzi. 6 U fhedze maḓuvha a sumbe u tshi ḽa vhurotho vhu si na mbiliso,+ nga ḓuvha ḽa vhusumbe hu ḓo vha na vhuṱambo ha Yehova. 7 Vhurotho vhu si na mbiliso vhu fanela u ḽiwa maḓuvha a sumbe;+ u songo vhuya wa vha na tshithu naho tshi tshifhio tshi re na mbiliso+ na suko ḽi re na mbiliso ḽi songo vhuya ḽa wanala shangoni* ḽau ḽoṱhe. 8 U vhudze vhana vhau nga ḽeneḽo ḓuvha uri: ‘Ndi ita zwenezwi nga nṱhani ha zwe Yehova a zwi ita musi a tshi mbvisa Egipita.’+ 9 Honovhu vhuṱambo vhu ḓo u humbudza* nga ha tshenetsho tshiitea zwa tou nga zwo ṅwaliwa kha tshanḓa tshau na kha phanḓa yau,*+ uri u kone u amba nga ha mulayo wa Yehova, ngauri Yehova o u bvisa Egipita nga tshanḓa tsha ma⁠anḓa. 10 U vhulunge wonoyu mulayo ṅwaha muṅwe na muṅwe+ nga tshifhinga tsho vhewaho.

11 “Musi Yehova a tshi u isa shangoni ḽa Vhakanana, ḽe a fhulufhedzisa iwe na vhomakhulukuku wau uri u ḓo u ṋea ḽone,+ 12 u kumedze Yehova matanzhe oṱhe a vhatukana na a zwifuwo zwine wa zwi wana. Zwifuwo zwoṱhe zwa zwiduna ndi zwa Yehova.+ 13 Tanzhe ḽiṅwe na ḽiṅwe ḽa donngi u ḽi rengulule nga nngu, arali wa sa ḽi rengulula, u ḽi vunḓe mutsinga. Tanzhe ḽiṅwe na ḽiṅwe ḽa vharwa vhau u ḽi rengulule.+

14 “Arali ṅwana wau a u vhudzisa nga murahu a ri: ‘Zwi amba mini zwenezwi?’ U mu fhindule u ri: ‘Yehova o ri bvisa nga tshanḓa tsha ma⁠anḓa Egipita, nḓuni ya vhupuli.+ 15 Musi Farao a tshi rindidza mbilu a hana ri tshi ṱuwa,+ Yehova o vhulaya matanzhe oṱhe a shangoni ḽa Egipita u bva kha matanzhe a vhathu u swika kha matanzhe a zwifuwo.+ Ndi ngazwo ndi tshi khou itela Yehova tshiṱhavhelo tsha matanzhe oṱhe a zwiduna, tanzhe ḽiṅwe na ḽiṅwe kha vharwa vhanga ndi a ḽi rengulula.’ 16 Zwenezwi zwi ḓo nga zwo tou ṅwaliwa kha tshanḓa tshau, zwa tou nga zwo tou vhofhelelwa kha phanḓa yau,*+ ngauri Yehova o ri bvisa Egipita nga tshanḓa tsha maanḓa.”

17 Musi Farao a tshi litsha vhathu vha tshi ṱuwa, Mudzimu ho ngo vha tshimbidza nga nḓila ya shango ḽa Vhafilisita naho yo vha i ya tsini. Ngauri Mudzimu o ri: “Vhathu vha nga shandula mihumbulo yavho musi hu tshi vuwa nndwa, vha humela Egipita.” 18 Mudzimu o ita uri vha mone nga nḓila ya sogani i yaho Lwanzheni Lutswuku.+ Fhedzi Vhaisiraele vho bva shangoni ḽa Egipita vho dzudzanyea zwavhuḓi sa mmbi. 19 Mushe o ṱuwa na marambo a Yosefa, ngauri Yosefa o vha o anisa vharwa vha Isiraele, a ri: “Mudzimu u ḓo ni thusa zwa vhukuma, ni tea u hwala marambo anga ni ṱuwe nao fhano.”+ 20 Vha ṱuwa Sukothe vha ya u atha madennde ngei Ethama magumoni a soga.

21 Nga masiari Yehova o vha a tshi vha ranga phanḓa e nga ngomu ha gole,+ nga madekwana e kha mulilo uri a vha vhonetshele, uri vha kone u tshimbila masiari na vhusiku.+ 22 Gole ḽo vha ḽi tshi ḓi dzula ḽi hone phanḓa ha vhathu nga masiari, mulilo wo vha u tshi dzula u hone nga madekwana.+