Vhurifhi Ha Vhuvhili Vhu Yaho Kha Timotheo

3 Fhedzi ḓivha hezwi: Maḓuvhani a vhufhelo+ hu ḓo vha na zwifhinga zwi lemelaho zwi konḓaho u sedzana nazwo. 2 Ngauri vhathu vha ḓo funa vhone vhaṋe fhedzi, vha funa tshelede, vha zuwa, vha ḓihudza, vha semana, a vha nga thetshelesi vhabebi, a vha nga livhuwi, a vha nga fhulufhedzei, 3 a vha nga vhi na lufuno, a vha nga tendelani na vhaṅwe, vha ḓo tshinya vhaṅwe dzina, a vha nga koni u ḓifara, vha ḓo ita zwa dzikhakhathi, a vha nga funi zwivhuya, 4 vha ḓo vha vhafheṱi, vha ḓo vha na swili, vha ḓikukumusa, vha funa miḓifho nṱhani ha u funa Mudzimu, 5 vha ḓo ḓiita u nga vho ḓikumedzela kha Mudzimu, fhedzi vha sa fhulufheli maanḓa awe;+ ṱutshela kule na vhenevho vhathu. 6 Zwenezwi zwi ita uri hu vhe na vhanna vhane vha ya vha fhura vhafumakadzi nḓuni dzavho vha sa zwi ṱhogomeli, vhenevho vhafumakadzi a vha na nungo, vho lemedzwa nga zwivhi, ndi phuli dza nyemulo dzavho, 7 vha dzula vha tshi guda, fhedzi a vha wani nḓivho yo teaho ya ngoho.

8 Vhenevha vha dzula vha tshi hanedza ngoho u fana na musi Yannesi na Yamburesi vha tshi hanedza Mushe. Mihumbulo yavho yo tshinyala, Mudzimu ha vha ṱanganedzi ngauri a vha tevhedzi lutendo. 9 Fhedzi a hu na zwine vha ḓo zwi ita, ngauri vhathu vhoṱhe vha ḓo zwi vhona uri ndi matsilu, u fana na Yannesi na Yamburesi.+ 10 Fhedzi iwe wo tevhela pfunzo yanga nga vhuronwane, nḓila ine nda tshila ngayo,+ tshipikwa tshanga, wa vhona lutendo lwanga, u sa fhela mbilu hanga, lufuno lwanga, u konḓelela hanga, 11 u tovholwa hanga, u tambula hanga na zwithu zwoṱhe zwe zwa itea kha nṋe ngei Antiokia,+ Ikonio+ na Lisitara.+ Ndo konḓelela u tovholwa, Murena a ntshidza kha zwoṱhe.+ 12 Vhoṱhe vha re na vhuthihi na Kristo Yesu, vho ḓikumedzelaho kha Mudzimu na vhone vha ḓo tovholwa.+ 13 Fhedzi vhavhi na vhane vha fhura vha ḓo ṋaṋa u ita vhuvhi, vha tshi fhura vhaṅwe na vhone vha tshi fhurwa.+

14 Fhedzi iwe bvela phanḓa kha zwithu zwe wa zwi guda na zwe wa ṱuṱuwedzwa uri u zwi tende,+ samusi u tshi ḓivha vhe wa zwi guda khavho, 15 na uri wo ḓivha maṅwalo makhethwa+ u bva vhuṱukuni,+ ane a u ṱalifhisa uri u tshidzwe nga u tenda Kristo Yesu.+ 16 Maṅwalo oṱhe o hevhedzwa nga Mudzimu,+ a a vhuyedza kha u funza,+ kha u kaidza, kha u khakhulula na kha u laya nga nḓila yo lugaho,+ 17 uri mushumeli wa Mudzimu a fanelee nga vhuḓalo u ita mishumo yoṱhe yavhuḓi.