Evangeli Ya Yohane
3 Ho vha hu na muṅwe munna wa Mufarisei we a vha a tshi pfi Nikodemo,+ o vha e muhulwane wa Vhayuda. 2 A ḓa kha Yesu vhusiku+ a ri: “Rabi,+ ri a zwi ḓivha uri u mufunzi a bvaho kha Mudzimu, ngauri a hu na ane a nga ita honovhu vhuṱolo+ vhune wa vhu ita nga nnḓa ha musi Mudzimu e nae.”+ 3 Yesu a ri: “Ngoho ndi a u vhudza ndi ri, arali muthu a sa bebwa hafhu,+ a nga si vhone Muvhuso wa Mudzimu.”+ 4 Nikodemo a ri: “Muthu a nga bebwa hani o no aluwa? Naa a nga dzhena mbumbeloni ya mme awe a dovha a bebwa?” 5 Yesu a ri: “Ngoho ndi a u vhudza ndi ri, arali muthu a sa bebwa nga maḓi+ na muya,+ a nga si dzhene Muvhusoni wa Mudzimu. 6 Vhe vha bebwa nga ṋama ndi vha ṋama, vhe vha bebwa nga muya ndi vha muya. 7 U songo mangala ndi tshi ri: Ni fanela u bebwa hafhu. 8 Muya u vhudzula hune wa funa, wa pfa muungo wawo, fhedzi a u ḓivhi hune wa bva hone na hune wa ya. Zwo tou ralo nga vhoṱhe vhane vha bebwa nga muya.”+
9 Nikodemo a ri: “Zwi nga konadzea hani zwenezwo?” 10 Yesu a ri: “Ndi ngani u sa zwi ḓivhi ngeno u mufunzi wa Isiraele? 11 Ngoho ndi a u vhudza ndi ri, ri amba zwine ra zwi ḓivha, ra ṱanziela zwe ra zwi vhona, fhedzi inwi a ni tendi zwine ra zwi amba. 12 Arali ndo ni vhudza nga ha zwithu zwa kha ḽifhasi ni si tende, ni ḓo tenda hani ndi tshi ni vhudza nga ha zwithu zwa ṱaḓulu? 13 Zwiṅwe hafhu, a hu na muthu we a gonya ṱaḓulu,+ nga nnḓa ha we a tsa a tshi bva ṱaḓulu,+ ane a vha Murwa muthu. 14 Vhunga Mushe o imisela ṋowa nṱha ngei sogani,+ na Murwa muthu u tea u imiselwa nṱha,+ 15 uri ane a mu tenda a wane vhutshilo vhu sa fheli.+
16 “Ngauri Mudzimu o funa shango zwihuluhulu a vhuya a ṋekedza Murwa wawe muthihi fhedzi,*+ uri ane a mu tenda a si fheliswe, fhedzi a wane vhutshilo vhu sa fheli.+ 17 Mudzimu a tshi rumela Murwa wawe shangoni o vha a tshi khou itela uri shango ḽi tshidzwe ngae, hu si uri a ḽi haṱule.+ 18 Ane a mu tenda ha nga haṱulwi.+ Ane a si mu tende o no ḓi haṱulwa, ngauri ho ngo tenda dzina ḽa Murwa muthihi fhedzi wa Mudzimu.+ 19 Vhathu vha ḓo haṱulwa ngauri tshedza tsho ḓa shangoni,+ vhone vha funa swiswi nṱhani ha tshedza, ngauri vha ita zwithu zwivhi. 20 Ane a ita zwithu zwivhi u vhenga tshedza, ha ḓi tshedzani, uri zwine a zwi ita zwi si bvele khagala. 21 Fhedzi ane a ita zwo lugaho u ḓa tshedzani,+ uri zwine a zwi ita zwi vhonale uri zwi tendelana na zwine Mudzimu a zwi funa.”
22 Nga murahu ha zwenezwi, Yesu a ṱuwa na vhafunziwa vhawe vha ya miḓanani ya Yudea, a fhedza tshifhinganyana navho henefho a tshi khou lovhedza.+ 23 Yohane o vha a tshi khou lovhedza ngei Enoni tsini na Salaimi, ngauri ho vha hu na maḓi manzhi henefho.+ Vhathu vha tshi ḓa u lovhedzwa henefho;+ 24 ngauri Yohane o vha a sa athu u valelwa dzhele.+
25 Ho vha na khani vhukati ha vhafunziwa vha Yohane na muṅwe Muyuda nga ha u kunakiswa. 26 Vha ḓa kha Yohane vha ri: “Rabi, uḽa munna we wa vha u nae seli ha Mulambo wa Yorodane, we wa ṱanziela nga hae,+ u khou lovhedza, vhathu vhoṱhe vha khou ya khae.” 27 Yohane a ri: “A hu na muthu ane a nga wana tshithu arali a songo ṋewa zwi tshi bva ṱaḓulu. 28 Inwi ni ṱhanzi dza zwe nda zwi amba ndi tshi ri, ‘A si nṋe Kristo,+ fhedzi ndo rumiwa phanḓa hawe.’+ 29 A re na muselwa ndi mukwasha.+ Naho zwo ralo, khonani ya mukwasha i a mu pfa musi a tshi khou amba, i a takala musi i tshi pfa ipfi ḽa mukwasha. Na nṋe ndo takala zwihulu. 30 Onoyo u fanela u hula a tshi ya, fhedzi nṋe ndi tshi ṱukufhala.”
31 A bvaho ṱaḓulu+ ndi ene muhulwane kha vhathu vhoṱhe. Ane a bva kha ḽifhasi ndi wa kha ḽifhasi, u amba zwithu zwa kha ḽifhasi. A bvaho ṱaḓulu ndi ene muhulwane kha vhathu vhoṱhe.+ 32 U ṱanziela zwe a zwi vhona na zwe a zwi pfa,+ fhedzi a hu na ane a tenda zwine a zwi amba.+ 33 Ane a tenda zwine a zwi amba u khwaṱhisedza uri Mudzimu u amba ngoho.+ 34 We a rumiwa nga Mudzimu u amba zwa Mudzimu,+ ngauri Mudzimu u ṋea muya mukhethwa nga vhunzhi. 35 Khotsi u funa Murwa,+ o mu ṋea zwithu zwoṱhe.+ 36 Ane a tenda Murwa u ḓo wana vhutshilo vhu sa fheli;+ ane a si thetshelese Murwa ha nga wani vhutshilo,+ fhedzi vhuhali ha Mudzimu vhu dzula vhu khae.+