Yesaya
14 Yehova u ḓo khathutshela Yakobo,+ a dovha a nanga Isiraele.+ U ḓo vha dzudza* shangoni ḽavho,+ vhatsinda vha ḓo ṱuwa navho, vha ṱangana na vha nnḓu ya Yakobo.+ 2 Vhathu vha ḓo vha dzhia vha vha isa shangoni ḽavho, vha nnḓu ya Isiraele vha ḓo vha dzhia vha vha vhashumeli vhavho vha vhanna na vha vhafumakadzi+ shangoni ḽa Yehova; vha ḓo thuba vho vha thubaho, vha ḓo langa vhane vha vha kombetshedza u shuma.*
3 Nga ḓuvha ḽine Yehova a ḓo u awedza kha vhuṱungu hau na kha mbilaelo dzau na kha vhupuli vhu lemelaho vhune wa vha khaho,+ 4 ndi hone u tshi ḓo amba hoyu murero kha khosi ya Babele wa ri:
“We a vha a tshi kombetshedza vhaṅwe uri vha shume ha tsha vha kombetshedza!
Mutsiko wo fhela!+
5 Yehova o vunḓa thonga ya vhavhi,
O vunḓa lubaḓa lwa vhavhusi,+
6 Ane a khou rwa vhathu o sinyuwa a sa litshi,+
Ane a kunda dzitshaka o sinyuwa a tshi dzi tovhola a sa dzi litshi.+
7 Ḽifhasi ḽoṱhe ḽo awela, ḽo lala.
Vhathu vha pembela vho takala.+
8 Na miri ya midzhunipa i a takala musi i tshi vhona zwe zwa itea kha iwe,
Khathihi na miṱaululo ya Libanoni.
I ri, ‘U bva tshee wa wa,
A hu na ane a ri rema.’
9 Na Vhiḓa* ngei fhasi ḽo vusa vilinga
Uri ḽi u ṱanganedze musi u tshi ḓa.
Nga nṱhani hau, ḽi vusa vho faho,
Vharangaphanḓa vhoṱhe vha kha ḽifhasi vhane vha tsikeledza.
Ḽi ita uri mahosi oṱhe a dzitshaka a takuwe kha khuluṋoni dzao.
10 Vhoṱhe vha amba na iwe vha ri,
‘Naa na iwe wo fhelelwa nga nungo sa riṋe?
Naa u vho fana na riṋe?
Wo eḓela nṱha ha mbungu,
Wo fukedzwa nga mbungu.’
12 Wo wa u tshi bva ṱaḓulu,
Iwe ṋaledzi i penyaho, murwa wa maḓautsha!
Wo wiselwa kha ḽifhasi,
Iwe we wa kunda dzitshaka!+
13 Wo amba mbiluni yau wa ri, ‘Ndi ḓo gonya ṱaḓulu.+
Ndi ḓo vhea khuluṋoni yanga nṱha ha ṋaledzi dza Mudzimu,+
Ndi ḓo dzula kha thavha ya muṱangano,
Fhethu hune ha vha kule-kule thungo ya devhula.+
14 Ndi ḓo gonya nṱha ha makole;
Nda ita uri ndi fane na Wa-Ṱaḓulu-ṱaḓulu.’
15 Nṱhani hazwo, u ḓo iswa fhasi Vhiḓani,*
Fhasi-fhasi dindini.
16 Vhane vha u vhona vha ḓo u lavhelesa;
Vha ḓo u sedzesa, vha ri,
‘Naa ndi uḽa munna we a vha a tshi dzinginyisa ḽifhasi,
We a ita uri mivhuso i tetemele,+
17 We a ita uri ḽifhasi ḽoṱhe ḽi nge soga
We a fhelisa miḓi,+
We a hana vhafariwa vhawe vha tshi humela hayani?’+
19 Fhedzi iwe wo tou laṱwa, a u na vhiḓa,
U fana na tavhi ḽi sa ṱoḓei,
Wo fukedzwa nga zwitumbu zwa vho vhulawaho nga banga,
Vhane vha tsela fhasi dindini ḽi re na matombo,
U fana na tshitumbu tshine tsha kandekanywa nga milenzhe.
20 U nga si vhulungwe na mahosi vhiḓani,
Ngauri wo fhelisa shango ḽau,
Wo vhulaya vhathu vhau.
Vhana vha vhaitazwivhi a vha tsha ḓo dovha vha ambiwa.
21 Lugiselelani u vhulaya vharwa vhawe
Nga nṱhani ha mulandu wa vhomakhulukuku wavho,
Uri vha si takuwe vha langa ḽifhasi
Vha ḓadza shango nga miḓi yavho.”
22 “Ndi ḓo lwa navho,”+ u ralo Yehova wa mavhuthu.
“Babele ndi ḓo fhelisa dzina na masalela na vhaḓuhulu na murafho u ḓaho,”+ u ralo Yehova.
23 “Ndi ḓo ita uri u dzulwe nga nungu, u vhe fhethu hu re na mativha, ndi ḓo u swiela nga luswielo lu tshinyadzaho,”+ u ralo Yehova wa mavhuthu.
24 Yehova wa mavhuthu o ana a ri:
“Samusi ndi tshi ṱoḓa u zwi ita, zwi ḓo itea,
Samusi ndo ita phetho, zwi ḓo itea ngangoho.
25 Ndi ḓo kwashekanya Muasuri shangoni ḽanga,
Ndi ḓo mu kandekanya kha thavha dzanga.+
Ndi ḓo bvisa dzhogo yawe khavho,
Muhwalo wawe ndi ḓo u rula kha shaḓa ḽavho.”+
26 Zwenezwi ndi zwe zwa dzudzanywa u itwa ḽifhasini ḽoṱhe,
Hetshi ndi tshone tshanḓa tshe tsha imiselwa nṱha uri tshi rwe tshaka dzoṱhe.
27 Ngauri Yehova wa mavhuthu o ita phetho,
Ndi nnyi ane a nga i thivhela?+
O imisela nṱha tshanḓa tshawe,
Ndi nnyi ane a nga tshi humisa?+
28 Nga ṅwaha we Khosi Ahasi a fa ngawo,+ ho itwa heyi khaṱhulo ha pfi:
29 “Iwe Filisita, hu songo vha na ane a takala vhukati hau,
Ngauri lubaḓa lwa ane a khou u rwa lwo vunḓea.
Ngauri kha mudzi wa ṋowa+ hu ḓo bva ṋowa i re na vhuṱungu,+
Ṅwana wayo u ḓo vha ṋowa ya mulilo i fhufhaho.
30 Matanzhe a vha si na zwavho a ḓo ḽa
Na vhashai vha ḓo eḓela vho tsireledzea,
Ndi ḓo vhulaya vhathu vhau nga nḓala,
Ndi ḓo vhulaya vhane vha ḓo vha vho sala.+
31 Iwe khoro, zhamba! Iwe muḓi, lila!
Iwe Filisita, vhathu vhau vha ḓo kulea nungo!
Ngauri vhutsi vhu khou ḓa vhu tshi bva thungo ya devhula,
A hu na ane a ongolowa kha mmbi yawe.”
32 Vha ḓo fhindula hani vhaḓinḓa vha lushaka?
Vha ḓo vha fhindula vha ri Yehova o thea mutheo wa Tsioni,+
Na uri vha ḓiṱukufhadzaho kha vhathu vhawe vha ḓo shavhela khawo.