Evangeli Ya Mateo

24 Musi Yesu a tshi bva thembeleni, vhafunziwa vhawe vha ḓa khae vha mu sumbedza zwifhaṱo zwa thembele. 2 A vha fhindula a ri: “Naa izwi zwifhaṱo zwoṱhe ni khou zwi vhona? Ngoho ndi a ni vhudza uri, a hu na tombo ḽine ḽa ḓo sala nṱha ha ḽiṅwe, oṱhe a ḓo wiselwa fhasi.”+

3 Musi Yesu o dzula Thavhani ya Miṱwari, vhafunziwa vhawe vha ḓa khae e eṱhe, vha mu vhudzisa vha ri: “Ri vhudze uri izwi zwithu zwi ḓo itea lini, na uri tshiga tshi ḓo vha tshifhio tsha u vha hone*+ hau na tsha vhufhelo ha shango?”*+

4 Yesu a ri: “Ni ṱhogomele uri hu si vhe na ane a ni xedza,+ 5 ngauri vhanzhi vha ḓo ḓa nga dzina ḽanga, vha ri, ‘Ndi nṋe Kristo,’ vha xedza vhanzhi.+ 6 Ni ḓo pfa nga ha dzinndwa na nga ha mivhigo ya dzinndwa. Ni songo tshuwa, ngauri zwenezwi zwithu zwi fanela u itea, fhedzi vhufhelo a vhu athu u swika.+

7 “Lushaka lu ḓo lwa na luṅwe lushaka na muvhuso wa lwa na muṅwe muvhuso,+ ha vha na nḓala,+ ha vha na midzinginyo fhethu hunzhi.+ 8 Zwenezwi zwithu zwoṱhe ndi u thoma ha maṱungu.*

9 “Vha ḓo ni tambudza+ vha ni vhulaya,+ ni ḓo vhengiwa nga tshaka dzoṱhe nga nṱhani ha dzina ḽanga.+ 10 Zwiṅwe hafhu, vhanzhi vha ḓo khukhuliswa, vha ambululana, vha vhengana. 11 Hu ḓo vha na vhaporofita vha mazwifhi vhanzhi, vha ḓo xedza vhanzhi,+ 12 lufuno lwa vhathu vhanzhi lu ḓo fhungudzea nga nṱhani ha u engedzea ha vhuvhi. 13 Fhedzi we a konḓelela* u swika vhufheloni u ḓo tshidzwa.+ 14 Huno aya mafhungo maḓifha a Muvhuso a ḓo ḓivhadzwa ḽifhasini ḽoṱhe uri a pfiwe nga* tshaka dzoṱhe,+ nga murahu ndi hone vhufhelo vhu tshi ḓo ḓa.

15 “Ngauralo, samusi zwo ambiwa nga muporofita Daniele, musi ni tshi vhona tshithu tshi nengisaho tshine tsha tshinyadza tshi fhethu hukhethwa,+ (muvhali nga a shumise ṱhalukanyo), 16 a re Yudea a shavhele thavhani.+ 17 A re kha ṱhanga a songo tsa a ya a dzhia thundu dzi re nḓuni yawe, 18 a re tsimuni a songo tsha humela hayani uri a dzhie tshiambaro tshawe. 19 Khombo kha vho vhifhaho muvhilini na vha mamisaho misini yeneyo! 20 Dzulani ni tshi rabela uri ni si shavhe vhuria kana nga Savhatha; 21 ngauri hu ḓo vha na maṱungu mahulu+ a sa athu u vhuya a vha hone u bva tshee shango ḽa sikwa u swika zwino, ha tsha ḓo dovha a vha hone.+ 22 Zwi re zwone ndi uri arali eneo maḓuvha a sa fhungudzwa, a hu na ane a ḓo tshidzwa, fhedzi a ḓo fhungudzwa u itela vho nangiwaho.+

23 “Arali muthu a amba na inwi a ri, ‘Vhonani! Kristo khoyu,’+ kana, ‘Khouḽaa!’ ni songo zwi tenda.+ 24 Ngauri hu ḓo vha na Vhokristo vha mazwifhi na vhaporofita+ vha mazwifhi, vha ḓo ita zwiga zwihulu na zwithu zwi mangadzaho, arali zwi tshi konadzea vha xedza+ na vho nangiwaho. 25 Ndi khou dzula ndo ni vhudza hu tshee nga phanḓa. 26 Arali vhathu vha ri, ‘U sogani,’ ni songo ya; arali vha ri, ‘U kamarani,’ ni songo zwi tenda.+ 27 Ngauri u vha hone* ha Murwa muthu hu ḓo fana na lupenyo lu tshi bva vhubvaḓuvha lwa vhonetshela vhukovhela.+ 28 Magoni a ḓo kuvhangana hune ha vha na tshitumbu.+

29 “Nga u ṱavhanya musi maṱungu a misi yeneyo o no fhira, ḓuvha ḽi ḓo swifhala,+ ṅwedzi wa si tsha vhonetshela, ṋaledzi dza wa dzi tshi bva ṱaḓulu, ḽiṱaḓulu ḽa dzinginyea.+ 30 Tshiga tsha u vha hone ha Murwa muthu tshi ḓo vhonala ṱaḓulu, tshaka dzoṱhe ḽifhasini dzi ḓo lila dzo ṱungufhala,+ dza vhona Murwa muthu+ a tshi ḓa e kha makole a ṱaḓulu e na maanḓa na vhugala vhuhulu.+ 31 Hu ḓo pfala mubvumo muhulu wa phalaphala, a ruma vharuṅwa vhawe uri vha kuvhanganye vhanangiwa vhawe vha bvaho thungo dzoṱhe, u bva hune ḽiṱaḓulu ḽa thoma hone u ya hune ḽa guma hone.+

32 “Gudani kha muhuyu. Musi hu tshi bva luṅwe lutavhi, maṱari a a mela, na kona u zwi ḓivha uri tshilimo tshi tsini.+ 33 Na inwi ni tshi vhona zwenezwi zwithu zwoṱhe, ni zwi ḓivhe uri u tsini, u muṋangoni.+ 34 Ngoho ndi a ni vhudza ndi ri, hoyu murafho u nga si lovhe hezwi zwithu zwoṱhe zwi sa athu u itea. 35 Ḽiṱaḓulu na ḽifhasi zwi ḓo lovha, fhedzi maipfi anga ha nga lovhi.+

36 “A hu na ane a ḓivha ḽeneḽo ḓuvha na tshifhinga,+ na vharuṅwa vha ṱaḓulu na Murwa a vha zwi ḓivhi, fhedzi zwi ḓivhiwa nga Khotsi.+ 37 U vha hone* ha Murwa muthu hu ḓo fana na misini ya Noaxe.+ 38 Samusi zwo vha zwo tou ralo musi hu sa athu u vha na Maḓi Mahulu, vhathu vho vha vha tshi ḽa, vha tshi nwa, vha tshi vhinga, vha tshi vhingwa, ha vhuya ha swika ḓuvha ḽe Noaxe a dzhena ngaḽo gungwani,+ 39 vha si ṱhogomele tshithu u swika hu tshi vha na Maḓi Mahulu e a vha kumba vhoṱhe,+ na u vha hone ha Murwa muthu zwi ḓo tou ralo. 40 Vhanna vhavhili vha ḓo vha vhe tsimuni; muṅwe u ḓo dzhiiwa, muṅwe a siiwa. 41 Vhafumakadzi vhavhili vha ḓo vha vha tshi khou kuya; muṅwe u ḓo dzhiiwa, muṅwe a siiwa.+ 42 Ngauralo, dzulani no fhaṱuwa, ngauri a ni ḓivhi ḓuvha ḽine Murena waṋu a ḓo ḓa ngaḽo.+

43 “Fhedzi tshine na fanela u tshi ḓivha ndi hetshi: Arali muṋe wa muḓi o vha a tshi ḓivha uri mbava i ḓo ḓa nga tshifhinga-ḓe,+ o vha a sa ḓo eḓela, a tendela nnḓu yawe i tshi kwashiwa.+ 44 Nga zwenezwo, na inwi dzulani no lindela,+ ngauri Murwa muthu u ḓo ḓa nga tshifhinga tshine ni si tshi humbulele.

45 “Mulanda a fhulufhedzeaho na wa vhuṱali ndi nnyi, we muṋe wawe a mu vhea uri a ṱhogomele vha nnḓu yawe, uri a vha ṋee zwiḽiwa zwavho nga tshifhinga tsho teaho?+ 46 Onoyo mulanda u ḓo takala arali muṋe wawe a mu wana a tshi khou ita zwenezwo!+ 47 Ngoho ndi a ni vhudza ndi ri, u ḓo mu vhea uri a lange zwithu zwawe zwoṱhe.

48 “Arali onoyo mulanda a vha muvhi a elekanya a ri, ‘Muṋe wanga u khou lenga,’+ 49 a rwa vhalanda ngae, a ḽa na u nwa na zwidakwa, 50 muṋe wawe u ḓo ḓa nga ḓuvha ḽine a si ḽi ḓivhe na nga tshifhinga tshine a si tshi ḓivhe,+ 51 a mu pfisa vhuṱungu vhuhulu na u mu dzudza na vhane vha vha na muhoyo. Henefho ndi hune a ḓo lila na u shenganya maṋo.+