Evangeli Ya Mateo

20 “Ngauri Muvhuso wa ṱaḓulu u fana na muṋe wa tsimu we a bva nga matsheloni-tsheloni uri a thole vhashumi tsimuni yawe ya minḓirivhe.+ 2 Musi o no tendelana na vhashumi uri u ḓo vha holela dinari* nga ḓuvha, o vha rumela tsimuni yawe ya minḓirivhe. 3 Musi a tshi bva nga awara i ṱoḓaho u vha ya vhuraru,* a vhona vhaṅwe vha si na mushumo vho ima makete; 4 a amba navho a ri, ‘Iyani tsimuni ya minḓirivhe, ndi ḓo ni holela zwo ni teaho.’ 5 Vha ya tsimuni. Muṋe wa tsimu a dovha a bva nga awara i ṱoḓaho u vha ya vhurathi* na nga ya vhuṱahe* a thola vhaṅwe vhashumi. 6 Mafheleloni a bva nga awara ya vhu 11,* a wana vhaṅwe vho sokou ima, a amba navho a ri, ‘Ndi ngani no sokou ima afha ḓuvha ḽoṱhe ni si na mushumo?’ 7 Vha mu fhindula vha ri, ‘Ndi ngauri a hu na o ri tholaho.’ A amba navho a ri, ‘Na inwi iyani tsimuni ya minḓirivhe.’

8 “Musi ḽo no kovhela, muṋe wa tsimu ya minḓirivhe a amba na muthu we a vha a tshi khou i ṱhogomela a ri, ‘Vhidza vhashumi u vha holele,+ u thome nga vhe vha ḓa murahu, u fhedzisele nga vha u thoma.’ 9 Musi hu tshi ḓa vhe vha swika nga tshifhinga tsha vhu 11, vhoṱhe vha holelwa dinari.* 10 Musi hu tshi ḓa vhe vha swika u thoma, vha humbula uri vha ḓo ṋewa muholo munzhi, fhedzi na vhone vha ṋewa dinari.* 11 Musi vha tshi holelwa, vha thoma u gungulela muṋe wa tsimu 12 vha ri, ‘Vha u fhedzisela vho shuma awara nthihi, ndi ngani vho hola muholo u fanaho na washu ngeno riṋe ro shuma ḓuvha ḽoṱhe ri tshi swa nga ḓuvha?’ 13 A fhindula muṅwe wavho a ri, ‘Khonani, a tho ngo u khakhela. Naa a ro ngo tendelana nga yeneyo dinari?*+ 14 Dzhia zwi re zwau u ṱuwe. Ndi ṱoḓa u holela wa u fhedzisela muholo u fanaho na wau. 15 Naa mulayo a u ntendeli u ita zwine nda funa nga zwi re zwanga? Naa u muvhi* ngauri ndi na vhuthu?’*+ 16 Nga yeneyo nḓila, vha u fhedzisela vha ḓo vha vha u thoma, vha u thoma vha vha vha u fhedzisela.”+

17 Musi Yesu a tshi khou ya Yerusalema, a vhidzela thungo vhafunziwa vhawe vha 12 a amba navho e nḓilani a ri:+ 18 “Ri khou gonya Yerusalema, Murwa muthu u ḓo kumedzelwa kha vhahulwane vha vhotshifhe na kha vhamaṅwalo, vha ḓo mu haṱulela lufu.+ 19 Vha ḓo mu kumedzela kha vhathu vha dzitshaka uri vha mu goḓe, vha mu rwe na u mu ombela kha danda,+ fhedzi u ḓo vuswa nga ḓuvha ḽa vhuraru.”+

20 Mufumakadzi wa Sebedeo+ o ḓa kha Yesu e na vharwa vhawe vhavhili, a mu losha.* O vha a tshi ṱoḓa u mu humbela tshiṅwe tshithu.+ 21 Yesu a ri: “Ndi u itele mini?” Ene a ri: “Ndi khou humbela uri vharwa vhanga vhavhili vha dzule na iwe Muvhusoni wau. Muṅwe kha tshanḓa tshau tsha u ḽa, muṅwe kha tsha monde.”+ 22 Yesu a ri: “A ni ḓivhi zwine na khou humbela zwone. Naa ni nga kona u nwa tshinwelo tshine nda ḓo tshi nwa hu si kale?”+ Vhone vha ri: “Ri nga tshi nwa.” 23 Yesu a ri: “Ndi ngoho uri ni ḓo nwa tshinwelo tshanga,+ fhedzi u dzula kha tshanḓa tshanga tsha u ḽa na kha tsha monde a si zwine nda nga ni ṋea zwone, ndi zwa vhe vha lugiselelwa nga Khotsi anga.”+

24 Musi vhaṅwe vhafunziwa vha fumi vha tshi zwi pfa, vha sinyutshela avho murathu na mukomana.+ 25 Fhedzi Yesu a vha vhidza vhoṱhe a ri: “Ni a zwi ḓivha uri vhavhusi vha dzitshaka vha vhusa vhathu nga nḓila ine vha funa, na vharangaphanḓa vha shumisa maanḓa avho u langa vhathu.+ 26 Inwi a no ngo fanela u ita nga u ralo,+ ane a ṱoḓa u vha muhulwane kha inwi nga a shumele vhaṅwe,+ 27 ane a ṱoḓa u vha wa u thoma vhukati haṋu nga a vhe mulanda.+ 28 Samusi Murwa muthu a songo ḓa u shumelwa, fhedzi o ḓa u shumela vhaṅwe+ na u ṋekedza vhutshilo hawe sa tshirengululi a tshi itela vhanzhi.”+

29 Musi vha tshi bva Yeriko, vhathu vhanzhi vha mu tevhela. 30 Vhanna vhavhili vha sa vhoni vho vha vho dzula tsini na nḓila, vha tshi pfa uri Yesu u khou fhira nga henefho, vha vhidzelela vha ri: “Murena, Murwa wa Davida, ri khathutshele!”+ 31 Fhedzi vhathu vha vha kaidza, vha ri vha fhumule; vhone vha tou ṋaṋa u vhidzelela, vha ri: “Murena, Murwa wa Davida, ri khathutshele!” 32 Yesu a ima, a vha vhidza a ri: “Ndi ni itele mini?” 33 Vhone vha ri: “Murena, ita uri ri vhone.” 34 Yesu a vha pfela vhuṱungu, a kwama maṱo avho,+ nga u ṱavhanya vha thoma u vhona, vha mu tevhela.