Kha Vharoma
11 Naa zwenezwi zwi amba uri Mudzimu o laṱa vhathu vhawe?+ Na khathihi! Ngauri na nṋe ndi Muisiraele, ṅwana* wa Abrahamu, wa lushaka lwa Benyamini. 2 Mudzimu ho ngo laṱa vhathu vhawe vhe a thoma u vha ḓivha.+ Naa a ni ḓivhi zwine luṅwalo lwa zwi amba nga ha Elia? O rabela Mudzimu a tshi khou gungula nga ha Vhaisiraele, a ri: 3 “Yehova,* vho vhulaya vhaporofita vhau, vho thutha aḽeṱare dzau, ndo sala ndi ndoṱhe, vha ṱoḓa u mmbulaya.”+ 4 Fhedzi Mudzimu o ri mini? O ri: “Ndi kha ḓi vha na vhathu vha 7 000 vhe vha si gwadamele Baali.”+ 5 Na zwino hu na Vhaisiraele vho salaho+ vhe Mudzimu a vha nanga nga nṱhani ha vhuthu hawe vhuhulu. 6 O vha nanga nga nṱhani ha vhuthu hawe vhuhulu,+ hu si nga zwe vha zwi ita.+ Arali vho tou shuma uri vha nangiwe, a hu tsha vha nga nṱhani ha vhuthu hawe vhuhulu.
7 Zwino ri nga ri mini? Zwe Vhaisiraele vha vha vha tshi khou zwi ṱoḓa a vho ngo zwi wana, zwo waniwa nga vho nangiwaho nga Mudzimu.+ Vhaṅwe vho hana u thetshelesa.+ 8 Samusi ho ṅwaliwa u pfi: “Mudzimu o vha ita uri vha nge vhathu vho eḓelaho khofhe khulu.+ O vha ṋea maṱo a sa vhoni na nḓevhe dzi sa pfi, u swika na ṋamusi.”+ 9 Na Davida o ri: “Ngavhe ṱafula ḽavho ḽi tshi vha tshikwekwe, tshikhukhulisi na ndifhedzo yavho. 10 Ngavhe maṱo avho a tshi swifhalelwa uri vha si vhone, vha dzule vho kwatama.”+
11 Naa zwenezwi zwi amba uri vho khukhulwa vha wa, vha si tsha kona u vuwa? Na khathihi! Ngauri vho tshinya, zwa ita uri vhathu vha dziṅwe tshaka vha tshidzwe, zwa ita uri vha vhe na vivho.+ 12 Arali vha dzitshaka vha tshi ḓo fhaṱutshedzwa naho Vhayuda vho tshinyaho vhe si vhanzhi,+ phaṱhutshedzo dzi ḓo vha nnzhi vhukuma musi tshivhalo tsha Vhayuda tshi tshi fhelela.
13 Zwino ndi khou amba na inwi vha dzitshaka. Samusi ndi muapostola wa dzitshaka,+ ndi dzhiela nṱha mushumo une nda u itela Mudzimu,+ 14 uri ndi ite uri vhathu vha hashu vha vhe na vivho, vhaṅwe vhavho vha tshidzwe. 15 Arali u laṱwa havho+ zwi tshi ita uri vhaṅwe vhathu vhoṱhe vha pfumedzanywe na Mudzimu, naa u ṱanganedzwa havho a hu nga ḓo nga u vuswa vhafuni? 16 Zwiṅwe hafhu, arali tshipiḓa tsha u thoma tsha fuḽauru yo sukwaho tshi tshi dzhiiwa tshi tshikhethwa, fuḽauru yoṱhe ndi khethwa; arali mudzi u mukhethwa na matavhi awo ndi makhethwa.
17 Arali maṅwe matavhi o remiwa, vhudzuloni hao ha ṱumiwa iwe we wa vha u muṱwari wa ḓaka, wa vha na mukovhe kha mudzi wa muṱwari u re na mapfura, 18 u songo nyadza* matavhi. Arali wa a nyadza,*+ u humbule uri a wo ngo tika mudzi, fhedzi ndi mudzi wo tikaho iwe. 19 Zwino iwe u ḓo ri: “Matavhi o remiwa uri hu ṱumiwe nṋe.”+ 20 Ndi ngoho! U sa vha havho na lutendo zwo ita uri vha remiwe,+ fhedzi iwe wo sala wo ima nga lutendo.+ U songo ḓihudza, fhedzi u ofhe. 21 Arali Mudzimu o rema matavhi a vhukuma, na iwe ha nga u litshi. 22 Nga zwenezwo, u ṱhogomele vhuthu ha Mudzimu+ na vhuhali hawe. Vho waho u vha pfisa vhuṱungu,+ fhedzi iwe o u sumbedza vhuthu, tenda wa dzula u tshi ita uri a u sumbedze vhuthu; ngauri wa sa ita nga u ralo, u ḓo remiwa. 23 Na vhaḽa vha ḓo ṱumiwa arali vha dovha vha tenda,+ ngauri Mudzimu u a kona u dovha a vha ṱuma. 24 Arali wo remiwa kha muṱwari wa ḓakani, wa ṱumiwa kha muṱwari wa hayani, naho zwi si zwa nzulele, naa Mudzimu a nga si kone u ṱuma matavhi a vhukuma a muṱwari e a vha o a rema?
25 Vhahashu, ndi ṱoḓa ni tshi ḓivha tshenetshi tshiphiri tshikhethwa,+ uri ni si ḓiite vho ṱalifhaho: Vhaṅwe Vhaisiraele vho rindidza mbilu u swikela hu tshi ḓa vhoṱhe vho nangiwaho vha dziṅwe tshaka, 26 ndi hone hu tshi ḓo tshidzwa Vhaisiraele vhoṱhe.+ Samusi ho ṅwaliwa u pfi: “Mutshidzi u ḓo ḓa a tshi bva Tsioni,+ a litshisa Yakobo vhuvhi hawe. 27 Wonoyu ndi mulanga we nda u vhofha navho+ musi ndi tshi vha hangwela zwivhi.”+ 28 Ndi ngoho uri ndi maswina a Mudzimu, ngauri vho hana mafhungo maḓifha, zwa ita uri u vhuyelwe. Fhedzi Mudzimu o nanga vhaṅwe vhavho uri vha vhe khonani dzawe ngauri o fhulufhedzisa vhomakhulukuku wavho.+ 29 Ngauri Mudzimu a tshi ṋea zwifhiwa na u vhidza vhathu ha nga ḓisoli. 30 Kale no vha ni sa thetshelesi Mudzimu,+ fhedzi o ni khathutshela+ nge Vhayuda vha si thetshelese,+ 31 o ni khathutshela ngauri a vho ngo thetshelesa, fhedzi zwino u a khathutshela na Vhayuda. 32 Mudzimu o tendela vhathu vhoṱhe vha tshi nga vhafariwa ngauri a vha thetshelesi,+ uri a vha khathutshele vhoṱhe.+
33 Lupfumo, vhuṱali na nḓivho zwa Mudzimu ndi zwihulu. A hu na ane a pfesesa nḓila ine a haṱula ngayo, a hu na ane a ḓivha nḓila dzawe. 34 Ngauri “ndi nnyi ane a ḓivha zwi re muhumbuloni wa Yehova,* kana ndi nnyi ane a mu eletshedza?”+ 35 Kana, “Ndi nnyi we a thoma u ṋea Mudzimu tshiṅwe tshithu, uri a mu lifhele?”+ 36 Ngauri zwithu zwoṱhe zwi bva khae, zwo sikwa ngae a tshi itela ene muṋe. Nga a rendwe lini na lini. Amen.